ৰাষ্ট্ৰীয় শিক্ষা গৱেষণা আৰু প্ৰশিক্ষণ পৰিষদে অষ্টম শ্ৰেণীৰ সমাজ বিজ্ঞানৰ পাঠ্যপুথিত কেইবাটাও সালসলনি কৰিছে। বিশেষকৈ এই নতুন গ্ৰন্থত দিল্লী চুলতান আৰু মোগল যুগৰ ধৰ্মীয় অসহিষ্ণুতাৰ কেইবাটাও উদাহৰণৰ ওপৰত আলোকপাত কৰা হৈছে।
চুলতান আৰু মোগল যুগৰ সামাজিক ইতিহাস এই গ্ৰন্থত প্ৰথমবাৰৰ বাবে সন্নিবিষ্ট কৰা হৈছে। য’ত মোগল বংশৰ প্ৰতিষ্ঠাপক বাবৰক ‘নিষ্ঠুৰ আৰু নিৰ্দয় সম্ৰাট’ বুলি বৰ্ণনা কৰা হৈছে।
উল্লেখ আছে যে তেওঁ নগৰৰ সকলো বাসিন্দাক বধ কৰিছিল। মোগল সম্ৰাট আকবৰক ‘অত্যাচাৰ আৰু সহনশীলতাৰ মিশ্ৰণ’ বুলি অভিহিত কৰা হৈছে। গ্ৰন্থখনত ঔৰংজেবক মন্দিৰ আৰু গুৰদ্বাৰ ভাঙি পেলোৱাৰ নায়ক হিচাপে চিনাক্ত কৰা হৈছে। এই সমাজ বিজ্ঞানৰ কিতাপখনত এনচিইআৰটিয়েও এটা ডিচক্লেইমাৰ সংযোজন কৰিছে। ইতিহাসৰ কিছুমান অন্ধকাৰ যুগৰ ওপৰত টোকা শীৰ্ষক এই টোকা শিতানত উল্লেখ আছে যে অতীতৰ এইবোৰ পৰিঘটনাৰ বাবে আজি কাকো দোষী সাব্যস্ত কৰিব নোৱাৰি।
এনচিইআৰটিয়ে প্ৰকাশ কৰিছে অষ্টম শ্ৰেণীৰ সমাজ বিজ্ঞান গ্ৰন্থৰ প্ৰথম খণ্ড। নাম দিয়া হৈছে ‘এক্সপ্ল’ৰিং ছ’চাইটি: ইণ্ডিয়ান এণ্ড বিয়ণ্ড’। চলিত শিক্ষাবৰ্ষৰ পৰাই এই গ্ৰন্থখনৰ পৰিচয় দিয়া হৈছে। যদিও ত্ৰয়োদশ-১৮ শতিকাৰ ইতিহাস ইতিমধ্যে সপ্তম শ্ৰেণীৰ কিতাপখনৰ পাঠ্যত অন্তৰ্ভুক্ত কৰা হৈছে। কিন্তু সংগঠনটোৱে কয় যে নতুন পাঠ্যক্ৰমত অষ্টম শ্ৰেণীৰ ছাত্ৰ-ছাত্ৰীক দিল্লী চুলতান, মোগল আৰু মাৰাঠা সাম্ৰাজ্যৰ পৰিচয় দিয়া হৈছে।গ্ৰন্থখনৰ এটা অধ্যায় – ‘Reshaping India’s Political Map’ত ত্ৰয়োদশ শতিকাৰ পৰা ১৭ শতিকাৰ ইতিহাস সামৰি লোৱা হৈছে। ইয়াৰ ভিতৰত চুলতানত্বৰ উত্থান-পতন আৰু বিজয়নগৰ সাম্ৰাজ্যৰ সংগ্ৰামসমূহ অন্তৰ্ভুক্ত। মোগল যুগৰ উত্থান-পতনৰ লগতে ইয়াত মাৰাঠা আৰু শিখ শক্তিৰ উত্থানৰ কথাও তাত উল্লেখ আছে।
