নিত্য-নতুন SOP ঘোষণা আৰু নিশা হ’লেই ফেইচবুক লাইভ দি মুখ্যমন্ত্ৰী হিমন্ত বিশ্ব শৰ্মাই এডিআৰ পৰীক্ষাকলৈ ৰাইজক চমক দিয়াৰ প্ৰয়াস কৰাৰ বিপৰীতে নিযুক্তি পৰীক্ষাটোকলৈ চৰকাৰখনৰ পৰিকল্পনাহীন স্বৰূপটোহে প্ৰকাশ কৰিছে। ইয়াৰ আঁৰত আছে স্বজন-তোষণৰে নিজৰ প্ৰাৰ্থীক চাকৰি দিয়াৰ গভীৰ ষড়যন্ত।
বিগত বৰ্ষৰ ধাৰাবাহিক আন্দোলন আৰু চৰকাৰৰ নিযুক্তিৰ সুৰঙাবোৰ উদঙাই দিয়াৰ ফলত কিছু সংশোধনী আনিছে যদিও মূল সুৰঙাবোৰ আঁতৰ কৰাৰ বাবে কোনো ব্যৱস্থা লোৱা নাই। কঠোৰ আইন, নিত্য-নতুন নিৰ্দেশনা আৰু যুৱক- যুৱতীৰ মান-সন্মান ধূলিসাৎ কৰা, মানসিক আতিশয্য দি চেকিং ব্যৱস্থাৰে চমক দি এডিআৰ পৰীক্ষা পতা মুখ্যমন্ত্ৰী হিমন্ত বিশ্ব শৰ্মাই স্বচ্ছ আৰু নিকা নিযুক্তি প্ৰক্ৰিয়াৰ ওচৰ পাবলৈ এতিয়াও বহু বাকী। কঠোৰ বিধি ব্যৱস্থা আৰু স্বচ্ছ-নিকা নিযুক্তিৰ আশ্বাস দিয়া এ ডি আৰ ইৰ নিযুক্তি প্ৰক্ৰিয়াত পদে পদে বিচ্যুতি পৰিলক্ষিত হৈছে। ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে তৃতীয় আৰু চতুৰ্থ বৰ্গৰ নিযুক্তি প্ৰক্ৰিয়াত আৰম্ভণিৰে পৰা চকু ৰাখিছে আৰু অসম চৰকাৰৰ ওচৰত যুক্তিপূৰ্ণ দাবী উত্থাপন কৰি আহিছে।
প্ৰথম পৰ্যায়ত হৈ যোৱা লিখিত পৰীক্ষাৰ OMR Sheet ত ফটো আৰু নাম সংলগ্ন কৰাটো ভুল হৈছে বুলি মুখ্যমন্ত্ৰীয়ে ইতিমধ্যে আওপকীয়াকৈ স্বীকাৰ কৰিছে। কিন্তু ইয়াৰ পাছতো ২৯ তাৰিখৰ পৰীক্ষাত একেটা ভুলৰেই পৰীক্ষা পাতিব ওলাইছে। এয়া দেখদেখকৈ অন্যায় আৰু গভীৰ ষড়যন্ত্ৰৰ অংশ। প্ৰাৰ্থীসকলৰ এডমিট কাৰ্ড আৰু এটেণ্ডেনচ শ্বীটত চহী কৰাৰ সময়তে নিৰীক্ষককে প্ৰাৰ্থী এজনৰ সত্যতা নিৰূপন কৰে। গতিকে OMR Sheet ত ফটো, নাম উল্লেখ কৰাৰ কোনো অৰ্থ নাই। এপিএছচি-ইউপিএছচি ৰ দৰে উচ্চ পৰ্যায়ৰ পৰীক্ষাতো স্বচ্ছতা আৰু প্ৰাৰ্থীৰ গোপনীয়তা ৰক্ষাত গুৰুত্ব দিয়া হয়। তাত কোনো প্ৰকাৰে নাম, ফটো, প্ৰাপ্ত নম্বৰ আদি তথ্য প্ৰকাশ নকৰে। কিন্তু এডিআৰ ই পৰীক্ষাত ফটো আৰু নাম প্ৰকাশ কৰি গুৰুতৰ ভুল কৰাৰ পাছতো তাক সংশোধন নকৰাকৈ পুনৰ পৰীক্ষা অনুষ্ঠিত কৰিব যোৱাতো এটা ডাঙৰ অপৰাধ। প্ৰাৰ্থীৰ গোপনীয়তা ভংগ হোৱাৰ ফলত জাতি-জনজাতি, ধৰ্ম-ভাষা আদি প্ৰেক্ষাপটত এজন প্ৰাৰ্থী বৈষম্যৰ বলি হোৱাৰ প্ৰবল সম্ভাৱনা আছে।
এটা ইতিবাচক খবৰ যে ডি ৱাই এফ আইৰ লগতে বিভিন্ন সংগঠনে ধাৰাবাহিক আন্দোলন আৰু সংবাদ মাধ্যমত বাতৰি প্ৰকাশ কৰাৰ ফলত নিযুক্তি প্ৰক্ৰিয়াত অভাৰলেপিং আঁতৰ কৰাৰ কথা ঘোষণা কৰিছে। কিন্তু এই কাম কেনেকৈ কৰিব তাৰ কোনো সুনিৰ্দিষ্ট ঘোষণা কৰা হোৱা নাই। এই কাম ৱেইটিং লিষ্ট প্ৰকাশ কৰাৰ মাজেৰে হ’ব নে পদ বাছনি কৰাৰ সুবিধা প্ৰদানৰ মাজেৰে হ’ব সেয়া স্পষ্ট নহয়। এক স্পষ্ট নীতি নাথাকিলে বক্ৰপথেৰে নিযুক্তি পোৱাৰ সম্ভাৱনা প্ৰকট হ’ব।
