ত্ৰিপুৰা আৰক্ষীয়ে দেওবাৰে ক’ৰ’না ভাইৰাছ সম্পৰ্কে ফে’চবুকত ভুৱা খবৰ বিয়পোৱা এজন যুৱকক গ্ৰেপ্তাৰ কৰে।
ধৃত যুৱকজনক পশ্চিম ত্ৰিপুৰা জিলাৰ অৰুণধুতী নগৰ অঞ্চলৰ অভিষেক ধৰ বুলি চিনাক্ত কৰা হৈছে। যুৱকজনক নিজ বাসগৃহৰ পৰা আটক কৰা হয়, আৰক্ষীৰ সূত্ৰত প্ৰকাশ।
আৰক্ষীয়ে জনোৱা মতে অভিষেকে নিজৰ ফে’চবুকত তেওঁলোকৰ অঞ্চলৰ এজন ব্যক্তি ক’ৰ’না ভাইৰাছত আক্ৰান্ত হোৱা বুলি উল্লেখ কৰি উক্ত লোকজনে এই লুকুৱাই ৰখা বুলি এটা প’ষ্ট দিছিল।
উক্ত প’ষ্টটো ভাইৰেল হৈ পৰে আৰু অঞ্চলটোৰ লোকসকলৰ মাজত আতংকৰ সৃষ্টি কৰে।
স্থানীয় লোকসকলে এই সম্পৰ্কে আৰক্ষীক খবৰ দিয়াত আৰক্ষীৰ লোক অভিষেকৰ ঘৰত উপস্থিত হৈ যুৱকজনৰ পৰা ক’ৰ’না ভাইৰাছৰ দ্বাৰা আক্ৰান্ত হোৱা লোকজনৰ পৰিচয় বিচাৰে।
কিন্তু অভিষেকে আৰক্ষীক লোকজনৰ পৰিচয় জনাব নোৱৰাত আৰক্ষীয়ে তেওঁক গ্ৰেপ্তাৰ কৰি অৰুণধুতী নগৰ আৰক্ষী থানালৈ লৈ আনে।
আৰক্ষীয়ে পিছত যুৱকজনে দিয়া উক্ত ফে’চবুক প’ষ্টটো ভুৱা বুলি জনায়।
