অষ্ট্ৰেলিয়া ক্ৰিকেট দলৰ প্ৰাক্তন অধিনায়ক তথা টেষ্ট ক্ৰিকেটত বিশ্বৰ এক নম্বৰ বেটছমেন ষ্টিভেন স্মিথ বৰ্তমান নিদ্ৰাহীনতাৰ সমস্যাত ভুগিছে।
দলৰ বৰ্তমান অধিনায়ক টিম পেনে এই কথা সদৰী কৰি কৈছে যে তেওঁ এই বিষয়ত কাম কৰি আছে।
পেনে কয়,’’মই জানো যে স্মিথে এই সময়ত ক্ৰিকেট অষ্ট্ৰেলিয়াৰ সহায় লৈছে যাতে নিদ্ৰাজনিত এই বেমাৰ দূৰ কৰিব পৰা যায়।‘’
অধিনায়কগৰাকীয়ে কয়,’’কিন্তু মোৰ বিশ্বাস যে ষ্টিভে নিজকে বিশ্ৰামত ৰাখি এই সমস্যাটো আঁতৰ কৰিব।‘’
স্মিথে পাকিস্তানৰ বিৰুদ্ধে প্ৰথমখন টেষ্ট মেচত বিশেষ প্ৰদৰ্শন দেখুৱাব পৰা নাছিল। প্ৰথম ইনিংছত তেওঁ মাত্ৰ চাৰি ৰাণহে কৰিছিল।
নিজৰ এনে প্ৰদৰ্শনত অসন্তুষ্ট হৈ স্মিথে নিজকে এক ধৰণৰ অস্বাভাৱিক শাস্তি দিয়ে। নিজৰ বেয়া প্ৰদৰ্শনৰ বাবে শাস্তি হিচাপে তেওঁ ব্ৰীছবেনৰ ষ্টেডিয়ামৰ পৰা দলটোৱে থকা হোটেলখনলৈ প্ৰায় তিনি কিলোমিটাৰ পথ খোজ কাঢ়ি গৈছিল।
ইয়াৰ পাছতে স্মিথে কৈছিল,’’যেতিয়া মই ৰাণ কৰিব নোৱাৰো তেতিয়াই মই মোক নিজকে শাস্তি দিওঁ। খেলত ৰাণ কৰা তথা শতক পূৰ্ণ কৰাৰ বাবে যিদৰে মই নিজকে চকলেটৰ ৰূপত উপহাৰ দিওঁ,ঠিক তেনেদৰে ৰাণ কৰিব নোৱাৰা বাবে নিজকে নিজে শাস্তিও দিওঁ।‘’
বিশ্বৰ এক নম্বৰৰ টেষ্ট বেটছমেনগৰাকীয়ে লগতে কয়,’’হয়, সেইকাৰণেই মই ৰাণ কৰিব নোৱাৰিলে মই সদায় দৌৰিবলৈ,জিমলৈ যাবলৈ বিচাৰো বা এনেকুৱা কিবা এটা কৰিব বিচাৰো য’ত মই নিজকে শাস্তি দিব পাৰো।‘’
অষ্ট্ৰেলিয়া আৰু পাকিস্তানৰ মাজত অনুষ্ঠিত দিবা-নৈশ টেষ্ট ছিৰিজৰ দ্বিতীয়খন খেল শুকুৰবাৰে এডিলেইডত খেলোৱা হৈছে। ছিৰিজটোত অষ্ট্ৰেলিয়া ১-০ব্যৱধানত আগবাঢ়ি আছে।
