দীপাৱলীৰ পূৰ্বে ভাৰতৰ তিনিখন ডাঙৰ চহৰৰ প্ৰদূষণৰ পৰিস্থিতিয়ে আৰু অধিক উদ্বেগ সৃষ্টি কৰিছে। দেওবাৰে বিশ্বৰ ১০খন প্ৰদূষিত চহৰৰ তালিকাত নাম সন্নিবিষ্ট হৈছে ক্ৰমে দিল্লী, কলকাতা আৰু মুম্বাইৰ।
চুইজাৰলেণ্ডৰ গ্ৰুপ আইকিউএয়াৰে প্ৰকাশ কৰা তথ্য অনুসৰি ৫ নৱেম্বৰত বিশ্বৰ আটাইতকৈ প্ৰদূষিত চহৰৰ তালিকাত দিল্লীয়ে শীৰ্ষস্থান দখল কৰে। দেশৰ ৰাজধানীত আজিৰ বায়ুৰ গুণাগুণ বা AQI ৪৮৩।
তালিকাৰ দ্বিতীয় স্থানত আছে পাকিস্তানৰ লাহোৰ। তাত বায়ুৰ গুণাগুণ মান ৩৭১। ইয়াৰ পিছতে তৃতীয় স্থানত আছে কলকাতা। চহৰখনত আজি বায়ুৰ মান ২০৬।
লগতে পঢ়কঃ বিশ্বকাপৰ ফাইনেলৰ দিনাই এয়াৰ ইণ্ডিয়াৰ বিমান উৰুৱাই দিয়াৰ হুংকাৰ খালিস্তানী নেতাৰ
সেইদৰে, তালিকাৰ চতুৰ্থ স্থানত বাংলাদেশৰ ঢাকা আৰু পঞ্চম স্থানত আছে পাকিস্তানৰ কৰাচী। তাৰপিছতে ষষ্ঠ স্থানত আছে মুম্বাই। মুম্বাইত বায়ুৰ গুণাগুণ মান ১৬২। এই তালিকাত চীনৰ তিনিখন চহৰ আৰু কুৱেইট চহৰো অন্তৰ্ভুক্ত হৈছে।
বিগত এসপ্তাহ ধৰি দিল্লীৰ প্ৰদূষণ পৰিস্থিতি ভয়াৱহ হৈ পৰিছে। যোৱা তিনিদিন ধৰি দিল্লীৰ বায়ুৰ গুণাগুণ ‘অতি ভয়ানক’ স্তৰত আছে। যাৰ বাবে ৰাজধানীৰ প্ৰাথমিক বিদ্যালয় দুদিনৰ বাবে বন্ধ কৰাৰ নিৰ্দেশ দিয়া হৈছে।
দিল্লীৰ বাসিন্দাসকলে জনায় যে প্ৰদূষণৰ মাত্ৰা বৃদ্ধি পোৱাৰ লগে লগে চকু-নাক-ডিঙিৰ বিষ, উশাহ-নিশাহৰ সমস্যা আদি বহুতো শাৰীৰিক সমস্যাৰ সৃষ্টি হৈছে।
