ৰাজ্যৰ বিভিন্ন প্ৰান্তৰৰ পৰা হাতীৰ শোকাবহ মৃত্যু বাতৰি আহি থকাৰ মাজতে বোকাখাত মহকুমাৰ কাৰ্বি আংলং জিলা সীমান্তৰ বৰভেটাতো দেওবাৰৰ পুৱা দুটা হাতীৰ কৰুণ মৃত্যু হয় ৷
বৰভেটাৰ চাহ বাগিছা আৰু খেতিৰ পথাৰৰ মাজৰ দুটা পুখুৰীৰৰ পাৰতে হাতী দুটাৰ মৃতদেহ পুৱা স্থানীয় লোকে প্ৰত্যক্ষ কৰি বন বিভাগক খবৰ দিয়ে ৷
তথ্য লাভৰ পিচতেই কাজিৰঙাৰ ডি এফ অ’ ৰমেশ কুমাৰ গগৈৰ নেতৃত্বত পশু চিকিৎসক ডাঃ চামচুল আলী আৰু বনকৰ্মীৰ দল ঘটনাস্থলীত উপস্থিত হৈ ঘটনাৰ তদন্ত কৰে ৷
কাজিৰঙাৰ সঞ্চালক পি শিৱকুমাৰেও ঘটনাস্থলীত উপস্থিত হৈ ঘটনাৰ বুজ লয় ৷
মৃত হাতীৰ এটা ৫ মহীয়া মতা পোৱালী আৰু এজনী ৩৫ বছৰীয়া হাতী ৷
হাতীৰ বিচৰণ ভুমি হিচাবে চিহ্ণিত কাৰ্বি পাহাৰৰ পাদদেশৰ বৰভেটা গাওঁ হোৱা এই ঘটনা মুলত: খাদ্যৰ বিষক্ৰিয়া বুলি মৰণোত্তৰ পৰীক্ষাৰ পিচত পশু চিকিৎসক ডাঃ চামচুল আলীয়ে জানিবলৈ দিয়ে ৷
কাৰ্বি পাহাৰত হৈ থকা অনিয়ন্ত্ৰিত বন ধ্বংস আৰু কাঠৰ চোৰাং ব্যৱসায়ৰ বাবে হাতীৰ প্ৰায় সকলোবোৰ আৱাস ধ্বংস হৈ পৰাৰ পিচত হাতীৰ জাকবোৰ এতিয়া অঘৰী হৈ ঘুৰি ফুৰিব লগা হৈছে ৷
ইফালে নিজৰ শস্যৰ সুৰক্ষাৰ নামত নীতি বিৰুদ্ধভাৱে অপৰিকল্পিতভাৱে মানুহে ব্যৱহাৰ কৰা বিদ্যুতিক তাঁৰৰ বেৰাই সমস্যাত পেলাছে এই অঘৰী হাতীৰ জাকক ৷
