এসময়ত ডুৱাইলৈ গোলাঘাটৰ ৰঙালাও পঠিয়াই চমক সৃষ্টি কৰা মন্ত্ৰী অতুল বৰাৰ সমষ্টিতে ২৬ বিঘা মাটিৰ ৰঙালাওৰ বিক্ৰীৰ বাবে আজি এখন বজাৰৰ অভাৱ! পথাৰতে গেলিছে কুইন্টলে-কুইন্টলে ৰঙলাও। দুখ আৰু ক্ষোভত ভাঙি পৰা ক্ষুদ্ধ যুৱ কৃষকে কৃষিমন্ত্ৰীৰ বিৰুদ্ধে ক্ষোভ উজাৰি চপাই আনিলে বিপদ!
দলৰ পৰা বহিস্কৃত হ’ল ভাস্কৰজ্যোতি দত্তক। অৰ্থাৎ ক্ষোভৰ পৰিণাম হিচাপে পালে বহিস্কাৰৰ পুৰস্কাৰ। এটা সময়ৰ কথা নিশ্চয়কৈ মনত পৰে আপোনাৰ! তদানীন্তন মুখ্যমন্ত্ৰী সৰ্বানন্দ সোণোৱাল আৰু তদানীন্তন উদ্যোগ মন্ত্ৰী চন্দ্ৰমোহন পাটোৱাৰীৰ উপস্থিতিত কৃষিমন্ত্ৰী অতুল বৰাই গোলাঘাটৰ পৰা ১০ টন ৰঙালাও গোপীনাথ বৰদলৈ আন্তৰ্জাতিক বিমান বন্দৰৰ পৰা কাৰ্গো বিমানেৰে ডুবাইলৈ ৰপ্তানি কৰিছিল। আৰু সদম্ভে ঘোষণা কৰিছিল যে বিদেশলৈ এনেদৰেই অসমিৰ কৃষকৰ দ্বাৰা উৎপাদিত সতেজ শাক-পাছলি বিদেশলৈ ৰপ্তানি কৰিব। কিন্তু বাস্তৱত তাৰ ওলোটা ছবিখনহে দেখিবলৈ পোৱা গ’ল কৃষিমন্ত্ৰী অতুল বৰাৰ গৃহ সমষ্টি বোকাখাতত।
যুৱ কৃষক ভাস্কৰজ্যোতি দত্তই গাঁৱৰ আন চাৰিজন যুৱকৰ সৈতে মিলি কাজিৰঙা ৰাষ্ট্ৰীয় উদ্যানৰ দাঁতিকাষৰীয়া অঞ্চল ডিফলু পথাৰৰ দেৰগঞা গাৱঁত ২৬বিঘা মাটিত গাঠিৰ ধন ভাঙি ৰঙালাও,আলু আৰু ধনীয়া খেতি কৰিছিল । নিশা টঙীঘৰত থাকি বনৰীয়া হাতী খেদি খেদি অতি কষ্টৰে কৰা উক্ত খেতিৰ ফচল কৃষিবিভাগৰ অন্যমনস্কতাৰ বাবে বজাৰৰ অভাৱত পথাৰতে গেলিপচি গৈছিল । বজাৰৰ অভাৱত প্ৰায় ৬০ টন ৰঙালাও নষ্ট হোৱাত দুখিত তথা ক্ষোভিত হৈ পৰিছিল যুৱক কেইজন। যাৰ বাবে কৃষিবিভাগৰ মন্ত্ৰীৰ বিৰুদ্ধে সোচ্চাৰ হৈ পৰিছিল যুৱকসকল।
কৃষিমন্ত্ৰী অতুল বৰাৰ বিভাগৰ বিৰুদ্ধে ক্ষোভ উজাৰি অৱশেষত দলীয় নেতৃত্বৰ ৰোষত পৰিল ন অগপ নেতা ভাস্কৰজ্যোতি দত্ত। ইতিমধ্যে দলৰ পৰা বহিস্কাৰ কৰা হৈছে অসম যুৱ পৰিষদৰ সহকাৰী সাধাৰণ সম্পাদক ভাস্কৰজ্যোতি দত্ত।
উল্লেখযোগ্য যে যোৱা ১৯ ফেব্ৰুৱাৰীত সদৌ অসম ছাত্ৰ সন্থাৰ পৰা গৈ অসম গণ পৰিষদত যোগদান কৰি ,৩০ মাৰ্চত অগপৰ যুৱ পৰিষদৰ বোকাখাত বিধান পৰিষদৰ সহকাৰী সাধাৰণ সম্পাদকৰ দায়িত্ব গ্ৰহণ কৰিছিল ভাস্কৰজ্যোতি দত্তই।
কিন্তু এজন সু-নিৰ্দিষ্ট বজাৰৰ সৃষ্টি কৰি দিয়াত বিফল মন্ত্ৰীয়ে তীক্ষ্ণ বাক্যবাণ সহ্য কৰিব নোৱাৰি স্বাৱলম্বী হ’বলৈ চেষ্টা কৰা যুৱকক দলৰ পৰা বহিস্কাৰ কৰি কটা ঘাত যেন চেঙা তেলহে ঢালিলে। অৱশেষত উপায়ন্তৰ হৈ এখন বজাৰৰ অভাৱত পথাৰৰ মাটিতে ৬০ টন ৰঙালাও গেলি যোৱাতকৈ অসমবাসী ৰাইজক যদি ৰঙালাওৰ প্ৰয়োজন তেন্তে ক্ৰয় কৰিবলৈ অনুৰোধ জনালে ভাস্কৰজ্যোতি দত্তই।
কৃষিমন্ত্ৰী তথা কৃষিবিভাগৰ অমনোযোগিতাই চৰকাৰৰ পথাৰো আমাৰ বজাৰো আমাৰ শ্লোগান যেন পুনৰ ধোঁৱাচাঙত তুলিলে । নিশ্চয়কৈ ভাস্কৰজ্যোতি দত্তই যদি ৰঙালাও নষ্ট হোৱাৰ দুখ কষ্ট সামৰি সুতৰি মুখত এমুকুৰা হাঁহি লৈ অন্য চেলা চামুণ্ডাৰ দৰে পাছে পাছে ঢেমাধৰা হৈ অতুল বৰা জিন্দাবাদ ধ্বনি দি দাদাৰ গুণানুকীৰ্তনত ব্যস্ত থাকিলহেঁতেন তেন্তে দলৰ পৰা বহিস্কাৰ হোৱাৰ দৰে পুৰস্কাৰ লাভ নকৰিলেহেঁতেন অগপৰ যুৱ পৰিষদৰ পৰা।
