উন্নয়নৰ জিলিকা ছবি দেখুৱাই ক্ষমতা দখল কৰা বিজেপি নেতৃত্বাধীন নতুন চৰকাৰখনে কাৰ্যকালৰ আৰম্ভণিতেই ৰাজ্যখনক এক ভয়ংকৰ ঋণৰ গৰাহলৈ ঠেলি দিছে। নিৰ্বাচনী বৈতৰণী পাৰ হৈয়েই জনসাধাৰণৰ মূৰত মাধমাৰ শোধাই মুখ্যমন্ত্ৰী হিমন্ত বিশ্ব শৰ্মাৰ চৰকাৰে অহা ২৬ মে’ত পুনৰ ৭৫০ কোটি টকাৰ বৃহৎ ঋণ ল’বলৈ সাজু হৈছে। চৰকাৰী বণ্ড বন্ধকত থৈ ল’বলগীয়া এই ঋণৰ বিপৰীতে বছৰি ৭.৬২ শতাংশ হাৰত বৃহৎ পৰিমাণৰ সুত ভৰিব লাগিব ৰাজ্যৰ জনসাধাৰণে। এই সন্দৰ্ভত বিত্ত বিভাগে ইতিমধ্যে জাননীও জাৰি কৰিছে।
আটাইতকৈ আশ্বৰ্যজনক কথাটো হ’ল, যোৱা ১২ মে’ত যিটো সময়ত নতুন চৰকাৰখনে আড়ম্বৰপূৰ্ণভাৱে শপত গ্ৰহণ কৰি আছিল, ঠিক সেই দিনাই চৰকাৰে ১,০০০ কোটি টকাৰ ঋণ লৈ নিজৰ কাৰ্যকালৰ ‘অভিষেক’ কৰিছিল। অহা ২৬ মে’ত ল’বলগীয়া ৭৫০ কোটি টকাৰ ঋণ হ’ব এই নতুন চৰকাৰখনৰ মাত্ৰ দুটা সপ্তাহৰ ভিতৰত লোৱা দ্বিতীয়টো ডাঙৰ ঋণ।
কেৱল চলিত বৰ্ষতে (বর্তমানলৈকে) বিজেপি চৰকাৰে লোৱা মুঠ ঋণৰ পৰিমাণ হৈছে ১১,৮০০ কোটি টকা।
বিগত ৫ বছৰীয়া কাৰ্যকালত এই এন ডি এ চৰকাৰখনে অসমৰ জনসাধাৰণক ইমানেই ঋণগ্ৰস্ত কৰি তুলিছে যে বৰ্তমান ৰাজ্যৰ মুঠ ঋণৰ পৰিমাণে ২ লাখ কোটি টকাৰ সীমা ইতিমধ্যে অতিক্ৰম কৰিছে। বিত্তীয় অনুশাসন সম্পূৰ্ণৰূপে ভংগ কৰি চৰকাৰে কেৱল ধাৰৰ টকাৰে হিতাধিকাৰী সৃষ্টি আৰু চমক সৃষ্টিৰ ৰাজনীতি চলাই থকাৰ অভিযোগ উত্থাপন হৈছে।
যিখন চৰকাৰে কাৰ্যকালৰ প্ৰথম মাহটোতে দুবাৰকৈ বৃহৎ ঋণ ল’বলগা হৈছে, সেইখন চৰকাৰে অনাগত দিনবোৰত ৰাজ্যৰ অৰ্থনীতি কেনেকৈ চম্ভালিব, তাক লৈ ডাঙৰ প্ৰশ্নবোধক চিহ্নৰ সৃষ্টি হৈছে। ‘ডাবল ইঞ্জিন’ চৰকাৰৰ ফোপোলা স্বৰূপটো এতিয়া উদং হৈ পৰিছে। ৰাজ্যৰ ৰাজহ বৃদ্ধিৰ কোনো সুনিৰ্দিষ্ট পৰিকল্পনা নকৰি, কেৱল ধাৰে-ঋণে চৰকাৰ চলোৱাৰ এই ভয়ংকৰ প্ৰৱণতাই অসমক এক দেউলীয়া ৰাজ্যৰ দিশে গতি কৰোৱাটো প্ৰায় নিশ্চিত হৈ পৰিছে।
