২০২৪ চনৰ জানুৱাৰী মাহত মুকলি হ’ব অযোধ্যাৰ ৰাম মন্দিৰ। ইয়াৰ পূৰ্বে ৰাম জন্মভূমি তীৰ্থ ক্ষেত্ৰ ন্যাসে এই মন্দিৰৰ পুৰোহিতৰ পদৰ বাবে বিজ্ঞাপন প্ৰচাৰ কৰিছে।
ইতিমধ্যে বিজ্ঞাপনটোৱে বিপুল সঁহাৰি পাইছে। ৰাম মন্দিৰ ন্যাসৰ এজন বিষয়াই কয় যে মাত্ৰ ২০টা খালী পদৰ বাবে কমেও ৩০০০ প্ৰাৰ্থীয়ে আবেদন কৰিছিল! কিন্তু সকলোৱে নিযুক্তি নাপাব। অতি জটিল হ’ব এই নিযুক্তি প্ৰক্ৰিয়া।
ন্যাসৰ বিষয়াসকলে জনোৱা মতে, ৩ হাজাৰ আবেদনকাৰীৰ ভিতৰত প্ৰথম অৱস্থাত ২০০ প্ৰাৰ্থীক মেধাৰ ভিত্তিত নিৰ্বাচিত কৰা হৈছে। তেওঁলোকৰ সাক্ষাৎকাৰ লোৱা হ’ব। ন্যাসে সাক্ষাৎকাৰৰ জৰিয়তে ২০০ জনৰ ভিতৰত ২০ জন প্ৰাৰ্থীক বাছনি কৰিব।
অযোধ্যাৰ কাৰ্ছেৱকপুৰমত থকা বিশ্ব হিন্দু পৰিষদৰ মুখ্য কাৰ্যালয়ত অনুষ্ঠিত হ’ব সাক্ষাৎকাৰৰ। সাক্ষাৎকাৰসমূহ পৰিচালনাৰ বাবে তিনিজনীয়া এটা পেনেল গঠন কৰা হৈছে। পেনেলত উপস্থিত থাকিব বৃন্দাবনৰ পুৰোহিত জয়কান্ত মিশ্ৰ আৰু অযোধ্যাৰ দুই মহন্ত – মিথিলেশ নন্দিনী সাৰণ আৰু সত্যনাৰায়ণ দাস।
সাক্ষাৎকাৰত কি কি প্ৰশ্ন সুধিব? ন্যাসৰ কোষাধ্যক্ষ গোবিন্দ দেৱ গিৰীয়ে কয়, “সন্ধ্যাবন্দন কি, ইয়াৰ পদ্ধতি কি আৰু এই পূজাৰ মন্ত্ৰ কি? ভগৱান ৰামক পূজা কৰাৰ মন্ত্ৰ কি আৰু ইয়াৰ বাবে কি কি কৰ্মৰ প্ৰয়োজন? এই ধৰণৰ প্ৰশ্ন পৰীক্ষাৰ্থীক সোধা হ’ব।”
সাক্ষাৎকাৰত নিৰ্বাচিত ২০ জন প্ৰাৰ্থীক পুৰোহিত হিচাপে নিযুক্তি দিয়া হ’ব। ইয়াৰ পিছত প্ৰদান কৰা হ’ব ছমাহৰ আৱাসিক প্ৰশিক্ষণ। প্ৰশিক্ষণ সমাপ্ত হোৱাৰ পিছত তেওঁলোকক ৰাম মন্দিৰৰ বিভিন্ন পুৰোহিতৰ পদত নিযুক্তি দিয়া হ’ব। ২০ জনৰ তালিকাত নিৰ্বাচিত নহ’লেও আন প্ৰাৰ্থীসোলে আৱাসিক প্ৰশিক্ষণ লোৱাৰ সুযোগ লাভ কৰিব। অযোধ্যাৰ শীৰ্ষ সন্তসকলে এই প্ৰশিক্ষণৰ বাবে ইতিমধ্যে ধৰ্মীয় পাঠ্যক্ৰম প্ৰস্তুত কৰিছে।
প্ৰশিক্ষণৰ সময়ত প্ৰাৰ্থীসকলে বিনামূলীয়াকৈ খাদ্য আৰু থকাৰ ব্যৱস্থা লাভ কৰিব। তদুপৰি তেওঁলোকে বৃত্তি হিচাপে প্ৰতিমাহে ২০০০ টকা লাভ কৰিব। ট্ৰাষ্টৰ কোষাধ্যক্ষ গোবিন্দ দেৱ গিৰীয়ে এই প্ৰাৰ্থীসকলক প্ৰশিক্ষণৰ পিছত বিশেষ প্ৰমাণ পত্ৰ প্ৰদান কৰা হ’ব বুলি জানিবলৈ দিয়ে।
ভৱিষ্যতে যদি কোনো পুৰোহিতৰ পদ খালী হয় বা অযোধ্যাৰ ৰাম মন্দিৰত নতুন পদৰ সৃষ্টি হয়, তেন্তে এই প্ৰশিক্ষণ গ্ৰহণ কৰা প্ৰাৰ্থী সকলক অগ্ৰাধিকাৰ দিয়া হ’ব।
