অসমত পুনৰ উত্তপ্ত হৈ উঠিছে নাগৰিকত্বৰ প্ৰসংগত। কেন্দ্ৰীয় চৰকাৰে ইমিগ্ৰেচন এণ্ড ফৰেইনাৰ্ছ এক্ট, ২০২৫ কাৰ্যকৰী কৰাৰ পিছতে ৰাজ্যত ব্যাপক চৰ্চা আৰু প্ৰতিবাদী কাৰ্যসূচীৰে উত্তপ্ত হৈ পৰিছে। এই পৰিস্থিতিত বিজেপিৰ ৰাজ্যিক সভাপতি তথা সাংসদ দিলীপ শইকীয়াই তাৎপৰ্যপূৰ্ণ ভাবে কয় যে ভাৰতত কোনো হিন্দু বিদেশী নহয়। লগতে বিশিষ্ট চিন্তাবিদ ড° হীৰেন গোহাঁইৰ মন্তব্য সন্দৰ্ভতো তেওঁ তীব্ৰ প্ৰতিক্ৰিয়া প্ৰকাশ কৰিছে।
উল্লেখ্য যে কেন্দ্ৰীয় চৰকাৰে ২ ছেপ্টেম্বৰত ইমিগ্ৰেচন এণ্ড ফৰেইনাৰ্ছ এক্ট, ২০২৫ সন্দৰ্ভত অধিসূচনা প্ৰকাশ কৰাৰ পিছতে অসমত ব্যাপক প্ৰতিবাদৰ সৃষ্টি হৈছে। এই আইনখনে আফগানিস্তান, পাকিস্তান আৰু বাংলাদেশৰ পৰা ধৰ্মীয় নিৰ্যাতনৰ বলি হৈ ২০২৪ চনৰ ৩১ ডিচেম্বৰলৈকে ভাৰতলৈ অহা হিন্দু, শিখ, বৌদ্ধ, জৈন, পাৰ্চী আৰু খ্ৰীষ্টান ধৰ্মৰ লোকসকলক বিশেষ ৰেহাই প্ৰদান কৰে। ৰাজ্যৰ বিভিন্ন দল-সংগঠনে এই আইনৰ বিৰোধিতা কৰি প্ৰতিবাদ সাব্যস্ত কৰিছে।
ইয়াৰ উপৰিও অসম চৰকাৰে অ-মুছলমান লোকৰ বিৰুদ্ধে বিদেশী ন্যায়াধীকৰণত চলি থকা গোচৰ প্ৰত্যাহাৰ কৰাৰ নিৰ্দেশনা দিয়াক লৈও উত্তপ্ত হৈ পৰিছে ৰাজ্য।
ইফালে শুকুৰবাৰে নিশা গোৰেশ্বৰৰ শুক্লাইত তামুলপুৰ জিলা বিজেপিৰ পাঁচটা সমষ্টিৰ মূখ্য কমিটীৰ নিৰ্বাচনী বৈঠক অনুষ্ঠিত হয়। দিলীপ শইকীয়াই এই বৈঠকত অন্তত সংবাদ মাধ্যমৰ সৈতে হোৱা বাৰ্তালাপত কয় যে ভাৰতত থকা বঙালী ভাষী হিন্দু বা বাংলাদেশত থকা বঙালী ভাষী হিন্দু—কোনো হিন্দুৱেই বিদেশী নহয়। তেওঁ কয়, “বঙালী হিন্দু, অসমীয়া হিন্দু বা বিহাৰী হিন্দু বুলি কোনো কথা নাই। সনাতনী হিন্দু বা হিন্দুস্তানৰ মূল অভিবাসী সকলোৰে সংৰক্ষণ, শৰণ আৰু প্ৰয়োজন সাপেক্ষে সুৰক্ষা দিয়াতো আমাৰ নৈতিক দায়িত্ব আৰু কৰ্তব্য। গতিকে কোনো হিন্দুৱে ভাৰতবৰ্ষত অসুৰক্ষিত অনুভৱ কৰিব নালাগে।”
শেহতীয়াকৈ ড° হীৰেন গোহাঁইয়ে বিজেপিৰ আগ্ৰাসী ৰাজনীতিৰ বাবে অসমীয়া জাতিৰ বিপদ বৃদ্ধি পাইছে বুলি মন্তব্য কৰিছিল। এই মন্তব্য সন্দৰ্ভত দিলীপ শইকীয়াই তীক্ষ্ণ বাক্যবান প্ৰয়োগ কৰি কয় যে হীৰেন গোহাঁইৰ বাবে অসমত বহু সমস্যা হৈছে। তেওঁৰ এই মন্তব্যই ৰাজ্যৰ ৰাজনৈতিক পৰিৱেশত নতুন চৰ্চাৰ সৃষ্টি কৰিছে। এই ঘটনাই অসমত নাগৰিকত্ব আৰু ধৰ্মীয় সংখ্যালঘুৰ প্ৰসংগত চলি থকা বিতৰ্কক আৰু তীব্ৰতৰ কৰিছে।
