“মোৰ অবিহনে ইজৰাইলৰ অস্তিত্ব নাথাকিলহেঁতেন”, ট্ৰাম্পৰ বিস্ফোৰক দাবী

আমেৰিকাৰ ৰাষ্ট্ৰপতি ডনাল্ড ট্ৰাম্পে মঙলবাৰে ইজৰাইলক লৈ এক ডাঙৰ মন্তব্য কৰিছে। ইজৰাইলৰ প্ৰতি আমেৰিকাৰ দীৰ্ঘদিনীয়া সমৰ্থনৰ কথা উল্লেখ কৰি ট্ৰাম্পে দাবী কৰে যে, “মোৰ অবিহনে ইজৰাইল নাথাকিলহেঁতেন।” তেওঁৰ মতে, আমেৰিকাৰ সহায় আৰু হস্তক্ষেপ নথকা হ’লে ইজৰাইল বহুত আগতেই ধ্বংস হৈ গ’লহেঁতেন।

ফ্ৰান্সত অনুষ্ঠিত জি-৭ সন্মিলনৰ সময়ত সাংবাদিকৰ সৈতে কথা পাতি ট্ৰাম্পে ইজৰাইল আৰু ইৰান সমৰ্থিত হেজবোল্লাহৰ মাজত চলি থকা সংঘাতক লৈ উদ্বেগ প্ৰকাশ কৰে। তেওঁ কয় যে এই যুদ্ধ বহুত দিন ধৰি চলি আছে আৰু ইয়াত অত্যধিক মানুহৰ মৃত্যু হৈছে। ট্ৰাম্পে লগতে কয় যে ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে লেবাননৰ ক্ষেত্ৰত অধিক দায়িত্বশীলভাৱে ব্যৱহাৰ কৰিব লাগে।

শেহতীয়াকৈ লেবাননৰ দক্ষিণ উপকণ্ঠত ইজৰাইলী সেনাই চলোৱা আক্ৰমণক লৈও ট্ৰাম্প অসন্তুষ্ট বুলি প্ৰকাশ কৰে। তেওঁৰ মতে, আমেৰিকা আৰু ইৰানৰ মাজত অন্তর্বর্তী শান্তি চুক্তিৰ ঘোষণা হোৱাৰ ঠিক আগতে এই আক্ৰমণ সংঘটিত হোৱা উচিত নাছিল। ট্ৰাম্পে স্পষ্টভাৱে কয় যে কোনো এজন লোকক বিচাৰি প্ৰতিবাৰেই এটা এপাৰ্টমেণ্ট ভাঙি পেলোৱাৰ প্ৰয়োজন নাই, কাৰণ সেই ঘৰবোৰত বহু নিৰীহ মানুহো থাকে আৰু সকলো মানুহ হেজবোল্লাহ নহয়।

ট্ৰাম্পে আমেৰিকাৰ ভূমিকা উল্লেখ কৰি কয় যে আমেৰিকাৰ সহায় নথকা হ’লে ইজৰাইলৰ অস্তিত্ব বিপদত পৰিলহেঁতেন। তেওঁ হেজবোল্লাহৰ সৈতে চলি থকা সংঘাতক “সৰু যুদ্ধ” বুলি অভিহিত কৰে যদিও কয় যে এই সংঘাতে সমগ্ৰ অঞ্চলটোক অস্থিৰ কৰি ৰাখিছে। ট্ৰাম্পে লগতে দাবী কৰে যে ইজৰাইলে যদি বেইৰুটত আক্ৰমণ অব্যাহত ৰাখে তেন্তেও ইৰানৰ সৈতে শান্তি চুক্তি টিকি থাকিব।

নেতানিয়াহুৰ সৈতে নিজৰ সম্পৰ্কৰ কথা উল্লেখ কৰি ট্ৰাম্পে কয় যে তেওঁৰ “বিবি” অৰ্থাৎ বেঞ্জামিন নেতানিয়াহুৰ সৈতে ভাল সম্পৰ্ক আছে। কিন্তু বৰ্তমান সময়ত নেতানিয়াহুৱে লেবানন আৰু হেজবোল্লাহৰ বিষয়ত অধিক সংযম আৰু দায়িত্ব দেখুওৱা প্ৰয়োজন বুলি তেওঁ মন্তব্য কৰে।

এই মন্তব্যৰ মাজতে আমেৰিকা আৰু ইৰানৰ মাজত এক নতুন বুজাবুজিৰ স্মাৰক স্বাক্ষৰৰ সম্ভাৱনা বৃদ্ধি পাইছে। এই চুক্তিৰ জৰিয়তে পশ্চিম এছিয়াত চলি থকা সংঘাতৰ অন্ত পেলোৱা আৰু দুয়োখন দেশৰ মাজত যুদ্ধবিৰতিৰ দিন বৃদ্ধি কৰাৰ চেষ্টা কৰা হ’ব। লগতে, যুদ্ধৰ বাবে প্ৰায় বন্ধ হৈ পৰা কৌশলগত হৰমুজ প্ৰণালী পুনৰ মুকলি হোৱাৰ সম্ভাৱনাও দেখা দিছে।