‘সুৱেৰী’ৰ দিনটোত লোকে লোকাৰণ্য হ’ল সত্ৰ নগৰী বৰপেটা
শ্ৰী শ্ৰী কৃষ্ণৰ দৌল মহোৎসৱ উপলক্ষে শুকুৰবাৰে সত্ৰনগৰী বৰপেটাত উলহ-মালহেৰে উদযাপন কৰা হয় ‘সুৱেৰী’ অৰ্থাৎ ফাকুৱা। ‘সুৱেৰী’ৰ দিনটোত ৰঙে-ৰূপে একাকাৰ হৈ পৰিল বৰপেটা কীৰ্তন ঘৰৰ লগতে অঞ্চলটোৰ বাট-পথ।
বিয়লি বৰপেটা সত্ৰৰ পৰা দুয়ো গোসাঁইক দুখন চৌ দোলা (চোদালা)ত তুলি গায়ন-বায়ন সহ হাজাৰ হাজাৰ ভক্তপ্ৰাণ ৰাইজে কলবাৰী সত্ৰ লৈ হেকেটা খুৱাবলৈ নিয়ে।শোভাযাত্ৰাত সত্ৰৰ কৃষ্ণ গোসাঁইয়ো অংশগ্ৰহণ কৰে।
পৰম্পৰা অনুসৰি তিনিও গোঁসাই ঘূৰি আহি বৰপেটা সত্ৰৰ মূল প্ৰৱেশদ্বাৰত উপস্থিত হোৱাৰ লগে লগে সত্ৰৰ টুপৰ চোতালত চাৰিডাল বাঁহেৰে হেঙাৰ বান্ধে। গোঁসাইক হেকেটা খুৱাব নিয়া অগণন ৰাইজে এডাল এডালকৈ চাৰিডাল বাঁহ ভঙাৰ পাছত গোঁসাই প্ৰৱেশত থকা বাধা ওফৰাই সত্ৰ চৌহদত সকলোৱে প্ৰৱেশ কৰে।
সত্ৰ চৌহদত প্ৰৱেশৰ পাছত গোঁসাইক কীৰ্তন ঘৰৰ চাৰিওফালে সাত পাক ঘুৰোৱা হয় আৰু তাৰপাছত প্ৰচলিত ৰীতি-নীতিৰে দৌলগোবিন্দ আৰু কলীয়া ঠাকুৰ গোঁসাইক পুনৰ সত্ৰৰ মণিকূট গৃহত প্ৰৱেশ কৰোৱা হয়। আনহাতে বাৰাদী সত্ৰৰ কৃষ্ণ গোঁসাইক বাৰাদী সত্ৰলৈ লৈ যোৱা হয়।
বৰপেটাৰ সুৱেৰী উৎসৱ উপভোগ কৰাৰ বাবে প্ৰতিবছৰে জিলাখনৰ লগতে ৰাজ্যৰ বিভিন্ন প্ৰান্তৰ হাজাৰ হাজাৰ লোক বৰপেটালৈ আহে।