জে ই ই আৰু নীট পৰীক্ষা এক কৰাৰ পৰিকল্পনা কেন্দ্ৰীয় চৰকাৰ : হ’ব পাৰে উমৈহতীয়া প্ৰৱেশ পৰীক্ষা
কেন্দ্ৰীয় চৰকাৰে এতিয়া দেশৰ অভিযান্ত্ৰিক আৰু চিকিৎসা বিজ্ঞানৰ নামভৰ্তিৰ বাবে এটা উমৈহতীয়া ৰাষ্ট্ৰীয় প্ৰৱেশ পৰীক্ষা অনুষ্ঠিত কৰাৰ সম্ভাৱনা পৰীক্ষা কৰি চাইছে। শেহতীয়াকৈ অনুষ্ঠিত হোৱা নীট-ইউজি ২০২৬ পৰীক্ষাৰ প্ৰশ্নকাকত ফাদিল হোৱাৰ পাছত পৰীক্ষাৰ খেলিমেলি সন্দৰ্ভত গঠন কৰা সংসদীয় সমিতিক চৰকাৰী বিষয়াসকলে এই পৰিকল্পনাৰ কথা জানিবলৈ দিছে।
বৰ্তমান চৰকাৰৰ মাজত চলি থকা এই আলোচনা আচলতে এখন উচ্চস্তৰীয় কমিটিৰ পৰামৰ্শৰ ওপৰত আধাৰিত। ২০২৪ বৰ্ষৰ নীট-ইউজি পৰীক্ষাত হোৱা বিসংগতিৰ পাছত ভাৰতীয় মহাকাশ গৱেষণা সংস্থা অৰ্থাৎ ইছৰোৰ প্ৰাক্তন মুৰব্বী ডক্তৰ কে ৰাধাকৃষ্ণণৰ নেতৃত্বত এখন কমিটি গঠন কৰা হৈছিল। এই কমিটিখনে ৰাষ্ট্ৰীয় পৰীক্ষা সংস্থা অৰ্থাৎ এন টি এৰ দ্বাৰা অনুষ্ঠিত হোৱা পৰীক্ষাবোৰৰ ব্যাপক সংস্কাৰ কৰাৰ বাবে এটা ৰোডমেপ তৈয়াৰ কৰিছিল আৰু তাত স্নাতক পৰ্যায়ৰ নামভৰ্তিৰ বাবে এটা উমৈহতীয়া পৰীক্ষা ব্যৱস্থা গঢ়ি তোলাৰ পৰামৰ্শ দিয়া হৈছিল।
এই নতুন ব্যৱস্থাটো কাৰ্যকৰী হ’লে দেশত জে ই ই আৰু নীটৰ দৰে ডাঙৰ পৰীক্ষাবোৰ এটা উমৈহতীয়া পৰিকাঠামোৰ অধীনলৈ আহিব। ইয়াত বিভিন্ন শাখাৰ শিক্ষাৰ্থীসকলৰ বাবে বিষয় অনুসৰি বেলেগ বেলেগ ভাগ থাকিব, যাৰ জৰিয়তে চিকিৎসা আৰু অভিযান্ত্ৰিক দুয়োটা বিভাগৰে নামভৰ্তি প্ৰক্ৰিয়া একেলগে চম্ভালিব পৰা যাব।