প্ৰাচীন সংস্কৃত গ্ৰন্থ ‘মনুস্মৃতি’ আৰু মোগল সম্ৰাট বাবৰ আত্মজীৱনী ‘বাবৰনামা’ দিল্লী বিশ্ববিদ্যালয়ৰ স্নাতকৰ ইতিহাসৰ পাঠ্যক্ৰমত অন্তৰ্ভুক্ত কৰাৰ সিদ্ধান্তক লৈ তীব্ৰ বিতৰ্কৰ সৃষ্টি হয়।
এই বিতৰ্কৰ মাজতে বিশ্ববিদ্যালয়খনৰ উপাচাৰ্য যোগেশ সিঙে স্পষ্টভাৱে উল্লেখ কৰে যে এই প্ৰস্তাৱ প্ৰত্যাহাৰ কৰা হ’ব আৰু একাডেমিক কাউন্সিলৰ বৈঠকত এই প্ৰস্তাৱ দাখিল কৰা নহ’ব।
মঙলবাৰে প্ৰকাশিত এক প্ৰতিবেদন অনুসৰি যোগেশ সিঙে কয় যে, “মই উপাচাৰ্য হিচাপে মোৰ জৰুৰীকালীন ক্ষমতা ব্যৱহাৰ কৰিবলৈ ওলাইছো আৰু পাঠ্যক্ৰমত ‘মনুস্মৃতি’ আৰু ‘বাবৰনামা’ অন্তৰ্ভুক্ত কৰাৰ প্ৰস্তাৱ দাখিল কৰিবলৈ নিদিওঁ। আমি এই প্ৰস্তাৱ প্ৰত্যাহাৰ কৰি বিকল্প বিষয়ৰ কথা চিন্তা কৰিম।”
উল্লেখযোগ্য যে যোৱা ১৯ ফেব্ৰুৱাৰীত বিশ্ববিদ্যালয়খনৰ ইতিহাস বিভাগৰ যৌথ পাঠ্যক্ৰম সমিতিয়ে মনুস্মৃতি আৰু বাবৰনামক পাঠ্যক্ৰমত অন্তৰ্ভুক্ত কৰাৰ প্ৰস্তাৱত অনুমোদন জনাইছিল। অৱশ্যে এই সিদ্ধান্তত এতিয়াও একাডেমিক কাউন্সিল আৰু কাৰ্যবাহী পৰিষদে অনুমোদন জনোৱা নাই।
যোগেশ সিঙে কয়, “ৰাষ্ট্ৰীয় শিক্ষা নীতি (এন ই পি) ২০২০ মানি চলি আমি এখন উন্নত ভাৰত নিৰ্মাণৰ বাবে কাম কৰি আছো। এয়া একবিংশ শতিকা আৰু দিল্লী বিশ্ববিদ্যালয়ৰ ছাত্ৰ-ছাত্ৰীয়ে এনে পুৰণি বিষয় অধ্যয়ন নকৰে।”
কিন্তু পাঠ্যক্ৰম সমিতিৰ সদস্যকে ধৰি ইতিহাস বিভাগৰ একাংশ অধ্যাপকে মনুস্মৃতি অন্তৰ্ভুক্ত কৰাৰ প্ৰস্তাৱৰ সপক্ষে যুক্তি দাঙি ধৰিছে যে জাতি আৰু লিংগ বৈষম্য বুজিবলৈ ই অতি প্ৰয়োজনীয়।
