মাদাৰ অ’ল্ড এজ হ’মত দুগৰাকী নতুন অতিথিক আদৰণি
মাদাৰ অ’ল্ড এজ হ’মৰ এইবাৰ নতুন অতিথি হ’ল এহাল বৃদ্ধ-বৃদ্ধা। নতুন ঘৰখনলৈ আদৰি অনা বৃদ্ধ গৰাকীৰ নাম ক্ষিতিশ চন্দ্ৰ দে আৰু মহিলাগৰাকীৰ নাম পুতুলী দাস।
কেইদিনমান পূৰ্বে বামুণী মৈদামৰ ভাস্কৰ নগৰৰ পৰা গীতানগৰ আৰক্ষীৰ সহযোগত স্থানীয় ৰাইজে বৃদ্ধ আৰু বৃদ্ধা গৰাকীক উদ্ধাৰ কৰে। তেওঁলোকৰ শাৰীৰিক অৱস্থা বেয়া হোৱা বাবে ততাতৈয়াকৈ জিএমচিএইচলৈ প্ৰেৰণ কৰা হয়।
ইয়াৰ পাছতে বৃদ্ধ আৰু বৃদ্ধা গৰাকী কিছু সুস্থ হোৱাৰ বাবে বৃহস্পতিবাৰে সন্ধিয়া গীতানগৰ আৰক্ষীয়ে তেওঁলোকক মাদাৰ অ’ল্ড এজ হোমত ভৰ্তি কৰায়।
মাডাৰ অ’ল্ড এজ হ’মৰ উৎপল হৰ্ষবৰ্দ্ধনে জানিবলৈ দিয়া মতে বৃদ্ধ জনে আগতে ৰিক্সা চলইছিল। ‘’বৃদ্ধজনে কেইবছৰমান পূৰ্বলৈকে চানমাৰিত ৰিক্সা চলাইছিল। বৰ্তমান তেওঁৰ কোনো পৰিয়ালৰ লোক নাই, সেয়েহে মাদাৰ অল্ডএজ হোমেই এতিয়া তেওঁৰ বাবে হ’ব শেষ আশ্ৰয়স্থল,’’-তেওঁ জনায়।
আনহাতে, পুতুলী দাস নামৰ বৃদ্ধাগৰাকীয়ে চকুৰেও নেদেখে। তেওঁৰো কোনো পৰিয়ালৰ লোক নাই আৰু বৰ্তমান একেবাৰেই অকলশৰীয়া।
এই দুই গৰাকী বৃদ্ধ-বৃদ্ধা বৰ্তমান মাদাৰ অল্ড এজ হ’মৰ অতিথি কাৰণ তেওঁলোকৰ পৰিয়াল বুলিবলৈ যে কোনোৱেই নাই। জীৱনৰ শেষ সময়ত তেওঁলোকে এতিয়া এটা আশ্ৰয় বিচাৰি পালে।