ডি ৱাই এফ আইয়ে মুখ্যমন্ত্ৰীৰ নিশাৰ ঘোষণাৰ পৰিৱৰ্তে স্বচ্ছ আৰু নিকা নিযুক্তি দিবলৈ কেইটামান গুৰুত্বপূৰ্ণ দাবী উত্থাপন কৰিছে।
ফলাফল ঘোষণা কৰি এখন Consolidated Merit List (একত্ৰিত তালিকা) প্ৰকাশ কৰক। কোনো প্ৰাৰ্থীয়ে পদত যোগদান নকৰিলে তাক যাতে সহজতে পূৰণ কৰিব পৰা যায় তাৰ বাবে অপেক্ষাৰ তালিকা (Waiting List) প্ৰকাশ কৰক।
অনিয়মৰ আন এটা গুৰুত্বপূৰ্ণ সুৰঙা হ’ল- ভাইভা বা মৌখিক সাক্ষাৎকাৰ। এইটো আচৰিত যে – এজন বিষয় শিক্ষক, হাইস্কুলৰ শিক্ষক বা প্ৰাথমিক বিদ্যালয়ৰ শিক্ষক নিযুক্তিৰ বাবে কোনো মৌখিক সাক্ষাৎকাৰৰ ব্যৱস্থা নাই। কিন্তু তেনে বিদ্যালয়ত চতুৰ্থ বৰ্গ পদৰ নিযুক্তিৰ বাবে মৌখিক সাক্ষাৎকাৰৰ ব্যৱস্থা কৰা হৈছে। প্ৰধানমন্ত্ৰী মোদীয়ে ৰাজহুৱাকৈ আৰু মুখ্যমন্ত্ৰীয়ে বিধানসভাৰ মজিত ঘোষণা কৰিছিল যে – ভবিষ্যতে তৃতীয় আৰু চতুৰ্থ বৰ্গৰ পদত মৌখিক সাক্ষাৎকাৰৰ ব্যৱস্থা নাথাকিব। কিন্তু বাস্তৱত অদৃশ্য কাৰণত মৌখিক সাক্ষাৎকাৰৰ ব্যৱস্থা কৰিছে আৰু ইয়াৰ মাজেৰে মূল স্বজন-তোষণৰ কামবোৰ কৰি গৈছে। প্ৰকৃততে বাহিৰত বিৰাট চেকিং আৰু স্বচ্ছ-নিকা নিযুক্তিৰ শ্লোগান দিয়াৰ বিপৰীতে দুৰ্নীতি কৰাৰ সুৰঙাসমূহ সুন্দৰভাৱে ৰখাই থৈছে। একেদৰে স্বচ্ছতাৰে পৰীক্ষা পতাৰ কথা কোৱা এইজন মুখ্যমন্ত্ৰীৰ আজব নিৰ্দেশৰ বাবেই এখন বেঞ্চত তিনিজনকৈ প্ৰাৰ্থী একেলগে পৰীক্ষা দিবলগীয়া হৈছে।
OMR Sheetৰ কাৰ্বন কপি পৰীক্ষা দিয়েই প্ৰাৰ্থীয়ে লগত লৈ অনাৰ সলনি OMR শ্বীটৰ ফটো কপিৰ নামত ৫০ টকাৰ বিনিময়তহে লাভ কৰাৰ সুবিধা কৰা হৈছে। যোৱা বৰ্ষৰ নিযুক্তি পৰীক্ষাত অৱতীৰ্ণ ১৪ লাখ প্ৰাৰ্থীৰ পৰা সংগ্ৰহীত ৪০ কোটিতকৈ অধিক টকাৰ এটা টকাও ঘূৰাই নিদি এতিয়া কিয় অ’ এম আৰৰ কপিৰ বাবদ ৫০ টকা গ্ৰহণ কৰা যুক্তি ক’ত? অন্যহাতে ৫০০ টকা মাচুল ধাৰ্য কৰা হৈছে Answer Keyত ভুল আঙুলিয়াই দিয়াৰ বাবদ। ইমান বেছি মাচুল হ’লে আনুষ্ঠানিকভাৱে ভুল আঙুলিয়াই দিবলৈ কোনো আগবাঢ়ি নাহিব।
এই সমগ্ৰ ঘটনাৱলীয়ে চৰকাৰৰ পৰিকল্পনাহীন নিযুক্তিৰ স্বৰূপ উদঙাইছে। চৰকাৰে নিজাববীয়াকৈ তেঁওলোকৰ তৃতীয় আৰু চতুৰ্থ বৰ্গৰ নিযুক্তি পৰীক্ষাৰ আয়োগক ব্যৱহাৰ সঠিক নিয়ম-নীতি প্ৰস্তুত কৰাৰ সলনি ৰাইজে ভুল-ত্ৰুটি আঙুলিয়াই দিয়াৰ পাছত প্ৰতিটো পদক্ষেপত নতুন নিয়ম প্ৰস্তুত কৰাত লাগিছে। লাইভ দি প্ৰশংসা বুটলাৰ সলনি স্বচ্ছ আৰু নিকা নিযুক্তিৰে পৰীক্ষা অনুষ্ঠিত কৰাত চৰকাৰে মনোনিৱেশ কৰা উচিত বুলি ডি ৱাই এফ আইয়ে দৃঢ় মত পোষণ কৰে।
