ভাৰতৰ প্ৰধান মন্ত্ৰীসকলক লৈ লিখা গ্ৰন্থ দি প্ৰমিজ অৱ ইন্দিয়া মুকলিৰ বাবে সাজু হৈছে অসম সন্তান, প্ৰাক্তন ভাৰতীয় উচ্চায়ুক্ত জৈমিনী ভাগৱতী।
নতুন দিল্লীৰ ইন্দিয়া ইণ্টাৰনেচনেল চেণ্টাৰত অহা ৮ আগষ্টত কিতাপখন উন্মোচন কৰা হ’ব।
কিতাপখনে সামৰি লোৱা বিষয়টো হৈছে “নেহৰুৰ পৰা মোদীলৈকে প্ৰধান মন্ত্ৰীসকলে দেশখন কিদৰে গঢ় দিছিল (১৯৪৭-২০১৯)”।
দেশখনক প্ৰগতি আৰু বিকাশৰ পথত প্ৰধান মন্ত্ৰীসকলে কিধৰণে আগুৱাই নিছিল সেয়া আলোচনাৰ বাবে ভাগৱতীয়ে কিতাপখনত জৱাহৰলাল নেহৰুৰ পৰা নৰেন্দ্ৰ মোদীলৈকে নেতাসকলৰ প্ৰধান ৰাজনৈতিক আৰু বৈদেশিক নীতি আৰু আৰ্থিক সিদ্ধান্তসমূহৰ বিশ্লেষণ কৰিছে।
ক্ষমতাৰ কৰিদ’ৰত দীৰ্ঘদিনীয়া অভিজ্ঞতাৰে ভাগৱতীয়ে বিভিন্ন ঘটনাৱলীৰ চিত্তাকৰ্ষক পশ্চাৎপটসমূহ পোহৰলৈ আনিছে আৰু প্ৰতিগৰাকী প্ৰধান মন্ত্ৰীৰে শাসনক নতুন অন্তৰ্দৃষ্টিৰে আলোকিত কৰিছে।
কিতাপখন সন্দৰ্ভত কূটনীতিবিদ তথা প্ৰাক্তন ৰাষ্ট্ৰীয় নিৰাপত্তা উপদেষ্টা শিৱশংকৰ মেননে কৈছে, “স্বাধীনতাৰ পৰা ভাৰতৰ আৰ্থিক আৰু বৈদেশিক নীতিসমূহৰ এক চিন্তাপূৰ্ণ আৰু সূক্ষ্ম বিবেচনা… ভাৰতীয় প্ৰধান মন্ত্ৰীসকলৰ প্ৰিজম ব্যৱহাৰেৰে এই গ্ৰন্থই বিশাল আৰু তাৎপৰ্য্যপূৰ্ণ বিষয়সমূহ (সকলোৰে বাবে) প্ৰৱেশসাধ্য কৰি তুলিছে।”
জৈমিনী ভাগৱতী অসমৰ প্ৰখ্যাত স্বাধীনতা সংগ্ৰামী তথা তেজপুৰ সমষ্টিৰ তিনিবাৰৰ সাংসদ বিজয় চন্দ্ৰ ভাগৱতীৰ পুত্ৰ।
ভাগৱতীয়ে বৈদেশিক পৰিক্ৰমা, বিত্ত আৰু আণৱিক শক্তিকে ধৰি ভাৰত চৰকাৰৰ বহু জ্যেষ্ঠ পদবীত কাৰ্য্যনিৰ্বাহ কৰিছিল।
তেওঁ ইউ কেত উচ্চায়ুক্তৰূপে কাৰ্য্যনিৰ্বাহ কৰাৰ লগতে ইউৰপিয়ান ইউনিয়ন, বেলজিয়াম আৰু লাগজেমবুৰ্গত ভাৰতীয় ৰাষ্ট্ৰদূত আছিল।
বিশ্ব বেংকত তেওঁ আছিল আন্তঃৰাষ্ট্ৰীয় ব’ন্দ আৰু দিৰাইভে’টিভছ মাৰ্কেটছৰ বিশেষজ্ঞ আছিল; তেওঁ ICRIER (Indian Council for Research on International Economic Relations)ত ৰিজাৰ্ভ বেংক চেয়াৰ অধ্যাপক আছিল।
তেওঁ বৰ্তমান IDFC (Infrastructure Development Finance Company)ৰ হ’ল্দিং কোম্পানিৰ ব’ৰ্দ সদস্য।
ভাগৱতী দিল্লীৰ চেণ্ট স্তিভেনছ কলেজৰ পৰা পদাৰ্থ বিজ্ঞানৰ, এমেৰিকাৰ এম আই টিৰ পৰা বিত্ত বিষয়ৰ স্নাতকোত্তৰ ডিগ্ৰীধাৰী আৰু তেওঁ বিত্ত বিষয়ত এমেৰিকাৰ টাফটছ বিশ্ববিদ্যালয়ৰ পৰা পি এইচ দি লাভ কৰিছিল।
আলোচিত গ্ৰন্থখন পেংগুইন ইন্দিয়াই প্ৰকাশ কৰিছে।
