উত্তৰ প্ৰদেশত দুগৰাকী ছোৱালীৰ ওলমি থকা অৱস্থাত মৃতদেহ উদ্ধাৰ; চৰম পন্থা নহয়, হত্যাৰ দাবী পৰিয়ালৰ

এক বুকু কঁপাই যোৱা ঘটনা৷ পৰিয়ালৰ অভিযোগ অনুসৰি হত্যাকাণ্ডৰ পাছত দুগৰাকী ছোৱালীৰ মৃতদেহ গছত ফাঁচী দিয়া হয়।নিৰুদ্দিষ্ট পিছদিনা ৰাতিপুৱা নিৰুদ্দেশ হোৱা ছোৱালী দুগৰাকীৰ ওলমি থকা মৃতদেহ উদ্ধাৰ হয়। উত্তৰ প্ৰদেশৰ ফাৰুকাবাদত এনে এক চাঞ্চল্যকৰ ঘটনা সংঘটিত হয়।

নিহত কন্যা দুগৰাকীৰ বয়স ক্ৰমে ১৫ আৰু ১৮ বছৰ। জন্মাষ্টমীৰ দিনা তেওঁলোকৰ গাঁৱত এক অনুষ্ঠানৰ আয়োজন কৰা হয়। সেই ছোৱালী দুজনীও তালৈ গৈছিল। তাৰ পাছত ঘৰলৈ উভতি নাহিল। গোটেই ৰাতি বিচাৰি ফুৰাৰ পাছত পিছদিনা ৰাতিপুৱা চুপাৰিৰ বাৰীত তেওঁলোকৰ ওলমি থকা মৃতদেহ উদ্ধাৰ হয়। তথ্য লাভ কৰাৰ পাছতে আৰক্ষীয়ে ক্ষীপ্ৰতাৰে সেই স্থানত উপস্থিত হয়। ঘটনাস্থলীৰ পৰা এটা ফোন উদ্ধাৰ কৰা হৈছে, চিম কাৰ্ডো উদ্ধাৰ কৰা হৈছে।

অৱশ্যে এই ঘটনাক আত্মহত্যা বুলি মানি ল’বলৈ অস্বীকাৰ কৰে গাঁওবাসীয়ে। মৃত ছোৱালী দুগৰাকীৰ পৰিয়ালেও হত্যাৰ এজাহাৰ দাখিল কৰিছে। মৃতদেহ দুটা মৰণোত্তৰ পৰীক্ষাৰ বাবে প্ৰেৰণ কৰা হৈছে। জিলা আৰক্ষী অধীক্ষক আলোক প্ৰিয়াদৰ্শীয়ে কয়, ছোৱালী দুগৰাকী ঘনিষ্ঠ বন্ধু আছিল। আমি সেই স্থানৰ পৰা এটা মোবাইল ফোন আৰু এখন চিম কাৰ্ড উদ্ধাৰ কৰিলোঁ। তদন্ত আৰম্ভ হৈছে। কিন্তু মৰণোত্তৰ পৰীক্ষাৰ পিছত ক’ব পাৰি যে সেয়া আত্মহত্যা নে হত্যা।