ব্ৰহ্মপুত্ৰ নদীয়ে সৃষ্টি কৰা বানৰ তাণ্ডৱৰ পৰা নিজৰ কৃষিভূমি আৰু ঘৰ-দুৱাৰ ৰক্ষা কৰিবলৈ ১.৩ কিলোমিটাৰ দৈৰ্ঘ্যৰ মথাউৰি নিৰ্মাণ কৰিছে ধুবুৰীৰ এখন গাঁৱৰ বাসিন্দাই।
এই দীঘলীয়া মথাউৰিটো চৰকাৰী সাহায্য অবিহনেই সম্পূৰ্ণকৈ নিৰ্মাণ কৰিলে গাঁওখনৰ লোকসকলে।
উল্লেখ্য যে ২০২৪ চনত নদীৰ খহনীয়া আৰু ভয়াৱহ বানপানীৰ সন্মুখীন হৈ ধুবুৰীৰ নিচিনপুৰ আৰু চুবুৰীয়া গাঁৱৰ বাসিন্দাসকলে নিচিনপুৰ নদীৰ পাৰ সুৰক্ষা সমিতি গঠন কৰি এই মথাউৰিটো নিৰ্মাণ কৰে।
কুলামুয়া ছোটো নিচিনপুৰ গাঁৱৰ বুঢ়া-বুঢ়ী ধামলৈকে নিৰ্মাণ কৰা এই মথাউৰিটো নিৰ্মাণৰ লক্ষ্য হৈছে ব্ৰহ্মপুত্ৰৰ পৰা হাজাৰ হাজাৰ হেক্টৰ কৃষিভূমি আৰু মানৱ বসতিস্থল সুৰক্ষিত কৰা।
কমিটীৰ সভাপতি ৰহিম উদ্দিন আহমেদৰ মতে, এই পদক্ষেপ সম্পূৰ্ণৰূপে গাঁওবাসীৰ নিজা আছিল। গাঁৱৰ মানুহে সম্পদ একত্ৰিত কৰিছিল, অনুদান সংগ্ৰহ কৰিছিল আৰু স্বেচ্ছাসেৱী শ্ৰমিক হিচাপে শ্ৰমদান কৰি মথাউৰিটৰ কাম সম্পূৰ্ণ কৰিছিল। জেচিবি আৰু ট্ৰেক্টৰৰ দৰে গধুৰ যন্ত্ৰপাতি স্থানীয় লোকে বিনামূলীয়াকৈ প্ৰদান কৰিছিল, আনহাতে ৩০০ মিটাৰ দৈৰ্ঘ্যৰ এটা জটিল অংশক বোল্ডাৰ পিচিঙৰ সহায়ত শক্তিশালী কৰিবলৈ বোল্ডাৰ ক্ৰয় কৰা হৈছিল। চৰৰ পৰা বালি আহৰণ কৰা হৈছিল আৰু কাৰিকৰী তদাৰকী ব্যক্তিগতভাৱে নিযুক্তি দিয়া অভিযন্তাসকলে কৰিছিল।
কমিটীৰ সম্পাদক তৰাচান্দ আলীয়ে কয় যে বোল্ডাৰ পিচিং সম্পূৰ্ণ হোৱাৰ পিছত ইয়াৰ ভেটি শক্তিশালী কৰিবলৈ মথাউৰিৰ কাষত জিঅ’বেগ স্থাপন কৰা হ’ব।
