স্বচ্ছ আৰু মেধাভিত্তিক নিযুক্তি প্ৰক্ৰিয়া অব্যাহত ৰাখি মুখ্যমন্ত্ৰী ড° হিমন্ত বিশ্ব শর্মাই আজি গুৱাহাটী চিকিৎসা মহাবিদ্যালয় প্রেক্ষাগৃহত অনুষ্ঠিত এক অনুষ্ঠানত উচ্চ (কাৰিকৰী) শিক্ষা বিভাগৰ অধীনত ৩৪২ গৰাকী প্রার্থীক নিযুক্তি-পত্র প্রদান কৰে। ইয়াৰে ৰাজ্যৰ পলিটেকনিকসমূহত ১৪১ গৰাকী কাৰিকৰী বিষয়ৰ আৰু ৯৫ গৰাকী অকাৰিকৰী বিষয়ৰ প্ৰবক্তাকে ধৰি সৰ্বমুঠ ২৩৬ গৰাকী প্রবক্তা। আনহাতে, আজিৰ অনুষ্ঠানতে ৰাজ্যৰ অভিযান্ত্ৰিক মহাবিদ্যালয় আৰু পলিটেকনিকসমূহত ৮৫ গৰাকী জ্যেষ্ঠ প্রশিক্ষক আৰু অভিযান্ত্রিক মহাবিদ্যালয়ত ৩ গৰাকী তথা পলিটেকনিকসমূহত ১৮ গৰাকী গ্ৰন্থাগাৰিকক নিযুক্তি-পত্ৰ প্ৰদান কৰা হয়।
মুখ্যমন্ত্ৰীয়ে আজি প্ৰদান কৰা এই নিযুক্তি-পত্ৰৰ ফলত বৰ্তমানৰ ৰাজ্য চৰকাৰৰ কাৰ্যকালত প্ৰদান কৰা নিযুক্তিৰ সংখ্যা ১,২১,১৮২ লৈ বৃদ্ধি পালে। এই উপলক্ষে প্ৰদান কৰা ভাষণত মুখ্যমন্ত্ৰী ড° শৰ্মাই কয় যে নৱ নিযুক্ত এই প্ৰাৰ্থীসকলক অসম অভিযান্ত্ৰিক সেৱা নিযুক্তি ব’ৰ্ডে জনোৱা অনুমোদনৰ ভিত্তিত আজি নিযুক্তি-পত্ৰ প্ৰদান কৰা হৈছে।
তেওঁ কয় যে ২০২২ চনৰ পৰা বৰ্তমানৰ ৰাজ্য চৰকাৰে এই নিযুক্তি ব’ৰ্ডে জনোৱা অনুমোদনৰ ভিত্তিত ৬৩০ গৰাকী প্ৰাৰ্থীক ৰাজ্যৰ বিভিন্ন অভিযান্ত্রিক মহাবিদ্যালয় আৰু পলিটেকনিকত প্রবক্তা আৰু অন্যান্য পদত নিযুক্তি প্ৰদান কৰিছে। তদুপৰি, ২০২৪ চনত অসম লোকসেৱা আয়োগে জনোৱা অনুমোদনৰ ভিত্তিত ৭৬ গৰাকী প্রার্থীক অভিযান্ত্রিক মহাবিদ্যালয়সমূহত কাৰিকৰী আৰু অকাৰিকৰী বিষয়ৰ সহকাৰী অধ্যাপক পদত নিযুক্তি দিয়া হৈছে। মুখ্যমন্ত্ৰীয়ে কয় যে ১ লাখ চৰকাৰী পদত ৰাজ্যৰ যুৱক-যুৱৰ্তীসকলক নিযুক্তি প্ৰদানৰ বাবে নিৰ্বাচনৰ সময়ত প্ৰদান কৰা প্ৰতিশ্ৰুতি পূৰণৰ দিশত আগবাঢ়ি ৰাজ্য চৰকাৰে উচ্চ শিক্ষাৰ প্ৰতিষ্ঠানসমূহত