বাক্সা জিলাৰ তামুলপুৰ মহকুমাৰ নাগ্রীজুলি উন্নয়ন খণ্ডৰ অন্তৰ্গত ২ নং কালিপুৰ আৰু ভাৰত-ভূটান সীমান্তৰ বগাজুলিত বৃহস্পতিবাৰে এম জি এনৰেগাৰ অধীনত দুটাকৈ উন্নয়নমূলক আঁচনিৰ নিৰ্মাণৰ কামৰ শুভাৰম্ভ কৰা হয়।
নাগ্রীজুলি উন্নয়ন খণ্ডৰ অধীনৰ ২ নং কালিপুৰ উচ্চ মাধ্যমিক বিদ্যালয়ৰ খেল পথাৰৰ ভূমি উন্নয়নৰ ১০ লাখ টকীয়া আঁচনিটোৰ কালি ১ নং পূৱ কুমাৰীকাটা ভি চি ডি চিৰ অধ্যক্ষ অলাউদ্দিন আহমেদৰ উপস্থিতিত এক মাংগলিক পৰিৱেশত শুভাৰম্ভ কৰে নাগ্রীজুলি ব্লক বি পি এফৰ সভাপতি খেম বাহাদুৰ থাপাই।
দহ লাখ টকীয়া আঁচনিখন শুভাৰম্ভ কৰা অনুষ্ঠানটোত নাগ্রীজুলি টি চি এল চি চিৰ ভাৰপ্ৰাপ্ত অধ্যক্ষ অজিত বসুমতাৰী, স্থানীয় যুৱ সমাজকৰ্মী ভক্তবাহাদুৰ লিম্বু, নাগ্রীজুলি ব্লক বি পি এফ আৰু নাগ্ৰীজুলি প্ৰাইমাৰী বি পি এফ সমিতিৰ বিষয়-ববীয়া, নেতা কৰ্মী, স্থানীয় ৰাইজৰ লগতে বিদ্যালয়খনৰ শিক্ষক-কৰ্মচাৰী উপস্থিত থাকে।
ইয়াৰ উপৰি নাগ্রীজুলি উন্নয়ন খণ্ডৰ অধীনৰ বগাজুলিতো কালি এম জি এনৰেগাৰ অধীনৰ তিনি লাখ টকা ব্যয় সাপেক্ষে নিৰ্মাণ কৰিব লগীয়া নলা নিৰ্মাণ কাৰ্য্যৰ শুভাৰম্ভ কৰা হয়। ১ নং পূব কুমাৰীকাটা ভি চি ডি চিৰ অধ্যক্ষ আলাউদ্দিন আহমেদৰ তত্বাৱধানত নিৰ্মাণ হ’ব লগীয়া নলা নিৰ্মাণ আঁচনিটোৰ শুভাৰম্ভ কৰে নাগ্রীজুলি টি চি এল চি চিৰ ভাৰপ্ৰাপ্ত অধ্যক্ষ অজিত বসুমতাৰীয়ে।
১ নং পূব কুমাৰীকাটা ভি চি ডি চিৰ অধ্যক্ষ আলাউদ্দিন আহমেদে সাংবাদ মাধ্যমক জানিবলৈ দিয়া মতে ভাৰত-ভূটান সীমান্তৰ বাগজুলিত তিনি লাখ টকীয়া এই নলা নিৰ্মাণৰ কাম সম্পূৰ্ণ হ’লে বগাজুলি অঞ্চলৰ বিস্তীৰ্ণ কৃষি পথাৰত পানী যোগানৰ ব্যৱস্থা সুচল হ’ব আৰু এই আঁচনিৰ জৰিয়তে বহু কৃষক পৰিয়াল লাভান্বিত হ’ব।
