শুভেন্দু অধিকাৰীৰ ব্যক্তিগত সহায়ক চন্দ্রনাথ ৰথক হত্যাৰ ঘটনাঃ ৫০ হাজাৰ টকাত উত্তৰ প্ৰদেশৰ পৰা ক্ৰয় কৰিছিল হত্যাকাৰীৰ বাহন
পশ্চিম বংগৰ মুখ্যমন্ত্রী শুভেন্দু অধিকাৰীৰ ব্যক্তিগত সহায়ক চন্দ্রনাথ ৰথ হত্যাকাণ্ডৰ তদন্তত এক অতি গুৰুত্বপূৰ্ণ তথ্য পোহৰলৈ আহিছে। এই হত্যাকাণ্ডত ব্যৱহাৰ কৰা গাড়ীখন উত্তৰ প্রদেশৰ বলিয়া জিলাৰ পৰা কিনা হৈছিল বুলি জানিব পৰা গৈছে। কেন্দ্ৰীয় তদন্তকাৰী সংস্থা চিবিআইৰ তদন্তত প্রকাশ পাইছে যে এই বিলাসী গাড়ীখন ১ মে’ ২০২৬ তাৰিখে মাত্ৰ ৫০ হাজাৰ টকাত কিনা হৈছিল।
তথ্য অনুসৰি এই গাড়ীখন বাচডিহ ৰোড অঞ্চলৰ বাসিন্দা তথা বালি আৰু শিলৰ ব্যৱসায়ী জিতেন্দ্ৰ সিং নামৰ এজন ব্যক্তিৰ পৰা কিনা হৈছিল। গাড়ীখন ক্ৰয় কৰা ব্যক্তিজনক শীতল দৱনীৰ বাসিন্দা জ্ঞানেন্দ্ৰ সিং মনু বুলি চিনাক্ত কৰা হৈছে। জ্ঞানেন্দ্ৰৰ বিৰুদ্ধে উত্তৰ প্ৰদেশ আৰু ছত্তীশগড়ত গুলীচালনা আৰু গেংষ্টাৰ এক্টকে ধৰি প্ৰায় ১২টাকৈ বিভিন্ন অপৰাধমূলক গোচৰ ৰুজু হৈ আছে।
এই সন্দৰ্ভত চিবিআইৰ দলে বাচডিহ কোটৱালী এলেকাৰ হুছেইনাবাদ গাঁৱৰ বাসিন্দা তথা গাড়ীখনৰ আচল মালিকে ধৰি ব্যৱসায়ী জিতেন্দ্ৰ সিং আৰু তেওঁৰ পুত্ৰক জেৰা কৰিছে। তদন্তকাৰী সংস্থাটোৰ মতে দুৰ্বৃত্তই এই গাড়ীখন ব্যৱহাৰ কৰিয়েই চন্দ্ৰনাথ ৰথক হত্যা কৰিছিল আৰু ঘটনা সংঘটিত কৰাৰ পিছত তেওঁলোক ফৰাৰ হৈছিল। বৰ্তমান চিবিআইৰ দলে গাড়ীখনৰ সন্ধান চলাই আছে।
ব্যৱসায়ী জিতেন্দ্ৰ সিঙে জনোৱা মতে গাঁৱৰে দীপক সিং ওৰফে মিঠু নামৰ এজন যুৱকে তেওঁক ছট পূজাৰ সময়ত গাড়ীখন বিক্ৰী হোৱাৰ খবৰ দিছিল। সেই সময়ত গাড়ীখনৰ দাম ৩৫ হাজাৰ টকা আছিল আৰু তেওঁ গাড়ীখন ক্ৰয় কৰিছিল। ইয়াৰ প্ৰায় ৫ মাহ পিছত দীপকে গাড়ীখন আগলৈ বিক্ৰী কৰাৰ পৰামৰ্শ দিয়ে। অধিক লাভৰ আশাত জিতেন্দ্ৰই গাড়ীখন ৫০ হাজাৰ টকাত জ্ঞানেন্দ্ৰ সিঙক বিক্ৰী কৰি দিয়ে।
জিতেন্দ্ৰ সিঙে লগতে কয় যে প্ৰায় চাৰি দিন পূৰ্বে চিবিআইৰ দল তেওঁৰ ঘৰত উপস্থিত হৈছিল। তেতিয়াহে তেওঁ গম পায় যে তেওঁ বিক্ৰী কৰা গাড়ীখন পশ্চিম বংগৰ এই চৰ্চিত হত্যাকাণ্ডত ব্যৱহাৰ কৰা হৈছে। তেওঁ জানিবলৈ দিয়ে যে গাড়ীখনৰ কাগজ-পত্ৰ এতিয়াও ট্ৰান্সফাৰ হোৱা নাছিল আৰু বাহনখন এতিয়াও হুছেইনাবাদৰ পুৰণি মালিকৰ নামতেই পঞ্জীয়ন হৈ আছে।
এই হত্যাকাণ্ডৰ ঘটনাত বলিয়াৰ পৰা এতিয়ালৈকে তিনিজন লোকক গ্ৰেপ্তাৰ কৰা হৈছে। বুধবাৰে চিবিআইৰ দলে বলিয়াৰ ফেফনা থানা এলেকাৰ থমহ্নপুৰা গাঁৱৰ বাসিন্দা নবীন সিঙক গ্ৰেপ্তাৰ কৰে। ইয়াৰ পূৰ্বে এই গোচৰত ৰাজ সিং আৰু ৰাজকুমাৰ সিং নামৰ আন দুজনক গ্ৰেপ্তাৰ কৰা হৈছিল।
চিবিআইৰ সূত্ৰই জনোৱা মতে ৰাজকুমাৰ সিঙৰ স্বীকাৰোক্তিৰ ভিত্তিত নবীন সিঙক আটক কৰা হয়। তদন্তকাৰী সংস্থাই অভিযুক্তক কলকাতা লৈ যাবলৈ আদালতৰ ওচৰত ট্ৰানজিট ৰিমাণ্ডৰ আৱেদন জনাইছিল যদিও আদালতে এই আবেদন খাৰিজ কৰে। ইয়াৰ পিছত নবীন সিঙক ন্যায়িক জিম্মাত মউ কাৰাগাৰলৈ প্ৰেৰণ কৰা হয়।