মানুহে তেওঁক ‘পৃথিৱীৰ আটাইতকৈ দয়ালু বিচাৰক’ বুলি মনত ৰাখিব। কেৱল বিচাৰকেই নহয়, তেওঁ ছ’চিয়েল মিডিয়াৰ তাৰকাও আছিল। তেওঁৰ বিচাৰ আৰু ৰায়দানত সমগ্ৰ বিশ্বই মুগ্ধ হৈ পৰিছিল। তেওঁৰ অনুৰাগী নথকা দেশ নাই। সেই ফ্ৰেংক কেপ্ৰিঅ’ৰ দেহাৱসান ঘটিছে।
বহুদিন কেন্সাৰৰ সৈতে যুঁজি অৱশেষত তেওঁ পৰাস্ত হয়। জীৱনৰ শেষ দিনটোলৈকে বিচাৰক হিচাপে থকা ‘পৃথিৱীৰ আটাইতকৈ ভাল বিচাৰক’ ৮৮ বছৰ বয়সত শেষ নিশ্বাস ত্যাগ কৰে। মৃত্যুৰ ২৪ ঘণ্টা পূৰ্বে ফ্ৰেংকে নিজৰ ছ’চিয়েল মিডিয়া পেজত এটা ভিডিঅ’ পোষ্ট কৰিছিল। তাত তেওঁ নিজৰ লাখ লাখ অনুৰাগীক তেওঁৰ আৰোগ্যৰ বাবে প্ৰাৰ্থনা কৰিবলৈ অনুৰোধ জনায়।
অভিযুক্তও ফ্ৰেংকৰ অনুৰাগী হৈ পৰিছিল
ইনষ্টাগ্ৰামকে ধৰি ফ্ৰেংকৰ সকলো ছ’চিয়েল মিডিয়াত ভিডিঅ’টো পোষ্ট কৰাৰ পিছত নিমিষতে ভাইৰেল হৈ পৰে। ঠিক যেনেকৈ তেওঁৰ প্ৰতিটো আদালতৰ বিচাৰ প্ৰক্ৰিয়া ভাইৰেল হৈ পৰিছে। ছচিয়েল মিডিয়াত বিভিন্ন ভিডিঅ’ আৰু চুটি ভিডিঅ’ত ফ্ৰেংক কেপ্ৰিঅ’ৰ আদালতৰ বিচাৰ প্ৰক্ৰিয়া দেখা নোপোৱা লোক কমেইহে আছে। তেওঁৰ নাম নজনাসকলেও তেওঁৰ মুখখন চাই ক’ব পাৰে যে তেওঁ সেইজন ন্যায়াধীশ যাৰ মানৱতা আইনী প্ৰক্ৰিয়াতো আদালতৰ কক্ষত দেখা যায়। অভিযুক্তজনো ফ্ৰেংকৰ অনুৰাগী হৈ পৰিছিল।
মৃত্যুৰ কেইঘণ্টামান আগতে শেষৰ ভিডিঅ‘টো
মৃত্যুৰ কেইঘণ্টামান পূৰ্বে কেপ্ৰিঅ’ই নিজৰ ইনষ্টাগ্ৰাম হেণ্ডেলত এটা ভিডিঅ’ পোষ্ট কৰিছিল। তাত তেওঁ অনুৰাগীসকলক পুনৰ তেওঁৰ বাবে প্ৰাৰ্থনা কৰিবলৈ কয়। ভিডিঅ’টোত ন্যায়াধীশ কেপ্ৰিঅ’ই কোৱা শুনা যায় যে, ‘যোৱা বছৰ মই আপোনালোকৰ পৰা প্ৰাৰ্থনা বিচাৰিছিলো। আপোনালোকৰ প্ৰাৰ্থনাৰ বাবেই মই কঠিন সময়ৰ পৰা ওলাই আহিব পাৰিলোঁ। দুৰ্ভাগ্যজনকভাৱে এইবাৰ মই আকৌ বিপদত পৰিছো। মই হস্পিতালত ভৰ্তি হৈ আছো। গতিকে মই আকৌ এবাৰ আপোনালোকৰ প্ৰাৰ্থনা বিচাৰিছো।’
তেওঁ লগতে কয়, ‘মই প্ৰাৰ্থনাৰ শক্তিত বিশ্বাস কৰোঁ। ঈশ্বৰে আমাৰ ওপৰত চকু ৰাখিছে। গতিকে অনুগ্ৰহ কৰি মোক আপোনালোকৰ প্ৰাৰ্থনাত মনত ৰাখিব।’ ভিডিঅ’টোৰ কেপচনত তেওঁ লিখিছে, ‘এই কঠিন যুঁজখন অব্যাহত ৰাখিছো। আপোনালোকৰ প্ৰাৰ্থনাই মোৰ মনোবল বৃদ্ধি কৰিব।’
পৰিয়ালৰ আৱেগিক বিবৃতি
বুধবাৰে কেপ্ৰিঅ’ৰ পৰিয়ালে ইনষ্টাগ্ৰাম যোগে তেওঁৰ মৃত্যুৰ খবৰ ঘোষণা কৰে। বিবৃতিটোত কোৱা হৈছে, দীৰ্ঘদিনীয়া আৰু সাহসী যুঁজৰ অন্তত শান্তিপূৰ্ণভাৱে মৃত্যু হয় ফ্ৰেংক কেপ্ৰিঅ’ই। তেওঁৰ মমতা, নম্ৰতা আৰু মানৱতাৰ প্ৰতি অটল বিশ্বাসেৰে লাখ লাখ মানুহৰ হৃদয় চুই গৈছিল। তেওঁ কেৱল এজন বিচাৰকেই নহয়, এজন আদৰ্শ স্বামী, পিতৃ, ককা, আজোককা আৰু প্ৰিয় বন্ধুও আছিল। তেওঁ অগণন মানুহক ভাল কাম কৰিবলৈ অনুপ্ৰাণিত কৰিছিল।
কোন আছিল ফ্ৰেংক কেপ্ৰিঅ’?
ফ্ৰেংক কেপ্ৰিঅ’ আমেৰিকাৰ ৰোড আইলেণ্ডৰ প্ৰভিডেন্স পৌৰ আদালতৰ ন্যায়াধীশ আছিল। জনপ্ৰিয় শ্ব’ ‘কেট ইন প্ৰভিডেন্স’ এই আদালতৰ নামত সৃষ্টি কৰা হৈছিল, যিয়ে এমি বঁটাৰ বাবেও মনোনয়ন লাভ কৰিছিল। তেওঁৰ আদালতৰ ৰায়দানৰ ভিডিঅ’ ভাইৰেল হৈছে ছ’চিয়েল মিডিয়াত। মানুহে এতিয়াও সেইবোৰ চায়। সাধাৰণ মানুহক ন্যায় প্ৰদান কৰা সৰল আৰু পোনপটীয়া বিচাৰ, হাস্যৰসৰ সৈতে মিহলি আচৰণ সকলোবোৰেই অভিযুক্তকো আপ্লুত কৰিছিল।
কেৱল আদালতৰ ভিডিঅ’ই নহয়, তেওঁ টিকটক আৰু ইনষ্টাগ্ৰামত ধেমেলীয়া ভিডিঅ’ পোষ্ট কৰিছিল, য’ত কেতিয়াবা ন্যায়াধীশৰ আসনত বহি ভাইৰেল ভিডিঅ’বোৰকেই ৰায়দান কৰিছিল। তেওঁৰ ইনষ্টাগ্ৰাম ফ’ল’ৱাৰ আছিল ৩২ লাখতকৈও অধিক।
