ব্ৰহ্মপুত্ৰ নদীৰ কোবাল সোঁতত উটি যোৱা তিনিজন কিশোৰক আজি বিয়লি ব্ৰহ্মপুত্ৰৰ পৰা কোনো মতে উদ্ধাৰ কৰে কাজিৰঙাৰ বনকৰ্মীয়ে৷
বনকৰ্মীয়ে জনোৱা মতে গহপুৰৰ ৰাউনমুখৰ তিনিজন কিশোৰে গহপুৰৰ বাৰলী চাপৰিত নাৱেৰে ঘাঁহ কাটিবলৈ আহিছিল৷
বিয়লি নাৱত উঠি ঘাঁহ কাটি থাকোতে কিশোৰ তিনিজন উঠি থকা নাওঁখনক প্ৰৱল বতাহে লুটিয়াই দিয়াত তিনিওজন পানীত সৰি পৰে৷
নাওৰ সৈতে তিনিও জনকে ব্ৰহ্মপুত্ৰৰ সোঁতে উটুৱাই নিয়ে যদিও কিশোৰ তিনিজনে পানীত উটি যোৱা নাওখনকে খামুচি ধৰি ব্ৰহ্মপুত্ৰত উটি যায় আৰু উদ্ধাৰৰ বাবে চিঞৰ মাৰে৷
ব্ৰহ্মপুত্ৰ মাজত মৰা এই চিঞৰ কাজিৰঙাৰ অগৰাতলি বনাঞ্চলৰ মাকলুং বন শিৱিৰৰ বন কৰ্মীয়ে শুনি তাৎক্ষনিকভাৱে বনাঞ্চলিক বিষয়া বিদ্যুত বিকাশ বৰাক জনোৱাত বিষয়া গৰাকীয়ে বিভাগীয় যন্ত্ৰ চালিত নাওঁ লৈ বনকৰ্মী বলিন বৰাক প্ৰেৰণ কৰে৷
বলীন বৰাই যন্ত্ৰ চালিত নাও লৈ ব্ৰহ্মপুত্ৰৰ মাজত নাৱত খামুচি উটি গৈ থকা অৱস্থাত কিশোৰ তিনিজনক অতি কষ্টৰে উদ্ধাৰ কৰে৷ উদ্ধাৰৰ পাছত তিনিওকে অগৰাতলি বনাঞ্চলৰ ধানবাৰী বন শিৱিৰলৈ অনা হয়৷
কিশোৰ তিনিজন ৰাউনমুখৰ মহনজ্যোতি কুটুম, শংকৰ পেগু আৰু জয়গুৰ কুটুম বুলি জানিব পৰা গৈছে।
সম্প্ৰতি ধানবাৰীৰ গাঁওবুঢ়াৰ ঘৰতে থকা কিশোৰ তিনিজনক অহা কাইলৈ ৰাউনমুখৰ গাঁওবুঢ়াৰ হাতত অৰ্পণ কৰা হ’ব বুলি জনাইছে বনাঞ্চলিক বিষয়াই৷
