নাগৰিকত্ব সংশোধনী বিধেয়কৰ বিৰোধিতা কৰি অসমৰ জনগণে ৰাজপথত চিঞৰি প্ৰতিবাদ কৰি ঘাম পেলাই থকাৰ সময়তে এই বিধেয়কৰ বিভিন্ন দিশ চালি-জাৰি চোৱাৰ বাবে গঠিত যুটীয়া সংসদীয় সমিতিত থকা অসমৰ সাংসদে নিজৰ দায়িত্বহীন মনোভাবৰ পৰিচয় দিছে। আজি দিল্লীত যুটীয়া সংসদীয় সমিতি বা জেপিচিৰ গুৰুত্বপূৰ্ণ বৈঠক আছিল যদিও সমিতিত থকা অসমৰ চাৰিজন সাংসদৰ দুজনেই উপস্থিত নাথাকিল। আজিৰ বৈঠকত অনুপস্থিত থাকে বিজেপিৰ যোৰাহাট লোকসভা সমষ্টিৰ সাংসদ কামাখ্যা প্ৰসাদ তাছা আৰু মঙলদৈৰ সাংসদ ৰমেন ডেকা।
ইয়াৰ বিপৰীতে জেপিচিৰ অসমৰ আন দুজন সদস্য ক্ৰমে সাংসদ ভুৱনেশ্বৰ কলিতা আৰু সুস্মিতা দেব উপস্থিত থাকে।
গুৰুত্বপূৰ্ণ বৈঠকখনত সাংসদ দুজনৰ অনুপস্থিতিয়ে বিশেষ তাৎপৰ্য্য বহন কৰিছে আৰু ইয়াক লৈ সমালোচনা হোৱা দেখা গৈছে। জানিব পৰা মতে আজিৰ বৈঠক পূৰ্ব নিৰ্ধাৰিত যদিও সাংসদ ৰমেন ডেকা ব্যস্ত আছে বেইজিং ভ্ৰমণত। কামাখ্যা প্ৰসাদ তাছাৰ অৱস্থান জানিব পৰা নগ’ল।
উল্লেখযোগ্য যে বাংলাদেশ, পাকিস্তান, আফগানিস্তান আদি দেশৰ পৰা বিভিন্ন কাৰণত ভাৰতলৈ আহি নিগাজিকৈ থাকিবলৈ লোৱা সেই দেশবোৰৰ ধৰ্মীয় সংখ্যালঘু সম্প্ৰদায়ৰ, বিশেষকৈ হিন্দুসকলক ভাৰতীয় নাগৰিকত্ব দিবৰ বাবে প্ৰস্তাৱ লৈ সংবিধানৰ নাগৰিকত্ব সম্পৰ্কীয় আইনখন সংশোধনৰ বাবে কেন্দ্ৰৰ বিজেপি নেতৃত্বাধীন চৰকাৰে নাগৰিকত্ব সংশোধনী বিধেয়ক, ২০১৬ আনিব খুজিছে। ইয়াক লৈ বিতৰ্ক হোৱাত সংসদে এই বিধেয়কখনৰ বিভিন্ন দিশবোৰ চালি-জাৰি চাবলৈ আৰু এই সন্দৰ্ভত দেশৰ জনসাধাৰণৰ মত লৈ তাৰ ভিত্তিত প্ৰতিবেদন দিবলৈ যুটীয়া সংসদীয় সমিতি গঠন কৰি দিছে। যোৱা ৭ মে’ৰ পৰা ১০ মে’লৈ অসম ভ্ৰমণ কৰি জেপিচি বা যুটীয়া সংসদীয় সমিতিয়ে অসমৰ ৰাইজৰ শুনানি ল’লে যদিও সেয়া অসম্পূৰ্ণ আছিল আৰু দ্বিতীয়বাৰ শুনানিৰ বাবে অসমলৈ অহাৰ প্ৰতিশ্ৰুতি দি গৈছিল। কিন্তু অসমলৈ দ্বিতীয়বাৰ অহা নাই জেপিচি।
ইফালে আজিৰ জেপিচিৰ বৈঠক অতি গুৰুত্বপূৰ্ণ বিবেচিত হৈছে। আজি জেপিচিৰ অধ্যক্ষৰ ৰাজেন্দ্ৰ অগ্ৰৱালৰ নেতৃত্বত ইয়াৰ সদস্যসকলে বিধেয়কখন সন্দৰ্ভত দেশৰ গৃহ দপ্তৰ, বৈদেশিক পৰিক্ৰমা আৰু আইন আৰু ন্যায় মন্ত্ৰ্যালয়ৰ বিষয়াসকলৰ শুনানি ল’ব। আজিৰ বৈঠকতে পৰৱৰ্তী কাৰ্য্যসূচী সন্দৰ্ভতো সিদ্ধান্ত লোৱাৰ সম্ভাৱনা আছে।
