আমেৰিকাৰ ৰাষ্ট্ৰপতি ড’নাল্ড ট্ৰাম্পে ঘোষণা কৰিছে যে তেওঁৰ প্ৰশাসনৰ দ্বিতীয় কাৰ্যকালৰ সংসদৰ প্ৰথম ১০০ দিন সম্পূৰ্ণ হোৱাৰ লগে লগে ভাৰতৰ সৈতে শীঘ্ৰে স্বাক্ষৰিত হ’ব এক বাণিজ্যিক চুক্তি। তেওঁ কয় যে ভাৰতৰ সৈতে বাণিজ্যিক সম্পৰ্ক ইতিবাচক দিশত আগবাঢ়িছে আৰু তেওঁৰ প্ৰশাসন এই চুক্তি স্বাক্ষৰৰ বাবে সক্ৰিয়ভাৱে কাম কৰি আছে। ট্ৰাম্পে দাবী কৰিছে যে ভাৰতৰ প্ৰধানমন্ত্ৰী নৰেন্দ্ৰ মোদীয়ে এই চুক্তিৰ প্ৰতি আগ্ৰহ প্ৰকাশ কৰিছে।
উল্লেখ্য যে ট্ৰাম্প প্ৰশাসনে ভাৰতৰ ওপৰত ২৬ শতাংশ শুল্ক আৰোপ কৰিছিল, যদিও পিছত ইয়াক ৯০ দিনৰ বাবে স্থগিত ৰখিছিল। তেওঁ লগতে কয় যে, “ভাৰতৰ সৈতে বাণিজ্য ভালদৰে চলি আছে। মই ভাবো আমি অতি সোনকালে ভাৰতৰ সৈতে চুক্তি কৰিবলৈ ওলাইছো।” তেওঁ উল্লেখ কৰে যে তিনি সপ্তাহ পূৰ্বে প্ৰধানমন্ত্ৰী মোদীৰ আমেৰিকা ভ্ৰমণৰ সময়ত এই বিষয়ে আলোচনা হৈছিল আৰু মোদীয়ে চুক্তিত স্বাক্ষৰৰ প্ৰতি আগ্ৰহী আছিল। এই পৰিপ্ৰেক্ষিতত আমেৰিকাৰ উপ-ৰাষ্ট্ৰপতি জে ডি ভেন্স এপ্ৰিল মাহত তিনিদিনীয়া ভ্ৰমণসূচীৰে ভাৰত ভ্ৰমণ কৰি প্ৰধানমন্ত্ৰী মোদীৰ সৈতে সাক্ষাৎ কৰিব। দুয়োপক্ষই বাণিজ্য চুক্তিৰ আলোচনাৰ প্ৰগতিৰ প্ৰতি সন্তুষ্টি প্ৰকাশ কৰিছে বুলি সদৰী কৰিছে।
আমেৰিকাৰ বাণিজ্য সচিব হাৱাৰ্ড লুটনীয়ে কয় যে ৱাশ্বিংটন অতি শীঘ্ৰে দিল্লীৰ সৈতে এই চুক্তি চূড়ান্ত কৰিব। কিন্তু এতিয়া প্ৰশ্ন উঠিছে যে আমেৰিকাৰ প্ৰস্তাৱিত ২৬ শতাংশ শুল্ক ভাৰতে গ্ৰহণ কৰিব নে নাই।
এই চুক্তিৰ ফলাফল ভাৰত-আমেৰিকাৰ বাণিজ্যিক সম্পৰ্কৰ ভৱিষ্যত গঢ় দিয়াৰ ক্ষেত্ৰত গুৰুত্বপূৰ্ণ হ’ব। ট্ৰাম্পৰ প্ৰশাসনৰ এই উদ্যোগে দুয়োটা দেশৰ অৰ্থনৈতিক সহযোগিতা জোৰদাৰ কৰাৰ লক্ষ্য ৰাখিছে যদিও শুল্কৰ বিষয়টোৱে আলোচনাত জটিলতাৰ সৃষ্টি কৰিব পাৰে।