অধ্যাপক-অধ্যাপিকাৰ পদ পূৰণত বিশেষ অগ্ৰাধিকাৰ প্ৰদান কৰিছিল। কিয়নো এইধৰণৰ শিক্ষানুষ্ঠানত শিক্ষকৰ পদ খালী হৈ থাকিলে শিক্ষার্থীসমাজ যথেষ্ট ক্ষতিৰ সন্মুখীন হয়। তেওঁ মন্তব্য কৰে যে বিগত ১০-১৫ বছৰ ধৰি ৰাজ্যৰ অভিযান্ত্ৰিক মহাবিদ্যালয় আৰু পলিটেকনিকসমূহত নিযুক্তিৰ সমগ্ৰ প্ৰক্ৰিয়াটো জটিলতাৰ মাজত আবদ্ধ হৈ আছিল।
ৰাজ্য চৰকাৰে বিভিন্ন প্ৰচেষ্টাৰে এই জটিলতা আঁতৰ কৰাৰ পিছত ৰাজ্যৰ ২৬ খন চৰকাৰী পলিটেকনিক আৰু ৭ খন অভিযান্ত্রিক মহাবিদ্যালয়ৰ খালী হৈ থকা অধ্যাপক-অধ্যাপিকাৰ পদ পূৰণৰ প্ৰক্ৰিয়া প্রায় সম্পূৰ্ণ হোৱাৰ দিশত আগবাঢ়িছে বুলি মন্তব্য কৰি মুখ্যমন্ত্ৰীয়ে কয় যে চলিত বৰ্ষৰ ডিচেম্বৰ মাহত এই প্রক্রিয়া সম্পূর্ণ হৈ উঠিব। ভাষণত মুখ্যমন্ত্ৰীয়ে ৰাজ্যৰ অভিযান্ত্রিক মহাবিদ্যালয় আৰু পলিটেকনিকসমূহৰ গুণগত মান বৃদ্ধিৰ লগতে চতুর্থ ঔদ্যোগিক বিপ্লৱৰ প্ৰয়োজনীয়তা পূৰণৰ অৰ্থে দক্ষ মানৱ সম্পদ সৃষ্টিত গুৰুত্ব আৰোপ কৰে। তেওঁ কয় যে জাগীৰোডত ছেমি কণ্ডাক্টৰ উদ্যোগ, নুমলীগড় শোধনাগাৰত ইথানল প্রকল্প, নামৰূপত সাৰ কাৰখানা আদি স্থাপনৰ কাম-কাজ তথা প্রক্রিয়া চলি আছে।
তেনেদৰে প্ৰায় ১০ হাজাৰ কোটি টকা ব্যয় সাপেক্ষ দুটাকৈ বৃহৎ চিমেণ্ট প্ৰকল্প স্থাপনৰ বাবে ৰাজ্য চৰকাৰে প্ৰস্তাৱ লাভ কৰিছে। আনহাতে, দুটা তাপবিদ্যুৎ প্রকল্প স্থাপনৰ বাবেও ৰাজ্য চৰকাৰে প্ৰচেষ্টা গ্ৰহণ কৰিছে। এইদৰে ঔদ্যোগীকৰণৰ প্ৰক্রিয়া অব্যাহত থাকিলে আগন্তুক ৫-৬ বছৰত অসমত এক নিৰ্মাণ খণ্ড গঢ় লৈ উঠিব বুলি মন্তব্য কৰি মুখ্যমন্ত্ৰীয়ে কয় যে সম্প্রতি ভাৰতবৰ্ষ বিশ্বৰ তৃতীয় শক্তিশালী অর্থনীতি হোৱাৰ দিশত অগ্ৰসৰ হৈছে। ইয়াৰ পৰিপ্ৰেক্ষিততে ৰাজ্যত কৰ্ম সংস্থাপনৰ সুবিধা যথেষ্ট বৃদ্ধি পাব বুলি মন্তব্য কৰি তেওঁ ষ্টাৰ্ট আপ, ইনকুবেশ্যন চেণ্টাৰ গঢ়ি