কোভিড-১৯ অতিমাৰীৰ ফলত ‘নিবনুৱা’ সমস্যাত ভাৰাক্ৰান্ত হৈ পৰা ভাৰতত টপচেম চিমেন্টে গুৱাহাটীত এটা জ্যেষ্ঠ পদৰ বাবে ‘আটাইতকৈ যোগ্য প্ৰাৰ্থী’ হিচাপে বিচাৰি পালে এগৰাকী বাংলাদেশী কূটনীতিকৰ পত্নীক।
‘উত্তৰ-পূব ভাৰতৰ আটাইতকৈ শ্ৰেষ্ঠ’ বুলি দাবী কৰা টপচেম চিমেন্টে মুনেৰা আজমক ইয়াৰ ছিনিয়ৰ মেনেজাৰ, মাৰ্কেটিং এণ্ড ছেলছ হিচাপে নিযুক্তি দিছে।
মুনেৰা আজম গুৱাহাটীত থকা বাংলাদেশৰ সহকাৰী উচ্চায়ুক্ত শ্বাহ মহম্মদ তনভিৰ মনছুৰৰ পত্নী।
সূত্ৰসমূহে জানিবলৈ দিয়ে যে বাংলাদেশী কূটনীতিকগৰাকীৰ পত্নীয়ে যোৱা মাৰ্চ মাহৰ পৰা গুৱাহাটীৰ মেগা প্লাজাত থকা টপচেম চিমেন্টৰ কৰ্পোৰেট কাৰ্যালয়ত চাকৰি কৰি আছে।
ভাৰতত সকলো খণ্ডৰ মাৰ্কেটিং আৰু ছেলছৰ কাৰ্যবাহীসকলে যিসময়ত চাকৰি হেৰুৱাইছে বা দৰমহা কৰ্তনৰ সন্মুখীন হৈছে, সেই সময়ত টপচেম চিমেন্টে বাংলাদেশী কূটনীতিকৰ পত্নীক ‘বিশেষ চাকৰিৰ সুযোগ’ দিয়া ঘটনাই বহুতৰে চকু কপালত তুলিছে।
ছিনিয়ৰ মেনেজাৰ, মাৰ্কেটিং এণ্ড ছেলছ পদটোৰ বাবে টপচেম চিমেন্টে কিয় এগৰাকী ‘স্থানীয় প্ৰাৰ্থীক’ নিযুক্তি দিব নোৱাৰিলে?
প্রাথমিক অনুসন্ধানত পোবা তথ মতে মুনেৰা আজমৰ ছিনিয়ৰ মেনেজাৰ, মাৰ্কেটিং এণ্ড ছেলছ পদৰ বাবে কোনো ‘বিশেষ দক্ষতা নাই’।
নাইবা, গুৱাহাটীত থকা বাংলাদেশৰ সহকাৰী উচ্চায়ুক্তই দিয়া ‘কিছু সুবিধা’ৰ বাবেই ‘কৃতজ্ঞতাৰ চিন’ স্বৰূপে মুনেৰা আজমক চাকৰিটো দিয়া হৈছিল?
সূত্ৰসমূহে কয় যে মুনেৰা আজম বাংলাদেশৰ য়ুনিভাৰ্ছিটি অফ লিবাৰেল আৰ্টছৰ পৰা জনসংযোগ বিভাগৰ স্নাতক ডিগ্ৰীধাৰী আৰু ২০১২ৰ পৰা ২০১৩চনলৈ ষ্টেণ্ডাৰ্ড চাৰ্টাৰ্ড বেংকত এগৰাকী কাৰ্যবাহী হিচাপে কাম কৰিছিল।
তেওঁ ২০১৪ৰ ছেপ্টেম্বৰৰ পৰা ২০১৬ৰ অক্টোবৰলৈ ডুবাইত এগৰাকী মাৰ্কেটিং ক’ৰ্ডিনেটৰ হিচাপে কাম কৰিছিল।
২০১৭ আৰু ২০১৯ৰ ভিতৰত মুনেৰা আজমে ৰাছিয়া চৰকাৰৰ এক বৃত্তি গ্ৰহণ কৰি ইন্টাৰনেশ্যনেল মাৰ্কেটিঙৰ স্নাতকোত্তৰ ডিগ্ৰী লয়।
আকৌ, ইন্টাৰনেশ্যনেল মাৰ্কেটিঙৰ স্নাতকোত্তৰ ডিগ্ৰী সম্পূৰ্ণ কৰাৰ কেইমাহৰ পাছতে টপচেম চিমেন্টে মুনেৰা আজমক ছিনিয়ৰ মেনেজাৰ, মাৰ্কেটিং এণ্ড ছেলছৰ চাকৰি আগবঢ়াইছে।
টপচেম চিমেন্টে ইতিমধ্যে উত্তৰ-পূব ভাৰতৰ, বিশেষকৈ মেঘালয়ৰ খিলঞ্জীয়া লোকৰ অধিকাৰক ‘বঞ্চিত’ কৰাৰ সন্দেহজনক কাৰ্যত প্ৰবৃত্ত হৈছে।
যিসময়ত মেঘালয়ৰ পূব জয়ন্তীয়া পাহাৰত লাইমষ্ট’ন ৰিজাৰ্ভ ‘খনন’ কৰি প্ৰতিদিনে প্ৰায় ৪,৬০০ টন চিমেন্ট উৎপাদন কৰি আছে, সেই টপচেম চিমেন্টে খাচী আৰু জয়ন্তীয়া জনজাতিসকৰ প্ৰতি বেগচিমেন্ট ‘উচ্চ দৰত’ বিক্ৰী কৰিছে।
দেখা গৈছে যে শ্বিলং আৰু জোৱাই লোকসকলে প্ৰতি বেগ টপচেম চিমেন্ট ক্ৰয় কৰোতে ৪০ৰপৰা ৬০ টকা অধিক (অসমৰ সকলো প্ৰধান চহৰৰ তুলনাত) আদায় দি আহিছে।
বৃহস্পতিবাৰে অসমত প্ৰতিবেগ চিমেন্টৰ খুচুৰা মূল্য ৩৯০ৰ পৰা ৪২০টকা হোৱাৰ বিপৰীতে মেঘালয়ত ইয়াৰ মূল্য হৈছে ৪৪০টকাৰ পৰা ৪৫০টকা।
টপচেম চিমেন্টে এইদৰে উত্তৰ-পূৰ্বাঞ্চলত জনসাধাৰণক লুণ্ঠনৰ বাট মুকলি কৰিছে। সেইদৰে লাখ লাখ যোগ্য শিক্ষিত নিবনুৱাৰ প্ৰতি ভেঙুচালি কৰি বাংলাদেশী কূটনীতিকৰ পত্নীক চাকৰিত নিযুক্তি দিছে।
