বদোদৰা জিলাৰ উপকণ্ঠ অঞ্চলত মাহী নদীৰ ওপৰত নিৰ্মিত এই দলংখন ভাঙি যায়। ইয়াৰ বাবে বহু যান-বাহন নদীত বাগৰি পৰে।
ঘটনা সন্দৰ্ভত তথ্য লাভ কৰাৰ পিছতে স্থানীয় কৰ্তৃপক্ষই সাহায্য আৰু উদ্ধাৰ অভিযান আৰম্ভ কৰিছে।
সংবাদ সংস্থা পিটিআইৰ প্ৰতিবেদন অনুসৰি চাৰি দশক পুৰণি এই দলঙৰ পৰা বাহন বাগৰি পৰাত তিনিজন লোকৰ মৃত্যু হোৱাৰ লগতে ৫জনক উদ্ধাৰ কৰা হৈছে।
গুজৰাট চৰকাৰৰ মুখপাত্ৰ মন্ত্ৰী ঋষিকেশ পেটেলে কয় যে, “আনন্দ আৰু পাদ্ৰা সংযোগী দলঙৰ মাজৰ অংশ ভাঙি পৰাৰ ফলত তিনিজন লোকৰ মৃত্যু হোৱাৰ লগতে পাঁচজনক উদ্ধাৰ কৰা হৈছে। পাঁচ-ছয়জন লোকক চিকিৎসা কৰি ঘৰলৈ যাবলৈ দিয়া হৈছে।”
তেওঁ কয়, “মুখ্যমন্ত্ৰীয়ে আমাক নিৰ্দেশ দিছে যে দলং বিশেষজ্ঞ আৰু কাৰিকৰী বিশেষজ্ঞৰ দ্বাৰা দুৰ্ঘটনাৰ কাৰণ তদন্ত কৰা হওক। ১৯৮৫ চনত নিৰ্মাণৰ পিছৰে পৰা এই দলংখন সময়ে সময়ে মেৰামতি কৰা হৈছে।”
তেওঁ কয়, “এই দলংখন মেৰামতি কৰা হৈছিল, কিন্তু এই দুৰ্ভাগ্যজনক আৰু মৰ্মান্তিক ঘটনা সংঘটিত হৈছে। মুখ্যমন্ত্ৰীয়ে ২১২ কোটি টকা ব্যয়ৰে এখন নতুন দলং নিৰ্মাণৰ অনুমোদন দিছিল।”
গুজৰাট কংগ্ৰেছ নেতা অমিত চাভদাই কয়, “এই দলঙৰ মাজেৰে বৃহৎ সংখ্যক যান-বাহন পাৰ হৈ যায়। বাৰে বাৰে এনে ঘটনা কিয় ঘটে? যদি দলংখন বিপদজনক হয় তেন্তে বন্ধ কৰি দিব লাগে বা মেৰামতি কৰিব লাগে। চৰকাৰৰ গুৰুতৰ গাফিলতিৰ বাবেই এই ঘটনা সংঘটিত হৈছে।”
