বহিৰ্ৰাজ্যৰ পৰা আহি পুনৰ বৰপেটাত উপস্থিত ২৬০ যাত্ৰী; আটাইকেইজনকে কোৱাৰেন্টাইনৰ বাবে প্ৰেৰণ
বহিৰ্ৰাজ্যৰ পৰা বৃহস্পতিবাৰে ৰে’ল যোগে ২৬০ জন যাত্ৰী বৰপেটা জিলালৈ আহিছে। পুৱা পাচঁ বজাতে আহমেদাবাদৰ পৰা অহা প্ৰথমখন ৰে’লত ১৭০ জন যাত্ৰী বৰপেটাৰোড ৰে’লৱে ষ্টেশ্যনত নমাৰ পিছত দুপৰীয়া আন এখন শ্ৰমিক ৰে’লত অহা ৯০ জন যাত্ৰী উক্ত ষ্টেশ্যনত নামে।
উল্লেখযোগ্য যে লক ডাউন আৰম্ভ হোৱাৰ পিছত বৃহস্পতিবাৰে প্ৰথম বাৰলৈ যাত্ৰীবাহী ৰে’ল গাড়ী বৰপেটা ৰোড ষ্টেশ্যনত ৰখোৱা হয়।
এই যাত্ৰী সকল ষ্টেশ্যনত নমাৰ লগে লগে সকলোৰে স্কেনিং কৰা হয়। তাৰ পিছতে বিভিন্ন কোৱাৰেন্টাইন চেন্টাৰলৈ তেওঁলোকক লৈ যোৱা হয়।
ইপিনে, যোৱা ২১ মে’ত বৰপেটালৈ অহা ৫৫ জন লোকক তেওঁলোকৰ কোভিড ১৯ পৰীক্ষাৰ ফলাফল নিগেটিভ হোৱাৰ বাবে আৰু কোনো ধৰণৰ ৰোগৰ লক্ষণ নথকাত ঘৰলৈ পঠিয়াই দিয়া হয়।
ইয়াৰে ৪৩ জন কয়াকুছি কলেজৰ হোৱাৰ বিপৰীতে আন ১২ জন টিটকাৰ মিনি আই টি আই কেন্দ্ৰৰ আৱাসী আছিল।
তদুপৰি কয়াকুছি মহাবিদ্যালয়ত থকা আন ৮৭ জন লোকৰো কোভিড পৰীক্ষাৰ ফলাফল নিগেটিভ অহাত শুকুৰবাৰৰ ভিতৰত তেওঁলোককো যাবলৈ দিয়া হব বুলি জিলা তথ্য আৰু জনসংযোগ বিষয়া বিকাশ শৰ্মাই জনাইছে।
তেওঁ লগতে জনোৱা মতে ইয়াকে লৈ যোৱা ১৫ মে’ৰ পৰা এতিয়ালৈকে বৰপেটা জিলালৈ বহি:ৰাজ্যৰ পৰা অহা লোকৰ সংখ্যা হলগৈ ২১৬৫ জন হলগৈ।
ইয়াৰে ২৮২ জনক ইতিমধ্যে প্ৰতিষ্ঠানিক কোৱাৰেন্টাইনৰ পৰা মুকলি কৰি হোম কোৱাৰেইনটাইনত ৰখা হৈছে।
বৰ্তমান জিলাখনৰ ভিন ভিন স্থানত স্থাপন কৰা ৩১ টা কোৱাৰেন্টাইন কেন্দ্ৰত ১৮৮৩ জন লোকক ৰখা হৈছে।
অৱশ্যে, এই পৰিসংখ্যা ঘনে ঘনে সলনি হৈ আছে। বৃহস্পতিবাৰে নিশাৰ ভাগলৈ আন এখন ৰেলত এশজন লোক বৰপেটা জিলালৈ আহি পোৱাৰ কথা।
কোৱাৰেন্টাইনত থকা প্ৰতিজন লোককে দিনটোত তিনিবাৰকৈ খাদ্য যোগান ধৰাৰ উপৰি বিশুদ্ধ খোৱাপানী, চাবোন, ছেনিটাইজাৰ, বিচনা-পত্ৰ, বাল্টি আদিও যোগান ধৰা হৈছে।