গোৱালপাৰা জিলাৰ মৰনৈ থানাৰ অন্তৰ্গত দহিকটা অঞ্চলত দেওবাৰে সন্ধিয়া গণৰোষত পৰে দুজন বাইক চোৰ ৷ বাইক চোৰ দুটাক ৰাইজে উত্তম মাধ্যম দি আৰক্ষীক চমজাই দিয়ে ৷
জানিবপৰা মতে, দেওবাৰে পুৱা মৰনৈ থানাৰ অন্তৰ্গত ৰাক্ষসিনী নিবাসী জুলফিকৰ আলমৰ হিৰো হোন্ডা গ্লেমাৰ মটৰ চাইকেল আৰু নেপালীখুটি নিবাসী শংকৰ শৰ্মাৰ হিৰো হোন্ডা ছুপাৰ স্প্লেন্ডাৰ বাইক দুখন দুই ভিন্ন স্থানৰ পৰা দিনৰ পোহৰতে চূৰি হয় ৷
পাছত বাইকৰ গৰাকীদ্বয়ে চুৰিৰ ঘটনাটো মৰনৈ আৰক্ষীক অৱগত কৰায়।
এনেদৰে বাইক চোৰ হোৱাৰ ঘটনাই অঞ্চলজুৰি চাঞ্চল্যৰ সৃষ্টি কৰি থকাৰ সময়তে সন্ধিয়া ৫ মান বজাত চুৰি হোৱা বাইক দুখন কৃষ্ণাই-মৰনৈ পথৰে নেপালীখুটিৰ পৰা কৃষ্ণাই অভিমুখে তীব্ৰ গতিত গৈ থকা অৱস্থাত দহিকটা বজাৰত উপস্থিত থকা ৰাইজৰ সন্দেহ হয় ৷
দুয়োখন বাইকৰ চালকক ৰখাবলৈ ইংগিত দিয়ে যদিও ৰাইজৰ চকুত ধুলি দি পলায়ন কৰিব খোজা অৱস্থাত দহিকটাতে এজনক বাইকসহ ৰাইজে আটক কৰে।
ইপিনে, আন এখন বাইকত থকা দুজনে তীব্ৰ গতিৰে পলাই গজিয়াজানী গাঁৱত প্ৰবেশ কৰাৰ সময়তে ৰাইজৰ চিঞৰ বাখৰ শুনি বাইক আৰোহী এজনে ধাননি পথাৰত সোমাই পলায়ন কৰে যদিও এজনক বাইকসহ ৰাইজে আটক কৰে।
ৰাইজে আটক কৰা চোৰ দুটা হ’ল ৰাক্ষসিনী গাঁৱৰ আইনুল হক আৰু শিমোলিতোলা কানকটা গাঁৱৰ জেহেৰুল হক।
আনহাতে, দহিকটা আৰু গজিয়াজানীত আটক হোৱা চোৰ দুটাক ৰাইজে উত্তম মাধ্যম দি মৰনৈ আৰক্ষীক খবৰ দিয়ে ৷
পাছত আৰক্ষী ঘটনাস্থলীত উপস্থিত হৈ দুয়োকে তেজেৰে লুতুৰি পুতুৰি অৱস্থাত উদ্ধাৰ কৰি মৰনৈ চিকিৎসালয়ত ভৰ্ত্তি কৰায় ৷
উল্লেখ্য যে, বিগত কেইবামাহ ধৰি মৰনৈৰ থানাৰ অন্তৰ্গত ভিন্ন প্ৰান্তত বাইক,গৰু আদি চোৰে সন্ত্ৰাসৰ সৃষ্টি কৰি আহিছে ৷
আৰক্ষীয়ে চুৰি কাৰ্য প্ৰতিৰোধৰ বাবে বহু পদক্ষেপ গ্ৰহণ কৰিছে যদিও সম্পূৰ্ণ বিফল হোৱা পৰিলক্ষিত হৈছে ৷
