যোৰহাট কেন্দ্ৰীয় কাৰাগাৰত শুকুৰবাৰে ৩৩জন কাৰাবন্দীৰ কোভিড-১৯ পজিটিভ চিনাক্ত হোৱাৰ পাছত এতিয়া কাৰাগাৰখনৰ মুঠ কৰ’না আক্ৰান্ত কাৰাবন্দীৰ সংখ্যা ৬৭জনলৈ বৃদ্ধি পালে।
ইয়াৰ পূৰ্বে বৃহস্পতিবাৰে যোৰহাট কেন্দ্ৰীয় কাৰাগাৰৰ ৩০জন কাৰাবন্দীৰ কোভিড-১৯ পজিটিভ চিনাক্ত হৈছিল আৰু তাৰ পূৰ্বেই আন চাৰিজনৰো কোভিড পজিটিভ ধৰা পৰিছিল।
এদিনতে ৩০জনকৈ কাৰাবন্দী পজিটিভ চিনাক্ত হোৱাৰ পাছতে শুকুৰবাৰে স্বাস্থ্য বিভাগৰ বিষয়াৰ এটা দলে যোৰহাট কেন্দ্ৰীয় কাৰাগাৰ পৰিদৰ্শন কৰি পৰিস্থিতিৰ বুজ লয়।
কাৰাগাৰৰ এজন বিষয়াই জানিবলৈ দিয়ে যে কোভিড-১৯ত আক্ৰান্ত কাৰাবন্দীসকলক ভাইৰাছ সংক্ৰমণ ৰোধ কৰাৰ বাবে কাৰাগাৰৰ ভিতৰত পৃথক ৱাৰ্ডত আইছ্যলেশ্যনত ৰখা হৈছে।
স্বাস্থ্য বিভাগৰ দলটোৰ এগৰাকী সদস্যই কয় যে কাৰাবন্দীৰ মাজত উচ্চ হাৰত সংক্ৰমণৰ ঘটনা চিন্তাৰ কাৰণ আৰু সংক্ৰমণ ৰোধ কৰাৰ বাবে সকলোধৰণৰ ব্যৱস্থা গ্ৰহণ কৰা হৈছে।
কাৰাগাৰৰ বিষয়াগৰাকীয়ে প্ৰকাশ কৰে যে স্বাস্থ্য বিভাগৰ দলটোৱে বাকী কাৰাবন্দীসকলৰ পৰা সুকীয়াকৈ আইছ’লেশ্যনত ৰখা আক্ৰান্তৰ পৃথক ৱাৰ্ড পৰিদৰ্শন কৰে আৰু আক্ৰান্তসকলৰ স্বাস্থ্যৰ বুজ লয়।
বিষয়াসকলে কয় যে আইছ’লেশ্যন ৱাৰ্ডত স্বাস্থ্য বিভাগৰ পৰা অক্সিজেন চিলিণ্ডাৰ আগবঢ়োৱা হৈছে।
আক্ৰান্ত ৰোগীসকল বৰ্তমান সুস্থ বুলি সদৰী কৰি বিষয়াসকলে কয় যে প্ৰয়োজন হ’লে তেওঁলোকক স্বাস্থ্য বিভাগৰ পৰামৰ্শ অনুসৰি তথা জিলা প্ৰশাসনৰ সৈতে আলোচনা কৰি কোভিড কেয়াৰ হাস্পাতাল বা কেন্দ্ৰলৈ স্থানান্তৰিত কৰা হ’ব।
আনহাতে, কাৰাগাৰখনৰ জেইলৰ চম্পাকলি বৰদলৈয়ে কয় যে নতুন আক্ৰান্তৰ বাবে আন এটা আইছ’লেশ্যন ৱাৰ্ড সাজু কৰি থকা হৈছে।
