আদালত চৌহদতে সংঘটিত হ’ল গুলীচালনাৰ ঘটনা। আৰক্ষীক মুকলিকৈ প্ৰত্যাহ্বান জনালে অপৰাধীয়ে। এটা গোচৰৰ শুনানিৰ বাবে আদালত চৌহদলৈ অহা দুজন কাৰাবন্দী ওপৰত একাংশ আক্ৰমণকাৰীয়ে গুলীচালনা কৰে। এই ঘটনাত কাৰাবন্দী দুজন গুলীবিদ্ধ হয়। শনিবাৰে বিয়লি বিহাৰৰ সমস্তিপুৰ জিলাৰ আদালত চৌহদত ঘটিল এনে ঘটনা।
আৰক্ষীৰ তথ্য অনুসৰি, গুলীয়াই আহত কৰা কাৰাবন্দী দুজনৰ নাম হৈছে প্ৰভাত চৌধুৰী আৰু প্ৰভাত তিৱাৰী। মুফাছিল থানাৰ অধীনৰ দুধপুৰা অঞ্চলৰ বাসিন্দা এই দুই কাৰাবন্দীৰ বিৰুদ্ধে অবৈধ সুৰাৰ ব্যৱসায়ৰ অভিযোগত অভিযুক্ত।
উক্ত গোচৰৰ শুনানিতে তেওঁলোকক সমস্তিপুৰৰ আদালতলৈ আনিছিল আৰক্ষীয়ে। তাৰ পাছত একাংশ দুস্কৃতিকাৰীয়ে তেওঁলোকক আক্ৰমণ কৰে। সম্প্ৰতি গুৰুতৰভাৱে আঘাতপ্ৰাপ্ত তেওঁলোকক স্থানীয় চিকিৎসালয়ত ভৰ্তি কৰোৱা হৈছে। আক্ৰমণকাৰী এতিয়াও ধৰা পৰা নাই। তেওঁলোকৰ সন্ধান চলাই থকা হৈছে।
প্ৰত্যক্ষদৰ্শীয়ে জনোৱা মতে, দুপৰীয়া অবৈধ সুৰা ব্যৱসায়ৰ শুনানিৰ সময়ত প্ৰভাত চৌধুৰী আৰু প্ৰভাত তিৱাৰীক সমস্তিপুৰ আদালতলৈ অনা হয়। কাৰাগাৰৰ ভ্যানৰ পৰা উলিয়াই আদালতৰ ভিতৰলৈ নিয়াৰ সময়তে একাংশ দুষ্কৃতিকাৰীয়ে তেওঁলোকৰ ওপৰত গুলীচালনা কৰে। তেওঁলোকৰ লক্ষ্য ব্যৰ্থ নহ’ল। দুয়োকে গুলীয়াই আহত কৰা হয়।
হঠাতে সংঘটিত হোৱা এই ঘটনাত হুলস্থুলৰ সৃষ্টি হয় আদালত চৌহদত। ঘটনাস্থলীত উপস্থিত থকা সকলোৰে মাজত চৰম আতংক বিয়পি পৰে। ডি এছ পি অমিত কুমাৰে জনোৱা মতে, এজনৰ ভৰিত আৰু আনজনৰ হাতত গুলী লাগিছে। আৰক্ষীয়ে তেওঁলোকক উদ্ধাৰ কৰি সদৰ চিকিৎসালয়ত ভৰ্তি কৰে।
আনহাতে, হঠাৎ গুলীচালনাৰ ঘটনাত আদালত চৌহদত উপস্থিত থকা সকলোৱে চৰম আতংকত দৌৰাদৌৰি কৰিবলৈ আৰম্ভ কৰে। সেই সুযোগতে আক্ৰমণকাৰী পলায়ন কৰে। অৱশ্যে আক্রমণকাৰীক বিচাৰি উলিয়াবলৈ জিলা আৰক্ষীয়ে তদন্ত আৰম্ভ কৰিছে৷ এখন তদন্ত সমিতিও গঠন কৰা হৈছে।
ডি এছ পি অমিত কুমাৰ আৰু এছ পি বিনয় তিৱাৰীয়ে সেই স্থান পৰিদৰ্শন কৰি গুলীয়াই আহত কৰা বিচাৰাধীন কাৰাবন্দী দুজনক জেৰা কৰি আক্ৰমণকাৰীৰ বিষয়ে জানিবলৈ দিয়ে।
অৱশ্যে এই ঘটনাত আদালত চৌহদত বিহাৰ আৰক্ষী আৰু নিৰাপত্তাৰ ভূমিকাক লৈ প্ৰশ্ন উত্থাপন হৈছে। বিহাৰৰ মুখ্যমন্ত্ৰী নীতিশ কুমাৰক অনতিপলমে পদত্যাগ কৰিবলৈ দাবী জনাইছে ৰাজ্যিক বিজেপিৰ সভাপতি সম্ৰাট চৌধুৰীয়ে।
