অৰুণাচলৰ ৰাকছিন চিএইচ্চচিত ৰক্ত সংৰক্ষণ আৰু প্ৰসুতি কক্ষ
অৰুণাচলৰ পূব ছিয়াং জিলাৰ ৰাকছিনত থকা একমাত্ৰ সমূহীয়া স্বাস্থ্য কেন্দ্ৰ, তথা প্ৰথম প্ৰেৰণ কেন্দ্ৰত (FRU) ১২ ছেপ্টেম্বৰ বুধবাৰে প্ৰথমটো ৰক্ত সংৰক্ষণ গোট আৰু প্ৰসুতি কক্ষ উদ্বোধন কৰা হৈ যায়।
ৰাষ্ট্ৰীয় স্বাস্থ্য অভিযানৰ পুঁজিৰে এই দুটা গোট নিৰ্মাণ কৰা হয়। ৰাকছিন চিএইচ্চচিৰ প্ৰথম প্ৰেৰণ কেন্দ্ৰত ৰক্ত সংৰক্ষণ গোট আৰু প্ৰসুতি কক্ষ উন্মোচন কৰি অৰুণাচলৰ স্বাস্থ আৰু পৰিয়াল কল্যাণ মন্ত্ৰী আলো লিবাঙে কৈছে যে গ্ৰাম্য স্বাস্থ্য সেৱাক অধিক উন্নত কৰাৰ বাবে তেওংৰ চৰকাৰে ভালেমান প্ৰকল্প হাতত লৈছে। মন্ত্ৰীগৰাকীয়ে চিকিৎসক, নাৰ্ছ আৰু স্বাস্থ্য কৰ্মীসকলক ৰোগীসকলক মানৱ সেৱাৰ মনোভাৱেৰে ৰোগীসকলৰ সেৱা পৰিচৰ্যা কৰিবলৈ আহ্বান জনায়।
স্বাস্থ্য মন্ত্ৰীগৰাকীয়ে এলেকাটোৰ বিষয়া আৰু নেতাসকলক সু-সমন্বয়েৰে কাম কৰি চিকিৎসালয়খন মসৃণভাৱে চলাত সহায় কৰাৰ পৰিকল্পনা যুগুত কৰাৰ বাবে আহ্বান জনায়।
উল্লেখ্য যে ৰাকছিন হৈছে অসমৰ জোনাইৰ (ধেমাজি জিলা) সীমান্তবৰ্তী মহকুমা। অসমৰ ভালেমান দৰিদ্ৰ ৰোগীয়ে বিভিন্ন ৰোগৰ চিকিৎসাৰ বাবে নিয়মীয়াকৈ অৰুণাচলৰ ব্যক্তিগত কিংবা চৰকাৰী চিকিৎসালয়ৰ সেৱা গ্ৰহণ কৰি আহিছে।