লকডাউনৰ মাজতে কৰ’না আক্ৰান্তৰ সংখ্যা বৃদ্ধি পাইছে। যোৱা ২৪ ঘন্টাত ১২৬ টা নতুন ঘটনা পোহৰলৈ আহিছে।
সমগ্ৰ দেশতে আক্ৰান্তৰ সংখ্য ৬৮৬জনলৈ বৃদ্ধি পাইছে। ইয়াৰ ভিতৰত এতিয়ালৈকে ১২ জন লোক মৃত্যুমুখত পৰিছে।
ইয়াৰ বিপৰীতে ৪৩ লোক সুস্থ হৈ উঠিছে। অৰ্থাৎ এতিয়া দেশত ৬৩১টা সক্ৰিয় কৰ’না আক্ৰান্ত ঘটনা আছে।
দেশৰ ২৬খন ৰাজ্য কৰ’নাৰ দ্বাৰা প্ৰভাৱিত হৈছে।
কৰ’নাৰ দ্বাৰা আটাইতকৈ অধিক প্ৰভাৱিত হৈছে মহাৰাষ্ট্ৰ। ইয়াত এতিয়ালৈকে ১২৫টা ঘটনা পোহৰলৈ আহিছে। ইয়াৰে ৩জন লোকৰ মৃত্যু ঘটিছে।
এইক্ষেত্ৰত মহাৰাষ্ট্ৰৰ পাছতে আছে কেৰালা। ইয়াত ১০১জন লোক আক্ৰান্ত হৈছে। অৱশ্যে, যোৱা ২৪ ঘন্টাত কেৰালাত কোনো নতুন আক্ৰান্তৰ ঘটনা পোহৰলৈ অহা নাই।
বৰ্তমানলৈ অন্ধ্ৰ প্ৰদেশত ৯টা, বিহাৰত ৬টা, ছত্তীশগড়ত ৩টা, দিল্লীত ৩০টা, গুজৰাটত ৩৬টা, হাৰিয়ানাত ১৪টা, হিমাচল প্ৰদেশত ৩টা, কৰ্ণাটকত ৪১টা, মধ্য প্ৰদেশত ২০টা, মণিপুৰত ১টা, মিজোৰামত ১টা. উৰিষ্যাত ২টা, পুডুচেৰীত ১টা, পঞ্জাৱত ২৯টা, ৰাজস্থানত ৩৬টা, তামিলনাডুত ১৬টা আৰু তেলেংগানাত ২৭টা আক্ৰান্তৰ ঘটনা সংঘটিত হৈছে।
উত্তৰ প্ৰদেশত কৰ’না ৰোগীৰ সংখ্যা বৃদ্ধি পাই ৩৬জন হৈছেগৈ। তদুপৰি, চণ্ডীগড়ত ৭টা, জম্মু-কাশ্মীৰত ৭টা, লাডাখত ১৩টা, উত্তৰাখণ্ডত ৩টা, পশ্চিমবংগত ৯টা আৰু গোৱাত ৩টা আক্ৰান্তৰ ঘটনা সংঘটিত হৈছে।
ইপিনে, গোটেই দেশতে লকডাউন চলি থকাৰ মাজতো ৰোগীৰ সংখ্যা হ্ৰাস পোৱা নাই কিম্বা মৃত্যুৰ ঘটনা বন্ধ হোৱা নাই।
কালি মধ্য প্ৰদেশত প্ৰথমটো মৃত্যুৰ ঘটনা সংঘটিত হয়। ইন্দোৰত ৬০ বছৰীয়া এজন ব্যক্তিৰ মৃত্যু হয়। সেইদৰে তামিলনাডুৰ মাদুৰাইত এজন ব্যক্তিৰ মৃত্যু হয়। গুজৰাটত কালিয়েই দ্বিতীয়জন লোকৰ মৃত্যু ঘটে।
