আজি কিছু দিনৰ পৰা যেন চোৰৰ ৰম্য ভূমিত পৰিণত হৈছে টীয়ক নগৰ।বিগত মাহটোত প্ৰায় ১০ টাকৈ সৰু বৰ চুৰি ঘটনা সংঘটিত হোৱাৰ সমান্তৰালকৈ আজি পুনৰ দিন দুপৰতে টীয়ক হলি ফ্লাৱাৰ চিনিয়ৰ চেকেণ্ডেৰী স্কুলৰ সমীপত চোৰে লুট-পাত চলায়।
জানিব পৰা মতে তৰু বৰা নামৰ চিকিৎসাকৰ্মী গৰাকী কৰ্মৰত অৱস্থাত থকাৰ উমান পাই ঘৰত কোনো নথকাৰ সুযোগ লৈ দুৱাৰৰ তলা ভাঙি ভিতৰত প্ৰবেশ কৰে আৰু আলমিৰা ভাঙি প্ৰায় চাৰিলাখ টকাৰ সোণৰ গা গহনাকে ধৰি কেইবাহাজাৰ নগদ টকা লৈ পলায়ন কৰে।
ইপিনে ওচৰৰ লোকে কোৱা মতে এখন নীলা ৰঙৰ নম্বৰপ্লেটবিহীন স্কুটি লৈ হেলমেট পৰিহিত এজন লোকে কাপোৰ বিক্ৰী কৰাৰ ভাও ধৰি মানুহৰ ঘৰে ঘৰে প্ৰৱেশ কৰে আৰু সুযোগ বুজি চুৰি কাৰ্য সংঘটিত কৰে।
আৰক্ষীয়ে ইতিমধ্যে তদন্ত আৰম্ভ কৰিছে যদিও বিগত বহুদিন ধৰি টীয়কত চলি থকা এনে কাণ্ডই আৰক্ষীৰ ফোঁপোলা স্বৰূপ উদঙাইছে বুলিহে অভিহিত কৰিছে সাধাৰণ জনতাই।
