মহানগৰীৰ জাপৰিগোগ অঞ্চলত অৱস্থিত অসম ৰাজ্যিক চিৰিয়াখানালৈ পাটনাৰ সঞ্জয় গান্ধী বায়’লজিকেল চিৰিয়াখানাৰ পৰা অনা হৈছে এজনী মাইকী জিৰাফ।
ইতিমধ্যে জিৰাফটোৱে অসমত প্ৰৱেশ কৰা বুলি চিৰিয়াখানাৰ জিলা বন বিষয়া তেজস্ব মৰিশ্বামীয়ে জানিবলৈ দিয়ে। তেওঁ লগতে আজি মাজনিশা জিৰাফটো চিৰিয়াখানা পাবহি বুলি জনায়। জিৰাফটোৰ বয়স ১ বছৰ ৬ মাহ।
শনিবাৰে বিয়লি ৪ বজাত বন মন্ত্ৰী পৰিমল শুক্লবৈদ্যয়ে জিৰাফৰ বাবে নিৰ্মাণ কৰা গঁৰাল মুকলি কৰিব।
অসম ৰাজ্যিক চিৰিয়াখানাৰ সৈতে পাটনাৰ সঞ্জয় গান্ধী বায়’লজিকেল চিৰিয়াখানাৰ এক পাৰস্পৰিক চুক্তি সাপেক্ষে ৰাজ্যিক চিৰিয়াখানালৈ এটা জিৰাফ পঠিওৱাৰ সিদ্ধান্ত গ্ৰহণ কৰিছিল চিৰিয়াখানা কৰ্তৃপক্ষই।
ইপিনে, অন্য এটা মতা জিৰাফ মাইচ’ৰ চিৰিয়াখানাৰ পৰা আনি থকা হৈছে। ১০ দিনৰ পাছত জিৰাফটো চিৰিয়াখানা পাবহি বুলি বিষয়াগৰাকীয়ে জনায়।
অসম ৰাজ্যিক চিৰিয়াখানাৰ পৰা জিৰাফ দুটাৰ বিনিময়ত দুটাকৈ গঁড় পাটনা আৰু মাইচ’ৰ চিৰিয়াখানালৈ পঠোৱা হ’ব বুলি মৰিস্বামীয়ে জনায়।
উল্লেখযোগ্য যে, চিৰিয়াখানাত পূৰ্বে দুজনী মাইকী জিৰাফ আছিল। সৰস্বতী নামৰ জিৰাফজনীৰ ২০০৪ চনত মৃত্যু হৈছিল আৰু লক্ষী নামৰ জিৰাফজনীৰ ২০১১ চনত মৃত্যু হৈছিল।
ইয়াৰ পাছৰে পৰা চিৰিয়াখানাৰ আকৰ্ষণৰ মূল কেন্দ্ৰ বিন্দু জিৰাফ দুটা চোৱাৰ পৰা বঞ্চিত হৈছিল পৰ্য্যটকসকল।
