ৰাজ্যখনত শেহতীয়াকৈ জাপানীজ এনকেফেলাইটিছ ৰোগত আক্ৰান্ত হৈ ২৪ জন লোকৰ মৃত্যু হোৱা ঘটনাত আম আদমি পাৰ্টী, অসম য়ে গভীৰ দুখ প্ৰকাশ কৰা লগতে উদ্বিগ্নতা প্ৰকাশ কৰিছে ৷
আজি এই ৰোগ নিবাৰনৰ বাবে প্ৰয়োজনীয় ব্যৱস্থা গ্ৰহণৰ দাবীত আজি আম আদমি পাৰ্টীয়ে সমগ্ৰ অসমত জিলা আয়ুক্তসকলক দাবী পত্ৰ প্ৰদান কৰে ৷ এক প্ৰেছ বিবৃতিত দলটোৰ ৰাজ্যিক সাধাৰণ সম্পাদক (সংগঠন) ৰাজীব শইকীয়াই উদ্বিগ্নতাৰে কয় যে ৰাজ্যখনত এতিয়ালৈকে ২৫০ জন লোক এই ৰোগত আক্ৰান্ত হৈ থকাৰ লগতে ২৪ জন লোক মৃত্যু হোৱাৰ পিছতো মুখ্যমন্ত্ৰী ড০ হিমন্ত বিশ্ব শৰ্মা চৰকাৰৰ স্বাস্থ্য বিভাগৰ বিশেষ তৎপৰতা পৰিলক্ষিত নহ’ল ৷
বিবৃতিটোত আম আদমি পাৰ্টীৰ ৰাজ্যিক নেতাজনে অভিযোগ কৰি কয়, এই ৰোগত ২৪ জনকৈ মানুহ মৃত্যু হোৱাৰ পিছতো ৰাজ্যৰ স্বাস্থ্য বিভাগে গাঁৱে গাঁৱে, চহৰে নগৰে ম’হ নিবাৰনৰ বাবে ধোঁৱা আদিৰ ব্যৱস্থা নকৰিলে ৷ ঔষধযুক্ত আঁঠুৱাৰ ব্যৱস্থা নকৰিলে ৷ সজাগতামুলক সভা, মাইকযোগে সজাগতামুলক ঘোষণা, প্ৰচাৰ পত্ৰিকা আদিৰ ব্যৱস্থা নকৰিলে ৷ এয়া ৰাজ্যৰ স্বাস্থ্য বিভাগৰ চূড়ান্ত অৱহেলা আৰু ব্যৰ্থতা বুলি অভিযোগ কৰি ৰাজীব শইকীয়াই কয় যে, আমি স্বাস্থ্য মন্ত্ৰী অশোক সিংঘলৰ পদত্যাগৰ দাবী জনাইছোঁ ৷
অন্যহাতে বিবৃতিটোৰ জৰিয়তে আপৰ ৰাজ্যিক সাধাৰণ সম্পাদক ৰাজীব শইকীয়াই দাবী পত্ৰত উল্লেখ কৰা দাবীসমুহ উল্লেখ কৰি কয় যে, ৰাজ্যখনৰ সকলো অঞ্চলত ম’হ নিবাৰণৰ বাবে ধোঁৱা , ম’হ প্ৰতিৰোধক কীটনাশক প্ৰদান , ৰাইজক ঔষধযুক্ত আঁঠুৱা প্ৰদান, জনসজাগতাৰ বাবে চৰকাৰে সজাগতা কাৰ্যসূচী হিচাপে প্ৰচাৰ পত্ৰ, মাইকযোগে সজাগতামুলক প্ৰচাৰৰ ব্যৱস্থা কৰা, এই ৰোগত ইতিমধ্যে মৃত্যু হোৱা লোকৰ পৰিয়ালক উপযুক্ত চৰকাৰী সাহাৰ্য প্ৰদান, আক্ৰান্ত হৈ চিকিৎসাধীন হৈ থকা ৰোগীসকলক বিশেষ চিকিৎসাৰ ব্যৱস্থা কৰা আৰু গাঁওসমুহত স্বাস্থ্য ও চিকিৎসা সেৱা শিৱিৰ স্থাপন কৰি সকলোৰে স্বাস্থ্য পৰীক্ষা কৰিবলৈ চৰকাৰক দাবী জনাইছে ৷ বিবৃতিটোত আপৰ নেতাজনে আজিৰ কাৰ্যসূচী সফল কৰি তোলা বাবে দলৰ জিলা সমিতিসমুহক কৃতজ্ঞতা জনাইছে ৷
