তিনিচুকীয়া জিলাৰ জাগুন আৰক্ষী চকী অন্তৰ্গত জাগুন-মেও সংযোগী পথৰ অসম-অৰুণাচল সীমান্তত ষ্ট্ৰীট লাইটৰ বেটাৰি চুৰি কৰি আৰক্ষীৰ হাতত আটক হ’ব লগা হ’ল জাগুনৰ দুই গভাইত চোৰ।
আটকাধীন যুৱকদ্বয়ক ক্ৰমে জাগুন কাৰপুং পুলি গাঁৱৰ ফুলেশ্বৰ বৰগোঁহাই (২৩), আৰু জাগুন পাৰ্বতীপুৰৰ দীপক সোণোৱাল (২৬) বুলি চিনাক্ত কৰা হৈছে।
প্ৰাপ্ত তথ্য মতে, যোৱা নিশা ধৃত চোৰ দুজনে জাগুন-মেও সংযোগী পথত ৪টাকৈ ষ্ট্ৰীট লাইটৰ বেটাৰি চুৰ কৰি ডেম্পত বিক্ৰী কৰিবলৈ যোৱাৰ অৱস্থাতে জাগুন আৰক্ষীয়ে বেটেৰিসহ তেওঁলোকক আটক কৰিবলৈ সক্ষম হয়।চোৰ দুগৰাকীয়ে ডেম্পৰ মালিকক চুৰি কৰা বেটেৰি কেইটা বিক্ৰী কৰিবলৈ যোৱাত মালিকজনৰ সন্দেহ ওপজাত লগে লগে আৰক্ষীক ঘটনাৰ সন্দৰ্ভত অৱগত কৰে আৰু পিছত আৰক্ষীয়ে ডেম্পত উপস্থিত হৈ চোৰ দুজনক আটক কৰি আৰক্ষী চকীলৈ লৈ আনে।
জাগুন আৰক্ষীয়ে চোৰ দুজন অঞ্চলটোত সংঘটিত হৈ অহা বিভিন্ন চুৰি কাৰ্য্যৰ সৈতে জড়িত থকাৰ সন্দেহ কৰিছে।
উল্লেখযোগ্য যে দীৰ্ঘদিন ধৰি মাৰ্ঘেৰিটা মহকুমাৰ বিভিন্ন প্ৰান্তত ষ্ট্ৰীট লাইটৰ বেটেৰি চুৰি হৈ আহিছিল। সম্প্ৰতি জাগুন আৰক্ষীয়ে ধৃত চোৰ দুটাৰ বিৰুদ্ধে এক গোচৰ ৰুজু কৰি অধিক তথ্যৰ বাবে জেৰা চলাই আছে।
