চাৰিলেনযুক্ত পথ সম্প্ৰসাৰণৰে জড়িত নিৰ্মাণ সংস্থা আৰু বিদ্যুৎ বিভাগৰ বুজাপৰাৰ অভাৱৰ বাবে টীয়কত আজি বিদ্যুৎপৃষ্ট হৈ দুজন শ্ৰমিক গুৰুতৰভাৱে আহত হোৱা ঘটনাই চাঞ্চল্যৰ সৃষ্টি কৰিছে ।
ঘটনা অনুসৰি চাৰিলেনযুক্ত পথ সম্প্ৰসাৰণত দলং সম্প্ৰসাৰণ কৰিবলৈ টীয়কৰ জগদুৱাৰ দলঙৰ দাঁতিৰ এটা বৃহৎ অংশ খান্দি লৈছিল নিৰ্মাতা সংস্থাই।
কিন্তু পথৰ দাঁতিতে থকা ট্ৰেন্সফৰ্মাৰটোৰ সুৰক্ষাৰ ক্ষেত্ৰত শক্তি বিভাগেই হওক বা নিৰ্মাতা সংস্থাই হওক কোনেও কাণসাৰ নিদিলে।
যাৰ ফলত আজি কেইবাদিন ধৰি ৰাজ্যত হোৱা ধাৰাসাৰ বৰষুণৰ পিছত এতিয়া উন্মুক্ত ট্ৰেন্সফৰ্মাৰটো নদীত বাগৰি পৰাৰ শংকা দেখি স্থানীয় একাংশ যুৱকৰ তৎপৰতাত নিৰ্মাতা সন্থা আৰু শক্তি বিভাগৰ সহযোগত ট্ৰেন্সফৰ্মাৰটো কালি পথৰ দাঁতিলৈ নিয়া হৈছিল ।
কিন্তু আজি পুৱা উক্ত স্থানত কাম কৰি থকা অৱস্থাতে দুৰ্ভাগ্যজনকভাৱে দুই শ্ৰমিক ক্ৰমে দয়াল মুন্দ্ৰা আৰু আজাদ প্ৰাণ তাঁতী হঠাৎ বিদ্যুৎপৃষ্ট হৈ আঘাতপ্ৰাপ্ত হয়।
আহত দুয়োকে ততাতৈয়াকৈ টীয়ক FRU লৈ অনা হয় আৰু ইয়াৰে আজাদ প্ৰাণ তাঁতী গুৰুতৰভাবে আঘাতপ্ৰাপ্ত হৈছে বুলি জানিব পৰা গৈছে।
উল্লেখযোগ্য যে বিদ্যুত পৰিবাহী তাঁৰত লাগি কাৰ গাফিলতিৰ বাবে এই দুৰ্ঘটনা সংঘটিত হ’ল এই পৰ্যন্ত স্পষ্ট হোৱা নাই যদিও শক্তি বিভাগে নিৰ্মাতা সংস্থা আৰু সংস্থাই বিভাগক ওলোটাই দোষাৰোপ কৰা কাৰ্যই বিভাগসমূহৰ মাজত যে বুজাপৰাৰ অভাৱ ঘটিছে তাকেই প্ৰতীয়মান কৰিছে।
এনে সমন্বয়হীনতাৰ বাবেই এই ঘটনা সংঘটিত হৈছে বুলি বহুতে অভিযোগ কৰিছে।
