বিহাৰত বিশেষ ভোটাৰ তালিকা পুনৰীক্ষণক লৈ বিতৰ্কৰ মাজতে নিৰ্বাচন আয়োগে এটা ডাঙৰ সিদ্ধান্ত লৈছে বুলি সূত্ৰই প্ৰকাশ কৰিছে। আয়োগৰ সূত্ৰ অনুসৰি বিহাৰ নিৰ্বাচনৰ লগে লগে ভোটাৰ তালিকা সংশোধনৰ কাম আৰম্ভ হ’বলৈ গৈ আছে। ইয়াৰ বাবে আয়োগে ১০ ছেপ্টেম্বৰত দিল্লীত এখন বিশেষ বৈঠক আহ্বান কৰি ৰাজ্যসমূহৰ মতামত গ্ৰহণ কৰিছে।
সূত্ৰসমূহে জনোৱা মতে, ১০ ছেপ্টেম্বৰত দিল্লীত দেশৰ সকলো মুখ্য নিৰ্বাচনী বিষয়াক বৈঠকৰ বাবে মাতি অনা হৈছে। এই সন্দৰ্ভত বিতং আলোচনা হ’ব। এই বৈঠকত মুখ্য নিৰ্বাচন আয়ুক্ত জ্ঞানেশ কুমাৰৰ লগতে অন্যান্য আয়ুক্তসকল উপস্থিত থাকিব। প্ৰসংগক্ৰমে বিহাৰত নিৰ্বাচনৰ পূৰ্বে ভোটাৰ তালিকা পুনৰীক্ষণক লৈ বিৰোধী দলসমূহে বিজেপিক আক্ৰমণ কৰিছে।
কেৱল আৰজেডি, কংগ্ৰেছেই নহয়, বাওঁপন্থী দল, তৃণমূল কংগ্ৰেছ, সমাজবাদী পাৰ্টিয়েও বিৰোধিতা কৰিছে। আটাইকেইজনে অভিযোগ কৰিছে যে বিৰোধীৰ নাম বাছনি কৰি বাদ দিয়া হৈছে। মূলতঃ দলসমূহে কেন্দ্ৰত থকা শাসকীয় দলটোক আগন্তুক নিৰ্বাচনত বিশেষ সুবিধা লাভৰ বাবে আয়োগক অস্ত্ৰ হিচাপে ব্যৱহাৰ কৰাৰ অভিযোগ উত্থাপন কৰিছে।
মন কৰিবলগীয়া যে, এইবাৰ বিহাৰৰ বাহিৰেও অহা বছৰ পশ্চিম বংগ, অসম, তামিলনাডু, কেৰালা আৰু পুডুচেৰীত নিৰ্বাচন আছে। সূত্ৰসমূহে প্ৰকাশ কৰা অনুসৰি বিহাৰৰ পিছত সমগ্ৰ দেশতে বিশেষ ভোটাৰ তালিকা সংশোধনৰ কাম আয়োগে সম্পন্ন কৰিব। যাৰ ওপৰত ইণ্ডিয়া আৰু এন ডি এ মিত্ৰজোঁটৰ মাজত প্ৰতিদ্বন্দ্বিতা শিখৰত উপনীত হ’ব পাৰে।
ইয়াৰ পূৰ্বে কংগ্ৰেছ নেতা ৰাহুল গান্ধীয়ে আয়োগক পাৰমাণৱিক বোমা বিস্ফোৰণ আৰু ভোটৰ ৰিগিঙৰ অভিযোগ উত্থাপন কৰিছিল। ইয়াৰ লগে লগে তৃণমূলৰ নেত্ৰী মমতা বেনাৰ্জী আৰু তামিল ডি এম কেৰ মুখ্যমন্ত্ৰী এম কে ষ্টেলিনে ভোটাৰ তালিকা পুনৰীক্ষণৰ তীব্ৰ বিৰোধিতা কৰিবলৈ আৰম্ভ কৰে। তৃণমূলৰ নেতা অভিষেক বেনাৰ্জীয়ে পোনপটীয়াকৈ হুংকাৰ দিছে যে যদি কোনো এজন বৈধ ভোটাৰকো তালিকাৰ বাহিৰত বাদ দিয়া হয় তেন্তে দিল্লীত প্ৰতিবাদ বিয়পি পৰিব।
