ইতিহাসৰ পাঠ্যপুথিত থাকিব ৰামৰ বনবাসৰ কাহিনী : চৰকাৰলৈ প্ৰস্তাৱ NCERT ৰ

চৰকাৰে অনুমোদন দিলেই অতি সোনকালেই ইতিহাসৰ পাঠ্য-পুথিত সন্নিৱিষ্ট হ’ব ৰামায়ণৰ কাহিনী। ইতিহাসৰ পাঠ্যক্ৰমত থাকিব ৰামৰ জন্ম, শাসন আৰু বনবাসৰ কাহিনী। এই সময়ছোৱাৰ ইতিহাসক ধৰা হ’ব ‘ক্লাছিকেল পিৰিয়ড’ৰ ইতিহাস হিচাপে। ইতিমধ্যে এই সন্দৰ্ভত ‘নেচনেল কাউন্সিল অৱ এডুকেচনেল ৰিচাৰ্চ এণ্ড ট্ৰেইনিং চমুকৈ NCERT ৰ উচ্চ পৰ্যায়ৰ কমিটিয়ে চৰকাৰলৈ এই প্ৰস্তাৱ প্ৰেৰণ কৰিছে।

এন চি আৰ টিৰ এই কমিটীৰ অধ্যক্ষ চি আই আইজাকে কয়, “বৰ্তমানৰ ইতিহাসৰ পাঠ্যক্ৰমত ভাৰতৰ প্ৰাচীন ইতিহাস হিচাপে যি শিকোৱা হয়, সেইখিনি মূলতঃ বিদেশী আগ্ৰাসনৰ কথাহে কোৱা হয়। ইয়াত বিদেশী বাহিনীৰ বিষয়েহে বিতংভাৱে উল্লেখ কৰা হৈছে। যিসকলে আমাক আক্ৰমণ কৰি শাসন কৰিছিল, তেওঁলোকৰ কথা কোৱা হৈছে। মহাকাব্য যুগৰ ইতিহাস আৰু বৈদিক যুগৰ ইতিহাস গ্ৰন্থবোৰত নাই। যাৰ বাবে আমাৰ ল’ৰা-ছোৱালীয়ে ভাৰতৰ সোণালী যুগৰ কথা জনাৰ পৰা বঞ্চিত হৈ ৰয়। তেওঁলোকৰ পাঠ্যক্ৰমত ৰামায়ণ বা মহাভাৰত নাই। আমাৰ প্ৰথম বৈঠকত আমি ৰামক অন্তৰ্ভুক্ত কৰাৰ প্ৰস্তাৱ আগবঢ়াইছিলো। আমি কেৱল আক্ৰমণকাৰীৰ ইতিহাস কিয় পঢ়ো? আমাৰ গ্ৰন্থত ভাৰতৰ সোণালী যুগ কিয় নাই?”

ইয়াৰ পূৰ্বে আইজাকৰ নেতৃত্বত গঠিত সাতজনীয়া কমিটীয়ে ইতিহাসৰ কিতাপত দেশৰ নাম হিচাপে কেৱল ‘ভাৰত’হে ব্যৱহাৰ কৰিবলৈ পৰামৰ্শ দিছিল। ‘ক্লাছিকেল হিষ্ট্ৰী’ নামৰ নতুন অধ্যায় এটা যোগ কৰাৰ প্ৰস্তাৱ দি সমিতিয়ে পৰামৰ্শ দিয়ে যে ধ্ৰুপদী ইতিহাসত বেদৰ কিছু অংশ, বৈদিক যুগ, ৰামায়ণৰ গুৰুত্বপূৰ্ণ অংশ আৰু ৰজা হিচাপে ৰামৰ যাত্ৰাৰ কিছু অংশ অন্তৰ্ভুক্ত কৰা উচিত। 

আনহাতে আধুনিক ভাৰতৰ ইতিহাসত ব্ৰিটিছ শাসকসকলৰ কথা কমকৈ উল্লেখ কৰি নেতাজী সুভাষ চন্দ্ৰ বসু, শ্যামপ্ৰসাদ মুখোপাধ্যায়, চন্দ্ৰশেখৰ আজাদকে ধৰি ‘জাতীয় বীৰ’ৰ বিস্তৃত অধ্যায় অন্তৰ্ভুক্ত কৰিবলৈও কমিটীয়ে পৰামৰ্শ আগবঢ়ায়।