কামৰূপ মহানগৰ জিলাৰ ৩টা কেন্দ্ৰত শুকুৰবাৰে ক’ভিড প্ৰতিষেধক প্ৰদানৰ দ্বিতীয়টো ড্ৰাই ৰাণ সম্পন্ন কৰা হয়৷
মহানগৰীৰ ধীৰেনপাৰা এফ আৰ ইউ আৰু নটবমা পি এইচ চিৰ লগতে আঠগাঁৱৰ মাৰোৱাৰী হাস্পতালত পুৱা ৯ বজাৰ পৰা এই অনুশীলন কৰা হয়৷
প্ৰতিটো কেন্দ্ৰতে প্ৰতিষেধক প্ৰদানৰ বাবে ২৫ জনকৈ হিতাধিকাৰী বাঁচনি কৰা হয়৷
ৰাজ্যিক স্বাস্থ্য সেৱা সঞ্চালক মনীন্দ্ৰ নাথ নাগটে, ৰাষ্ট্ৰীয় স্বাস্থ্য অভিযানৰ বিশেষ কৰ্তব্যৰত বিষয়া পমী বৰুৱা, সাৰ্বজনীন প্ৰতিষেধক আঁচনিৰ যুটীয়া সঞ্চালিকা ডা° বিনীতা গোস্বামী, ৰাজ্যিক শীতলীকৰণ বিষয়া বিমান চৌধুৰী আৰু জিলা প্ৰতিষেধক বিষয়া ডা° ভৱেন্দ্ৰ কুমাৰ দাসে কেন্দ্ৰকেইটা ভ্ৰমণ কৰি ড্ৰাই ৰাণ কাৰ্যসূচীৰ তদাৰক কৰে৷
এই অনুশীলনৰ সময়ত সংশ্লিষ্ট কেন্দ্ৰকেইটাত ইউনিচেফ আৰু বিশ্ব স্বাস্থ্য সংস্থাৰ প্ৰতিনিধিৰ লগতে ৰাষ্ট্ৰীয় স্বাস্থ্য অভিযানৰ জিলা আঁচনি প্ৰৱন্ধক, জিলা মিডিয়া বিশেষজ্ঞ, জিলা তথ্য প্ৰৱন্ধক, জিলা নগৰ স্বাস্থ্য সমন্বয়ক, জিলা সমন্বয়ক আৰু সহকাৰী তথ্য প্ৰৱন্ধকো উপস্থিত থাকে৷
ক’ভিড ভেকচিন প্ৰদান আৰম্ভ হোৱাৰ লগে লগে সকলো লোককে কোনো বিঘিনি নঘটাকৈ প্ৰতিষেধক প্ৰদান কৰাটো সুনিশ্চিত কৰাৰ লক্ষ্যৰে স্বাস্থ্য মন্ত্ৰালয়ে এই ড্ৰাই ৰাণ কাৰ্যসূচী ৰূপায়ণ কৰিছে৷
প্ৰকৃত প্ৰতিষেধক প্ৰদান কৰাৰ বাহিৰে আন সকলো প্ৰক্ৰিয়া এই ড্ৰাই ৰাণৰ সময়ত পালন কৰা হয়৷
ইতিমধ্যে যোৱা ২ জানুৱাৰীত গুৱাহাটী চিকিৎসা মহাবিদ্যালয় হাস্পতাল, খানাপাৰা ৰাজ্যিক চিকিৎসালয় আৰু সোণাপুৰ জিলা চিকিৎসালয়ত প্ৰথম পৰ্যায়ৰ ড্ৰাই ৰাণ সফলতাৰে সম্পন্ন হৈ যায়৷
