আজি ঘোষণা কৰা হৈছে UPSC ৰ অসামৰিক সেৱাৰ পৰীক্ষা ২০১৯ৰ চূড়ান্ত ফলাফল।
এই পৰীক্ষাত দেশৰ মুঠ ৮২৯ গৰাকী প্ৰাৰ্থী উত্তীৰ্ণ হৈছে।
ইয়াৰে ভিতৰত অসমৰ দুগৰাকী কৃতিমানে সুনাম অৰ্জন কৰিবলৈ সক্ষম হৈছে।
উত্তীৰ্ণ হোৱা অসমৰ দুই প্ৰাৰ্থী হৈছে আৰণ্যক শইকীয়া আৰু তপন ডেকা।
আৰণ্যক শইকীয়াই ৫৯ সংখ্যক স্থান লাভ কৰাৰ বিপৰীতে তপন ডেকাই লাভ কৰিছে ৭৬৬ সংখ্যক স্থান।
আৰণ্যক শইকীয়া অৱসৰপ্ৰাপ্ত আৰক্ষী সঞ্চালক প্ৰধান তথা বৰ্তমান অসম সাহিত্য সভাৰ সভাপতি কুলধৰ শইকীয়াৰ পুত্ৰ।
ইয়াৰ পূৰ্বেও তেওঁ চিভিল চাৰ্ভিচ পৰীক্ষাত উত্তীৰ্ণ হৈছিল।
২০১৭চনত প্ৰথমবাৰ তেওঁ ইউপিএছচিৰ পৰীক্ষাত ১৪৮সংখ্যক স্থান দখল কৰিছিল।
আৰণ্যক শইকীয়া বৰ্তমান ভাৰতীয় আৰক্ষী সেৱাৰ কৰ্ণাটক কেডাৰৰ বিষয়া হিচাপে প্ৰশিক্ষণত আছে।
UPSC ৰ পৰীক্ষাত উত্তীৰ্ণ হোৱা ৮২৯ গৰাকী প্ৰাৰ্থীয়ে ভাৰতীয় প্ৰশাসনিক সেৱা, ভাৰতীয় বিদেশ সেৱা, ভাৰতীয় আৰক্ষী সেৱা আৰু কেন্দ্ৰীয় সেৱাৰ A আৰু B ত অন্তৰ্ভূক্ত হ’ব।
আজি ঘোষণা কৰা তালিকাৰ শীৰ্ষস্থান লাভ কৰিছে ক্ৰমে প্ৰথম প্ৰদীপ সিং, যতিন কিশোৰ আৰু প্ৰতিভা বাৰ্মাই।
