নাৰীৰ বিৰুদ্ধে বৰ্দ্ধিত অপৰাধৰ খবৰে ৰাজ্যৰ নাৰী সুৰক্ষাৰ পয়ালগা দিশটো বাৰে বাৰে উন্মোচিত কৰাৰ সময়তে আন এক ঘৃণনীয় কাণ্ডই পুনৰ সংবাদ মাধ্যমৰ শিৰোনাম দখল কৰিছে। এইবাৰ তিনি দুৰ্বৃত্তৰ দলবদ্ধ ধৰ্ষণৰ বলি হৈছে এগৰাকী কিশোৰী।
এই নিৰ্লজ্জ ঘটনা সংঘটিত হৈছে গোৱালপাৰা জিলাত। জিলাখনৰ অগিয়া অঞ্চলত এগৰাকী ১৫ বছৰীয়া কিশোৰীক দলবদ্ধভাৱে বলাৎকাৰ কৰাৰ অভিযোগ উত্থাপন হৈছে তিনি দুৰ্বৃত্তৰ বিৰুদ্ধে।
গোৱালপাৰা জিলা আৰক্ষীয়ে ঘটনা সন্দৰ্ভত উল্লেখ কৰা মতে যোৱা ১ অক্টোবৰত এই ঘটনা সংঘটিত হৈছিল বুলি কিশোৰীগৰাকীৰ পৰিয়ালে জানিবলৈ দিছে।
ইয়াৰ পিছতে ৩ অক্টোবৰত ভুক্তভোগীৰ পৰিয়ালে এই ঘৃণনীয় অপৰাধ সন্দৰ্ভত এক অভিযোগ দাখিল কৰে।
এই অভিযোগৰ আধাৰত গোৱালপাৰা আৰক্ষীয়ে তিনি অভিযুক্তক ইতিমধ্যে গ্ৰেপ্তাৰ কৰিছে।
অভিযুক্ত দুৰ্বৃত্ত কেইগৰাকীক মামুদ আলম, আক্কাছ আলী আৰু আজিবুল হক বুলি চিনাক্ত কৰা হৈছে।
গোৱালপাৰা জিলাৰ উপ আৰক্ষী অধীক্ষক অনুৰাগ শৰ্মাই কয়, “আমি ঘটনাটোৰ বিষয়ে এক অভিযোগ লাভ কৰাৰ পিছতে লগে লগে তদন্ত আৰম্ভ কৰিছিলো। ইতিমধ্যে আমি তিনিওজন অভিযুক্তক গ্ৰেপ্তাৰ কৰিছো।”
ঘটনা সন্দৰ্ভত অধিক তথ্যৰ বাবে বৰ্তমান তদন্ত চলাই থকা হৈছে বুলি আৰক্ষী বিষয়া গৰাকীয়ে লগতে উল্লেখ কৰে।
