জ্ঞান-বিজ্ঞান সমিতি অসমৰ উদ্যোগত যোৱা ২৩ মে পৰা বোকাখাতৰ জাতীয় বিদ্যালয়ৰ বাকৰিত তিনিদিনীয়াকৈ অনুষ্ঠিত বিংশতম ৰাজ্যিক শিশু বিজ্ঞান সমাৰোহ ২০২৪ ৰ আজি সফল সামৰণি পৰে।
প্ৰয়াত বিজ্ঞানী ড° পদ্মেশ্বৰ গগৈ আৰু পদ্মশ্ৰী বিৰুবালা ৰাভাৰ সোৱঁৰণত উৎসৰ্গিত সমাৰোহ খনিৰ দ্বিতীয় দিনৰ কাৰ্য্যসূচী পূৱা ৯ বজাৰ পৰা অসম সংগীতেৰে আৰম্ভ কৰা হয়। ১২.৩০ বজালৈকে ছয়টা শিকন কোণত অসমৰ বিভিন্ন প্ৰান্তৰ প্ৰায় চাৰিশ ছাত্র ছাত্রীয়ে অংশগ্রহণ কৰে। প্ৰচণ্ড গৰমকো নেওচি ছাত্র ছাত্রী সকলৰ অংশগ্রহণে যথেষ্ট উৎসাহিত কৰে বিংশতম ৰাজ্যিক শিশু বিজ্ঞান সমাৰোহৰ অভ্যৰ্থনা সমিতিক।
আজিৰ তৃতীয় তথা অন্তিম দিনৰ কাৰ্য্যসূচী পূৱা ৯ বজাৰ পৰা অসম সংগীতেৰে আৰম্ভ কৰা হয়। ১০.৩০ বজালৈকে শিকন কোণত অসমৰ বিভিন্ন প্ৰান্তৰ প্ৰায় চাৰিশ ছাত্র ছাত্রীয়ে অংশগ্রহণ কৰে।
আমন্ত্ৰিত অতিথি সকলক পৰিচয় প্ৰদান কৰে সম্পাদক বিদ্যুৎ বিকাশ শইকীয়াই। ছাত্র ছাত্রী সকলে পাঁচটা জনগোষ্ঠীয় ভাষাত পৰিবেশন কৰা অসম সংগীতেৰে সভাখনৰ শুভাৰম্ভ কৰা হয়। লগতে সকলো ছাত্র ছাত্রীয়ে গীত মাত শিকন কোণৰ দুটি গীতত প্ৰাণঢালি সহযোগ কৰে।
সমাৰোহৰ তৃতীয় তথা অন্তিম দিনটোত বোকাখাত জাতীয় বিদ্যালয়ৰ ছাত্র ছাত্ৰীৰ দ্বাৰা সম্পাদিত “চেতনা আৰু “এজাৰ” নামৰ দুখন প্ৰাচীৰ পত্ৰিকা উন্মোচন কৰাৰ উপৰিও “মুক্তমন” নামেৰে এখন স্মৰণিকাও উন্মোচন কৰা হয়। স্মৰণিকাখন উন্মোচন কৰে এচটেকৰ প্ৰাক্তন সঞ্চালক ড° অশ্বিনী বৰুৱাই । চল্লিশ গৰাকী লিখকৰ বিভিন্ন বিষয়ৰ লিখনি সন্নিবিষ্ট তথা ড° ফাল্গুন চেতিয়া আৰু ঈপ্সিতা দত্তৰ দ্বাৰা সম্পাদিত স্মৰনিকা খনৰ মানদণ্ড অতি উন্নত হোৱা বুলিও মন্তব্য কৰে উন্মোচক ড০ বৰুৱাই।
আমন্ত্ৰিত অতিথি নুমলীগড় তেলশোধনাগাৰৰ মুখ্য মহাপ্ৰবন্ধক( মানৱ সম্পদ) ড° কাজল শইকীয়া সমাৰোহখনিত উপস্থিত থাকি তেখেতৰ বক্তব্যত সমাৰোহ খনিৰ পৰিবেশ শান্তি নিকেতনৰ লগত তুলনা কৰি সফলতাৰ বাবে কঠোৰ পৰিশ্ৰমৰ বিকল্প নাই বুলি মন্তব্য কৰে। আনহাতে জ্ঞান বিজ্ঞান সমিতি অসমৰ সভাপতি আৰু সম্পাদকে সমাৰোহৰ তিনিদিনৰ অভিজ্ঞতাৰে বিশেষ বক্তব্য আগবঢ়াই অনুষ্ঠানটোত।
দুপৰীয়া ১২.৩০ বজাৰ পৰা দুপৰীয়া আহাৰ পৰিবেশন কৰাৰ পিছতে বোকাখাতৰ জাতীয় বিদ্যালয়ৰ প্ৰেক্ষাগৃহত ১.৩০ বজাৰ পৰা শিশু সকলৰ দ্বাৰা পৰিবেশিত সাংস্কৃতিক অনুষ্ঠানৰ শুভাৰম্ভ কৰা হয় আৰু ৩.৩০ বজাত পতাকা অৱনমনেৰে ” বিংশতম ৰাজ্যিক শিশু বিজ্ঞান সমাৰোহ ২০২৪ “ৰ সমাপ্তি ঘোষণা কৰা হয়।
