অসম চৰকাৰে ৰাজধানী ক্ষেত্ৰ সম্প্ৰসাৰণৰ বাবে যি সিদ্ধান্ত লৈছিল সেই সিদ্ধান্তক ৰাভা হাছঙৰ বিভিন্ন দল-সংগঠনে বিৰোধিতা কৰাৰ সমান্তৰালকৈ এতিয়া মৰিগাঁৱতো তীব্ৰ বিৰোধিতা কৰিছে বহুকেইটা তিৱা জাতীয় সংগঠনে।
মঙলবাৰে সদৌ তিৱা ছাত্ৰ সন্থা, তিৱা যুৱ-ছাত্ৰ পৰিষদ, সদৌ তিৱা সুৰক্ষা সমিতি, সদৌ তিৱা মহিলা সন্থা, মৰিগাঁও জিলা ট্ৰাইবেল সংঘ আৰু তিৱা মাথনলাই তখ্ৰা অৰ্থাৎ তিৱা সাহিত্য সভা আৰু স্বায়ত্ত শাসন দাবী সংগ্ৰামী মঞ্চই অসম চৰকাৰৰ ৰাজধানী ক্ষেত্ৰ সম্প্ৰসাৰণৰ সিদ্ধান্তক বিৰোধিতা কৰে।
মৰিগাঁও জিলা সাংবাদিক সংস্থাৰ কাৰ্যালয়ৰ সভাগৃহত মঙলবাৰে অনুষ্ঠিত এখন সংবাদমেলত তিৱা জাতীয় সংগঠনকেইটাৰ নেতৃবৃন্দই অভিযোগ কৰি কয় যে চৰকাৰে ৰাজধানী ক্ষেত্ৰ সম্প্ৰসাৰণ কৰি দক্ষিণ কামৰূপ ট্ৰাইবেল বেল্ট আৰু মৰিগাঁও জিলাৰ ৭টা ট্ৰাইবেল ব্লক সমূলন্সে নিঃচিহ্ন কৰাৰ পৰিকল্পনা ৰচিছে।
উল্লেখযোগ্য যে তিৱা স্বায়ত্ত পৰিষদৰ অন্তৰ্গত ২৬৮খন গাঁও আৰু তিনিটা ৰাজহ চক্ৰক ৰাজধানী সম্প্ৰসাৰণৰ ক্ষেত্ৰত সামৰি লোৱা হৈছে। ইয়াৰ জৰিয়তে চৰকাৰে তিৱা স্বায়ত্ত পৰিষদখনক অস্তিত্বহীন কৰাৰ এক কু অভিসন্ধিত লিপ্ত হোৱা বুলি অভিযোগ কৰে তিৱা সংগঠনৰ নেতৃবৃন্দই।
ইফালে একাংশ মন্ত্ৰী আৰু আমোলাৰ সহযোগত বহিৰাগত পুঁজিপতিসকলে অসম ভূমি আইনৰ ১০নং অনুচ্ছেদ উলংঘা কৰি জনজাতি বেল্ট ব্লক তথা আবেষ্টনী আৰু খণ্ডসমূহৰ আধাতকৈয়ো বেছি ভূমি হস্তগত কৰা বুলিও কালিৰ সংবাদমেলত উল্লেখ কৰে।
আনহাতে সংবাদমেলতে তিৱা জাতীয় সংগঠন কেইটাই জানিবলৈ দি কয় যে অহা ২০ ছেপ্তেম্বৰত মৰিগাঁও চহৰৰ জিলা উপায়ুক্তৰ কাৰ্যালয়ৰ সন্মুখত ৰাজ্যিক ৰাজধানী উন্নয়ন প্ৰাধিকৰণ আইনখন বাতিল কৰাৰ দাবীত ৰাতিপুৱা ১০ বজাৰ পৰা এক প্ৰতিবাদী কাৰ্যসূচী ৰূপায়ণ কৰা হ’ব। যদিহে এই কাৰ্যসূচীৰ পাছত চৰকাৰে কোনো ধৰণৰ গুৰুত্ব প্ৰদান নকৰে তেন্তে পৰৱৰ্তী পৰ্যায়ত ধাৰাবাহিকভাৱে আন্দোলন কৰি যাব বুলি হুংকাৰ প্ৰদান কৰে সংবাদমেলত।
কালিৰ সংবাদমেলত (আটছু)ৰ সভাপতি দ্বীপেন মছৰং, সাধাৰণ সম্পাদক সুভাষ কোঁৱৰ, উপদেষ্টা প্ৰহ্লাদ কুমাৰ মছৰং, তিৱা যুৱ-ছাত্ৰ পৰিষদৰ সম্পাদক ৰত্নেশ্বৰ দেউৰী, সদৌ তিৱা মহিলা সন্থাৰ সম্পাদিকা টুটুমণি ডেকা ৰজা, তিৱা মাথন্লাই তখ্ৰা অৰ্থাৎ তিৱা সাহিত্য সভাৰ সভাপতি লালচিং মাদাৰৰ লগতে বহুতো লোক উপস্থিত থাকে।
