দীৰ্ঘদিনৰ পৰা গুৱাহাটী মহানগৰীৰ বেলতলাত চুৰি গাড়ীৰ ব্যৱসায় চলাই অহা এটা গাড়ীচোৰ চক্ৰক উৎখাত কৰিবলৈ সক্ষম হৈছে কাজিৰঙাৰ বাগৰি আৰক্ষী৷ প্ৰাপ্য তথ্য মতে উক্ত চক্ৰটোৱে যোৱা ১৭ জুলাইত কাজিৰঙাৰ বাগৰিৰ এখন লাইন হোটেলৰ পৰা দহচকীয়া ট্ৰাক চুৰি কৰিছিল।
গাড়ীখন অন্তৰ্ধানৰ পাছতে গাড়ীখনৰ স্বত্ত্বাধিকাৰী ৰামপ্ৰসাদ যাদবে বাগৰি আৰক্ষী চকীত এখন এজাহাৰ দাখিল কৰে। ট্ৰাকখনৰ গৰাকী ৰামপ্ৰসাদ যাদৱৰ এজাহাৰৰ ভিত্তিত বাগৰি আৰক্ষীয়ে নিৰন্তৰ অভিযান চলাই সোমবাৰে অসম-মেঘালয় সীমান্তৱৰ্তী বৰ্ণিহাটৰ পৰা চুৰি হোৱা বি আৰ ০৬বি ৯৬৩৭ নম্বৰৰ ট্ৰাকখন উদ্ধাৰ কৰে৷
ইয়াৰ উপৰি আৰক্ষীয়ে আটক কৰে চুৰি কাৰ্য্ত জড়িত চাৰিজন অভিযুক্তক৷ ধৃত ৰাজেল সাহানী আৰু অপিন্দৰ সাহানীয়ে এজন তৃতীয় ব্যক্তিৰ সহায়ত গাড়ীখন সাত লাখ টকাত গুৱাহাটীৰ বেলতলাৰ বীৰেন্দ্ৰ সাহানী আৰু ৰাকেশ কুমাৰ নামৰ দুজন লোকৰ ওচৰত বিক্ৰী কৰে বুলি জানিব পৰা যায়।
চুৰি ট্ৰাকখন বৰ্ণিহাটত লুকুৱাই থৈছিল আৰু উক্ত স্থানৰ পৰাই বাগৰি আৰক্ষীয়ে ট্ৰাকখন উদ্ধাৰ কৰিবলৈ সক্ষম হয়৷ আনহাতে ধৃত বিহাৰৰ লোককেইজনে সমগ্ৰ ঘটনাৰ বিষয়ে আৰক্ষীৰ আগত স্বীকাৰ কৰিছে৷
