সদৌ অসম ছাত্ৰ সন্থাৰ উদ্যোগত বৃহস্পতিবাৰে অনুষ্ঠিত হৈছিল সকীয়নি বিক্ষোভ। এই বিক্ষোভ কাৰ্যসূচীত অংশ ল’বলৈ বিশ্বনাথৰ পৰা আছুৰ কেইবাজনো বিষয়ববীয়া গুৱাহাটীলৈ গৈছিল।
বিক্ষোভ কাৰ্যসূচীত অংশগ্ৰহণ কৰি ওভতি অহাৰ পথত ১৫ নং ৰাষ্ট্ৰীয় ঘাইপথত তথা জামুগুৰিহাটৰ গেৰেকী চুকত নিশা প্ৰায় ৩ মান বজাত এখন মালবাহী বলেৰ’ পিক আপ ভানৰ সৈতে তেওঁলোকে উঠি অহা ছুইফট ডিজায়াৰ খনৰ মুখামুখি সংঘৰ্ষ সংঘটিত হয়। ঘন কুঁৱলীৰ বাবে এই ভয়ংকৰ দুৰ্ঘটনাটো সংঘটিত হোৱাৰ সন্দেহ কৰা হৈছে।
উল্লেখ্য যে ছাত্ৰ নেতা কেইগৰাকীয়ে এ এছ-১২ কে-৬২৯১ নম্বৰৰ এখন ছুইফট ডিজায়াৰত বিশ্বনাথ চাৰিআলি অভিমুখে আহি থাকোতে বিপৰীত দিশৰ পৰা আহিছিল এ এছ-২৭চি-২৮১৭ নম্বৰৰ এখন বলেৰ’ পিক আপ ভান। তীব্ৰ গতিত অহা গাড়ী দুখনৰ মাজত সংঘটিত দুৰ্ঘটনাটোত আছুৰ বিষয়ববীয়া কেইজন গুৰুতৰভাৱে আহত হয়।
দুৰ্ঘটনাটোত আহত হোৱা বিশ্বনাথৰ আছু নেতাসকল হ’ল ক্ৰমে বিশ্বনাথ জিলা আছুৰ উপদেষ্টা ভাষ্কৰ চামুৱা, সম্পাদক কৌস্তভমণি দাধৰা,উপ সভাপতি সুৰজ ভূঞা, সাংগঠিনক সম্পাদক গৌৰৱ বৰা আৰু সহঃসাধাৰণ সম্পাদক লক্ষ্যজিৎ শইকীয়া ৷
আনহাতে, আহতসকলক পোনপ্ৰথমে ঢলাইবিল চিকিৎসালয়ত ভৰ্তি কৰোৱা হয় যদিও নেতা কেইগৰাকীক পাছত উন্নত চিকিৎসাৰ বাবে তেজপুৰলৈ প্ৰেৰণ কৰা হয়।