তোলাৰ লগতে উদ্ভাৱনীমূলক কাম-কাজ বৃদ্ধিৰ ওপৰতো গুৰুত্ব আৰোপ কৰে। মুখ্যমন্ত্ৰীয়ে লগতে ৰাজ্যৰ যুৱক-যুৱতীসকলে কৃত্রিম বুদ্ধিমত্তা, মেচিন লার্নিং তথা থ্রী-ডি প্রিন্টিং আদিৰ দৰে প্ৰযুক্তিৰ জ্ঞান লাভৰ ওপৰতো গুৰুত্ব আৰোপ কৰি কয় যে উদ্যমিতা আৰু মেধা সম্পন্ন কোনো ব্যক্তিৰ বাবেই সাম্প্রতিক সময়ত সংস্থাপন লাভ কৰাটো সমস্যা হ’ব নোৱাৰে। স
ম্প্ৰতি ৰাজ্যত ৮খন অভিযান্ত্রিক মহাবিদ্যালয় নিৰ্মাণৰ কাম বিভিন্ন পর্যায়ত আছে বুলিও সদৰী কৰি ভাষণ প্রসংগত মুখ্যমন্ত্ৰীয়ে মন্তব্য কৰে যে নিজৰ আকাংক্ষা পূৰ্ণ হোৱাৰ পিছত এগৰাকী ব্যক্তিয়ে সমাজৰ আনসকলৰ বাবে নিজকে সমর্পণ কৰিলেহে সমাজখন আগুৱাই যাবলৈ সক্ষম হয়। তেওঁ অভিযান্ত্রিক মহাবিদ্যালয় আৰু পলিটেকনিকসমূহত আজি নিযুক্তি লাভ কৰা অধ্যাপক-অধ্যাপিকাসকলক সেয়ে নিজ নিজ শিক্ষানুষ্ঠানত নতুন চিন্তাৰ বুনিয়াদ গঢ় দিবলৈ আহ্বান জনায়।
মুখ্যমন্ত্রীয়ে কয় যে অধ্যাপক- অধ্যাপিকাসকলে ৰাজ্যৰ শিক্ষাৰ্থী সমাজক আগন্তুক নতুন সময়ৰ বাবে প্ৰস্তুত কৰা উচিত। ৰাজ্যৰ অভিযান্ত্রিক মহাবিদ্যালয় আৰু পলিটেকনিকসমূহ দক্ষ মানৱ সম্পদ গঢ়াৰ লগতে ষ্টাৰ্ট আপ আৰু উদ্ভাৱনৰ একোটা কেন্দ্ৰ হৈ পৰিব লাগিব বুলিও তেওঁ কয়। মুখ্যমন্ত্রীয়ে লগতে মন্তব্য কৰে যে শক্তিখণ্ডকে ধৰি বিভিন্ন খণ্ডত সম্প্রতি অভিযন্তাসকলৰ চাহিদা যথেষ্ট বৃদ্ধি পাইছে। ইয়াৰ পৰিপ্ৰেক্ষিততে অসমৰ অভিযান্ত্রিক পাঠ্যক্ৰমৰ শিক্ষার্থীসকলক এনে চাহিদা পূৰণ কৰিব পৰাকৈ ৰাজ্যৰ অভিযান্ত্ৰিক মহাবিদ্যালয় আৰু পলিটেকনিকসমূহে দক্ষ কৰি তুলিব লাগিব। আজিৰ এই অনুষ্ঠানত শিক্ষা আদি বিভাগৰ মন্ত্ৰী ডাঃ ৰণোজ পেণ্ড, উচ্চ শিক্ষা বিভাগৰ সচিব নাৰায়ণ কোঁৱৰ, কাৰিকৰী শিক্ষা সঞ্চালক ধ্ৰুৱজ্যোতি বৰাকে ধৰি কেইবাগৰাকীও গণ্য-মান্য ব্যক্তি উপস্থিত থাকে।
