‘গছে ৰাতি অক্সিজেন উৎপন্ন কৰে’; ভাইৰেল পাকিস্তানৰ প্ৰধান মন্ত্ৰী ইমৰান খানৰ ভিডিঅ’
প্ৰায়ে কাশ্মীৰ প্ৰসংগত আৰু ভাৰত বিৰোধী মন্তব্যৰে বিতৰ্কৰ শীৰ্ষত থকা পাকিস্তানৰ প্ৰধান মন্ত্ৰী ইমৰান খানৰ শেহতীয়া এটা ভিডিঅ’ চ’ছিয়েল মিডিয়াত ভাইৰেল হৈ পৰিছে।
পাকিস্তানৰ নায়লা ইনায়েত নামৰ এগৰাকী সংবাদিকে চ’ছিয়েল মিডিয়াত শ্বেয়াৰ কৰা ভিডিঅ’টোত ইমৰাণ খানে গছে ৰাতি অক্সিজেন উৎপন্ন কৰে বুলি মন্তব্য কৰিছে।
‘‘গছে ৰাতি অক্সিজেন উৎপন্ন কৰে’’ পাকিস্তানৰ প্ৰধান মন্ত্ৰী ইমৰান খানৰ মন্তব্য।
উল্লেখযোগ্য যে, চ’ছিয়েল মিডিয়াত ইমৰান খানৰ ভিডিঅ’টো ভাইৰেল হৈ পৰাৰ লগে লগে বিভিন্ন লোকে ইমৰান খানৰ জ্ঞানক লৈ কটাক্ষ কৰা দেখা যায়।
বিভিন্ন জনে ইমৰান খানক আইনষ্টাইন ইমৰান খান, ডাৰউইন ইমৰান খান আখ্যা দিয়াৰ লগতে কিছুমানে চ’ছিয়েল মিডিয়াত সপ্তম শ্ৰেণীৰ বিজ্ঞানৰ পাঠ্যপুথিৰ ছবি আপলোড কৰি ইমৰান খানক কটাক্ষ কৰিছে।
সমালোচক সকলে এগৰাকী সপ্তম শ্ৰেণীৰ ছাত্ৰয়ো গছে দিনত অক্সিজেন উৎপন্ন কৰে বুলি জানে বুলি কয়।
ভিডিঅ’টোত পাকিস্তানৰ প্ৰধান মন্ত্ৰী গৰাকীয়ে গছে নিশা অক্সিজেন উৎপন্ন কৰে বুলি কয় আৰু তাৰ পাছতে গছে কাৰ্বন-ডাই অক্সাইড শোষণ কৰে বুলি কৈ সহজ হ’বলৈ চেষ্টা কৰে।
পাকিস্তানত থকা ইমৰান খানৰ সমালোচক সকলে এয়া দেশখনৰ বিজ্ঞান শিক্ষাৰ অগ্ৰগতি বুলি উল্লেখ কৰি ইমৰান খান চৰকাৰক সমালোচনা কৰে।