স্বামীৰ পৰা পত্নীয়ে দাবী কৰিছিল ৮ কোটিকৈ টকা। পত্নীয়ে বিচৰা এই ধন দিয়া নাছিল স্বামীয়ে। যাৰ বাবে প্ৰেমিকৰ সৈতে মিলি নিজ স্বামীক হত্যা কৰিলে পত্নীয়ে।
আৰক্ষীৰ সূত্ৰ অনুসৰি, তিনি সপ্তাহ পূৰ্বে ৮ অক্টোবৰত কৰ্ণাটকৰ কোডাগু জিলাৰ সুনটিকপ্পাত এজন লোকৰ আধা জ্বলি যোৱা মৃতদেহ উদ্ধাৰ হৈছিল। অৱশ্যে মৃত লোকজনৰ পৰিচয় জানিব পৰা হোৱা নাছিল।
তদন্তৰ সময়ত আৰক্ষীয়ে অঞ্চলটোৰ চিচিটিভি ফুটেজ পৰীক্ষা কৰে। চিচি টিভিত এখন মাৰ্চিডিজ গাড়ী আৰক্ষীৰ চকুত পৰে।
জানিব পৰা মতে গাড়ীখন তেলেংগানাৰ ৰমেশ নামৰ ৫৪ বছৰীয়া এজন ব্যক্তিৰ। সেই সূত্ৰৰ ভিত্তিত আৰক্ষীয়ে গম পালে যে ৰমেশৰ ২৯ বছৰীয়া পত্নী নীহাৰিকাই ৰমেশ নিৰুদ্দেশ হোৱা বুলি থানাত এজাহাৰ দাখিল কৰিছিল।
ইয়াৰ পিছত নীহাৰিকাৰ ওপৰত সন্দেহৰ সৃষ্টি হয় আৰু সোধাপোচা কৰে। জেৰাৰ অন্তত নীহাৰিকাই স্বীকাৰ কৰে যে তেওঁৰ প্ৰেমিক নিখিল আৰু তেওঁৰ বন্ধু অংকুৰৰ সহায়ত নিজৰ স্বামীক হত্যা কৰিছিল।
আৰক্ষীৰ সূত্ৰৰ পৰা জানিব পৰা মতে, ১৬ বছৰ বয়সত নীহাৰিকাৰ পিতৃৰ মৃত্যুৰ পিছত মাতৃয়ে দ্বিতীয়বাৰৰ বাবে বিবাহপাশত আবদ্ধ হয়। ইয়াৰ পিছত নীহাৰিকাক কম বয়সতে বিয়া দিয়া হ’ল। নীহাৰিকাৰ এটা সন্তানো আছে। কিন্তু ইয়াৰ পিছত নীহাৰিকাৰ স্বামীৰ সৈতে বিচ্ছেদ হয় আৰু হাৰিয়ানালৈ গুচি যায়।
আৰ্থিক জালিয়াতিৰ গোচৰত গ্ৰেপ্তাৰ হৈ দীৰ্ঘদিন কাৰাগাৰত আছিল নীহাৰিকা। তাতে অংকুৰ নামৰ এজন যুৱকক লগ পাইছিল নইিহাৰিকাই। অৱশ্যে জেলৰ পৰা ওলাই অহাৰ পিছত নীহাৰিকাই ব্যৱসায়ী ৰমেশক বিয়া কৰাইছিল।
ইয়াৰ পিছত আৰম্ভ হ’ল নীহাৰিকাৰ বিলাসী জীৱন। অৱশ্যে ৰমেশৰ লগত নীহাৰিকাৰ সম্পৰ্ক বৰ ভাল নাছিল। অংকুৰৰ মতে, নীহাৰিকাৰ নিখিল নামৰ এজন পশু চিকিৎসকৰ সৈতে প্ৰেমৰ সম্পৰ্ক আছিল।
নীহাৰিকাই ৰমেশৰ পৰা ৮ কোটি টকা দাবী কৰিছিল। কিন্তু স্বামীয়ে ধন দিবলৈ মান্তি নোহোৱাত নীহাৰিকাই প্ৰেমিকৰ লগত হত্যাৰ ষড়যন্ত্ৰ কৰিলে।
সোধা-পোছাৰ সময়ত অভিযুক্তই স্বীকাৰ কৰে যে যোৱা ১ অক্টোবৰত উপপালত নীহাৰিকাই ৰমেশক ডিঙি চেপি হত্যা কৰিছিল। ইয়াৰ পিছত তেওঁ নিখিল আৰু অংকুৰৰ সৈতে ৰমেশৰ ঘৰলৈ আহি টকা-পইচা আৰু অন্যান্য মূল্যবান সামগ্ৰী লৈ যায়। তাৰ পিছত গাড়ীৰে মৃতদেহটো কৰ্ণাটকৰ কোডাগুৰ কফি বাগিচালৈ লৈ যোৱা হয়। তাতে মৃতদেহটো কম্বলত মেৰিয়াই জ্বলাই দিয়ে। সকলো কাম শেষ কৰাৰ পিছত সকলোৱে হায়দৰাবাদলৈ আহে।
ইয়াৰ পিছত অভিযুক্তই স্বামীৰ নামত এটা নিৰুদ্দেশৰ গোচৰ দিছিল। আৰক্ষীয়ে জনোৱা মতে, চিচিটিভিৰ ফুটেজ পৰীক্ষা কৰাৰ পিছত স্পষ্ট হৈ পৰে যে দোষৰ পৰা হাত সাৰিবলৈ নীহাৰিকাই নিৰুদ্দেশৰ গোচৰ দি ষড়যন্ত্ৰ ৰচনা কৰিছিল।
