পুষ্পা-২ৰ পিছত গেম চেঞ্জাৰ, প্ৰিমিয়াৰত প্ৰাণ হেৰুৱালে দুজনে; কিমান টকা দিলে ৰামচৰণে?

বিপদ যেন শেষ হোৱা নাই দক্ষিণৰ তাৰকাসকলৰ। ‘পুষ্পা-২’ৰ প্ৰিমিয়াৰৰ ক’লা ছাঁ এইবাৰ ‘গেম চেঞ্জাৰ’ৰ প্ৰিমিয়াৰত। প্ৰিমিয়াৰত শ্ব’টো চাবলৈ আহি দুজন অনুৰাগীৰ মৃত্যু হ’ল। অন্ধ্ৰ প্ৰদেশৰ ৰাজামুন্দ্ৰীত সংঘটিত হৈছে এই ঘটনা।

ইয়াৰ পূৰ্বে আল্লু অৰ্জুনৰ ‘পুষ্পা: দ্য ৰুল’ৰ প্ৰিমিয়াৰত এগৰাকী মহিলাৰ মৃত্যু হোৱাৰ লগতে তেওঁৰ ৮ বছৰীয়া পুত্ৰ আহত হৈছিল। সেইদিনা হায়দৰাবাদৰ সেই চিনেমা হলটোত আল্লু অৰ্জুন নিজেই উপস্থিত আছিল। আৰু সেইবাবেই তেওঁৰ ফালে উঠিছিল অভিযোগৰ আঙুলি। ক্ষতিপূৰণৰ বাবে দাবী উত্থাপন কৰা হয় আৰু ঘটনাত নাবালকৰ চিকিৎসাৰ দায়িত্ব লোৱা হয়। আনকি নায়কৰ বিৰুদ্ধে গোচৰো তৰা হয়। এতিয়া আল্লু অৰ্জুন জামিনত মুকলি হৈ আছে।

পুষ্পা-২ৰ সেই ঘটনাৰ আঁচ এতিয়াও মাৰ যোৱা নাই । ইফালে শনিবাৰে অন্ধ্ৰ প্ৰদেশৰ ৰাজামুন্দ্ৰীত অনুষ্ঠিত হয় ‘গেম চেঞ্জাৰ’ৰ প্ৰিমিয়াৰ। ছবিখনৰ নায়ক ৰামচৰণৰ লগতে তাত উপস্থিত আছিল ৰাজ্যৰ উপ-মুখ্যমন্ত্ৰী পৱন কল্যাণ। সেই অনুষ্ঠানৰ পৰা উভতি অহাৰ পথত নায়কৰ দুজন অনুৰাগীৰ মৃত্যু হয়। বাইকেৰে ঘৰলৈ উভতি অহাৰ পথত বিপৰীত দিশৰ পৰা অহা এখন গাড়ীয়ে খুন্দা মাৰিছিল।

জানিব পৰা মতে, “গেম চেঞ্জাৰ”ৰ প্ৰযোজক দিল ৰাজুৱে মৃত ব্যক্তি দুজনৰ পৰিয়ালক ৫ লাখ টকাকৈ মুঠ ১০ লাখ টকা আগবঢ়াইছে। সোমবাৰে এই ঘোষণা কৰে প্ৰডাকচন কোম্পানীটোৱে। ৰাজুৱে কয়, ‘এনে আনন্দৰ মুহূৰ্তত এনে এটা ঘটনা বৰ দুখজনক। যিমান পাৰো তেওঁলোকৰ পৰিয়ালৰ লগত থাকিম। আৰম্ভণিতে মই তেওঁলোকৰ পৰিয়ালক ৫ লাখ টকা দিলো। তেওঁলোকৰ পৰিয়াললৈ সমবেদনা জ্ঞাপন কৰিলোঁ।‘

জনা গৈছে যে ছবিখনৰ প্ৰযোজকৰ উপৰিও অন্ধ্ৰ প্ৰদেশৰ উপ-মুখ্যমন্ত্ৰী পৱন কল্যানে পৰিয়াল দুটাক ৫ লাখ টকাৰ আৰ্থিক সাহায্যও আগবঢ়াইছে। আনহাতে, অভিনেতা ৰাম চৰণেও মৃতকৰ পৰিয়ালক ৫ লাখ টকা দি আৰ্থিক সাহায্য আগবঢ়াইছে। ঘটনা সন্দৰ্ভত ৰামচৰণে কয়, ‘এই মৰ্মান্তিক দুৰ্ঘটনাটোত মই গভীৰভাৱে ব্যথিত। আমি সদায় অনুৰাগীসকলক নিৰাপদে ঘৰলৈ উভতি যাবলৈ পৰামৰ্শ দিওঁ। এই ঘটনাই মোক বিচলিত কৰিছে। মৃতকৰ পৰিয়াললৈ মোৰ সমবেদনা জ্ঞাপন কৰিলোঁ। ঈশ্বৰে তেওঁলোকক শক্তি দিয়ক। আমি তেওঁলোকৰ কাষত থিয় দি সকলো প্ৰয়োজনীয় সহায় আগবঢ়াম।‘

ইফালে পৱন কল্যাণৰ দাবী যে বিগত ৫ বছৰে দুৰ্ঘটনা সংঘটিত হোৱা পথটো বেয়া হৈ আছে। ইয়াৰ বাবে তেওঁ পূৰ্বৰ চৰকাৰে কাম নকৰাৰ অভিযোগ উত্থাপন কৰে। অহা ১০ জানুৱাৰীত মুক্তি পাব ৰামচৰণৰ ‘গেম চেঞ্জাৰ’। কিয়াৰাক তাত তেওঁৰ বিপৰীতে দেখা যাব।